د جنوبي کوریا د اټکلونو له مخې شمالي کوريا خپله د اتومي وسلو زیرمه پراخه کړې ده. د سیول د معلوماتو له مخې شمالي کوریا پنځوس کیلوگرامه پلوتونیم لري. په پلازمېنه سیول کې د دفاع وزارت ویلي دي چې دغه څه د لسو اتوم بمونو له پاره بسنه کوي.
په رپوټ کې راغلي دي چې دغه مواد چې وسلې ترې جوړیدای شي ینگ بوین، له اتومي بټۍ سره تړاو نیسي چې په دې موده کې بنده شوې ده. زیاته شوې ده چې یوازي په تیرو درو کلونو کې لس کیلو مواد جدا کړل شوي دي. د جنوبي کوریا د دفاع وزارت په وینا دغه پلوتونیم د سوځول شوي کیماوي توکو څخه بیرته په لاس راوړل شوي دي.
په رپوټ کې راغلي دي چې د شمالي کوریا کمونيستي رژیم د یورانیمو غني کول هم زیات کړي دي. اتومي وسلې له پلوتونیم او یا هم له یورانیمو څخه جوړیږي.
په اوس وخت کې د نړۍ ۹ هیوادونه ۱۶۳۰۰ اتوم بمونه لري. د اتمې وسلو په برخه کې د محدودیت راوستلو له غوښتنو سره سره په دې شمیر کې کموالې نه دی راغلې. په دې انځوریز رپوټ کې به ولیدل شي چې کوم هیواد څومره اتوم بمونه لري.
انځور: Reutersپه ستاکهولم کې د سولې د بین المللي تحقیقاتي موسسې( سِپري) په خبره د اتومي وسلو د شمیر په برخه کې روسیه تر ټولو مخکې ده. پخواني شوروي اتحاد د لومړي ځل له پاره په ۱۹۴۹ کال کې د اټومي وسلو ازمیښت ترسره کړی وو. روسيه په اوس وخت کې ۸۰۰۰ اتومي وسلي لري.
امریکا متحده ایالاتو په ۱۹۴۵ کال کې تر خپل لومړني اټومي ازمیښت لږ وخت وروسته د جاپان پر هیروشیما او ناگاساکي ښارونو باندی اټوم بمونه وغورځول. د سپري په حواله امریکا اوس هم ۷۳۰۰ اتوم بمونه لري.
فرانسه په اروپا کې تر ټولو ډیرې اتومي وسلې لري. د دغو وسلو شمیر ۳۰۰ ښودل شوې دی. فرانسې په ۱۹۶۰ کال کې د اټوم بم جوړولو ټکنالوژي ترلاسه کړی وه.
د آسیا تر ټولو لوې اقتصادي قدرت او د نړۍ تر ټولو لوې د وچې پوځ درلودونکې هیواد چین د پوځ شمیر په هکله دقیق ارقام نه دي ورکړل شوي. اټکل کیږي چې چین ۲۵۰ اټوم بمونه لري. چین په ۱۹۶۴ کال کې خپل لومړنې اټومي ازمیښت ترسره کړی وو.
د ملگرو ملتونو د امنیت شورا دایمي غړي بریتانیې په ۱۹۵۲ کال کې خپل لومړنې اټومي ازمیښت ترسره کړی وو. د امریکا له نږدې متحد هیواد بریتانیې سره اوس وخت ۲۲۵ اټومي وسلې موجودې دي.
پاکستان د ۱۰۰ او ۱۲۰ تر منځ اتومي وسلو درلودونکې دی. کله چې پاکستان په ۱۹۹۸ کال کې اټوم بم جوړ کړ تر هغه وروسته د پاکستان او هند تر منځ کومه جگړه نه ده رامنځته شوې. مخکې تر دې د هند او پاکستان تر منځ دری جنگونه ترسره شوې دي. که څه هم پاکستان وایې چې د دوی اټومي وسلې د دفاعي مقاصدو له پاره دي، خو څارونکي ویره لري که د دغو دواړو هیوادونو تر منځ جگړه رامنځته شي، نو کیدای شي پر یوې اټومي جگړې واوړي.
په ۱۹۷۴ کال کې د لومړي ځل او په ۱۹۹۸ کال کې د دویم ځل له پاره د اټومي وسلو ازمیښت ترسره کونکی هیواد هندوستان له ۹۰ څخه تر ۱۱۰ پورې اوټوم بمونه لري. له چین او پاکستان سره د سرحدي پولو پر سر د شخړې سربیره هندوستان ژمنه کړی چې دغه هیواد به د اتوم بم د کارونې په برخه کې هیڅ کله هم لومړيتوب ونه کړي.
له ۱۹۴۸ څخه تر۱۹۷۳ کاله پورې له عربي هیوادونو سره دری واره جنگیدلې هیواد اسرائيل ۸۰ اټومي وسلې لري. د اسرائیلو د اټومي پروگرامو په برخه کې ډیر لږ معلومات موجود دي.
د اټکلونو له مخې شمالي کوریا لږ ترلږه ۶ اټومي بمونه لري. که څه هم شمالي کوریا له جنوبي کوریا سره شخړه لري، خو د دغه هیواد اټومي پروگرامونو لویدیځ هیوادونه هم اندیښمن کړي دي. د ملگرو ملتونو له خوا د لگول شوو بندیزونو سربیره هم دغه کمونستي هیواد په ۲۰۰۶ کال کې د اټومي وسلو ازمیښت ترسره کړ.
کارپوهان او استخباراتي ادارې اتومي وسلو ته د شمالي کوریا لاس رسی په بیلا بیل ډول اټکلوي. د امریکا متحدو ایالاتو د ساینس او نړیوال امنیت انستیتوت سازمان د تیر کال په جون میاشت کې رپوټ ورکړی وو چې د اټکلونو له مخې شمالي کوریا له ۱۳ څخه تر ۲۱ اتومي وسلو له پاره زیرمې لري. په ۲۰۱۴م کال دغه حد له لسو څخه تر ۱۶ پورې اټکلیده.
د شمالي کوريا واکمن کيم جنگ د نوي کال په وینا کې، اعلان کړی وو چې هیواد یې د قاره یي توغندي د جوړولو په وروستي پړاو کې دی، چې په اتومي خوليو سمبالېدای شي.
د شمالي کوریا کمونيستي رژیم یوازي په تیرو وختونو کې د خپل اتومي پروگرام له کبله نه دی منزوي شوی. بلکي په تیرو وختونو کې هم دغه هیواد د ډیرو اتومي وسلو او توغندیو په ازمویلو سره نړیوالي ټولنه لمسولې ده او له دې کبله پرې تل بندیزونه لگول شوي دي.
