شمالي کوريا بيا توغندی ازمويلی دی
۱۳۹۵ تیر ۱۹, شنبه![](https://static.dw.com/image/19389688_800.webp)
د جنوبي کوريا د دفاع وزارت په سول کې ويلي دي چې شمالي کوريا د سينپو په نوم بندري ښار په شاوخوا کې احتمالا له اوبتل څخه د يو باليستيک نوغندي ازموينه کړې ده.
دا په داسې حال کې ده چې د جمعې په ورځ جنوبي کوريا او د امريکا متحدو آيالاتو ويلي ول چې د THAAD په نوم د توغنديو د دفاعي سيستم پر ځای پر ځای کولو يې موافقه کړې ده. پر خبره يې دغه سيستم «دفاعي بڼه» لري چې د جنوبي کوريا د وګړو ساتنه ورپه غاړه ده.
د څرګندونو له مخې دغه سيستم نه د شمالي کوريا او نه د کوم بل هېواد پر ضد کارول کيږي. دا چې د توغنديو دغه سيستم چېرته او کله لګول کيږي، لا څرګنده نه ده. يوازې دومره وويل شول چې د ځای ځايګي انتخاب په وروستي پړاو کې قرار لري. دغه سيستم چې THAAD يعنې د لوړې ارتفاع د ساحوي دفاع بټۍ نوميږي، کولای شي چې د بل چا له خوا توغول شوي توغندي سمدلاسه وولي.
د کيم جونګ اون په وړاندې نوي بنديزونه
شمالي کوريا يوازې د نوو بنديزونو په وړاندې غبرګون ښودلی دی، خو د دفاعي سيستم په اړه يې څه نه دي ويلي. په خبره يې د شمالي کوريا د مشر، کين جونګ اون، په وړاندې مالي بنديزونه «د جنګ ښکاره اعلان» دی چې بايد بېرته واخيستل شي.
د امريکا متحده آيالاتو، زورواکی اون په خپل تور ليست کې راوستی دی، ځکه چې د نړيوالو پلټونکو په خبره نوموړی بشري حقونه تر پښو لاندې کوي.
د توغنديو پر له پسې ازموينې
شمالي کوريا په جنورۍ کې اتومي بم ازمويلی وو، چې د دغه کمونيستي هېواد په تاريخ کې څلورمه دا ډول ازموينه وه. ورپسې يو شمېر توغندي هم وازمويل شول.
شمالي کوريا په دې ترتيب د ملګرو ملتونو پرېکړه ليکونه تر پښو لاندې کړي دي. د ملګرو ملتونو د امنيت شورا له دې کبله په مارچ مياشت کې تر دې دمه تر ټولو سخت بنديزونه ورباندې ولګول.
تخنيکي نيمګړتياوې
سره له دې هم شمالي کوريا تقريبا دوې اوونۍ مخکې د منځني واټن موسودان ډوله نوي توغندي وازمويل. ويل کيږي چې دغسې توغندي ۴۰۰۰ کيلومتره واټن وهلی شي، چې په دې سره د ګوام نومي ټاپو کې د امريکايانو اډه هم په نخښه کولای شي.
خو داسې برېښي چې د شمالي کوريا د پوځي مشرتابه ټکنالوژي لا خامۍ لري. د اپريل مياشتې په ازموينه کې توغندی له دېرش کيلومتره واټن وهلو وروسته سمندر ته ولوېد. نور توغندي هم له لنډ واټن وهلو وروسته د سمندر په اوبو کې غرق شول.