شولڅ په واشنګټن کې: ایران نه باید یو مهم سیمه ایز قدرت وي
۱۴۰۲ بهمن ۲۱, شنبه
د المان صدراعظم اولاف شولڅ په واشنګټن کې د دغه هیواد له ولسمشر جو بایډن سره تر لیدنې کتنې وروسته ویلي دي چې ایران ته نه باید اجازه ورکړل شي، څو په یوه سیمه ایز قدرت بدل شي.
د المان صدراعظم اولاف شولڅ او د امریکا متحده ایالاتو ولسمشر جو بایډن په سپینه ماڼۍ کې سره ولیدلانځور: Michael Kappeler/dpa/picture alliance
اعلان
د المان صدراعظم اولاف شولڅ او د امریکا متحده ایالاتو ولسمشر جو بایډن په منځني ختیځ کې د دوو هیوادونو د تشکیل یا رامنځته کیدو پر حل لارې ټینګار وکړ. د المان صدراعظم په واشنګټن کې په سپينه ماڼۍ کې له خبرو اترو وروسته وویل: «امریکا متحده ایالات او المان د دوو هیوادونو پر حل لارې موافقې ته رسیدلي دي او مونږ به هر کار چې کولی یې شو په فعالانه ډول ترسره کړو، څو د دا ډول یوه تحول رامنځته کیدل ممکن شي.»
شولڅ همدرانګه خبرداری ورکړ چې د احتمالي تشنج د زیاتیدو په پام کې نیولو سره، باید د سیمې پر تر ټولو مهم قدرت د ایران د بدلیدلو مخه ونیول شي. د المان صدارعظم زیاته کړه چې مونږ د سیاسي تحولاتو په یوه ډیر مهم پړاو کې قرار لرو.
د دوو هیوادونو حل لاره یوه ورځ مخکې تر دې د مصر، قطر، متحده عربي اماراتو، اردن د بهرنیو چارو وزیرانو او یوه لوړپوړي فلسطیني چارواکي سره د امریکا د بهرنیو چارو وزیر انتوني بلینکن په لیدنه کې هم مطرح شوې وه.
د څلورو عربي هیوادونو د بهرنیو چارو وزیرانو د یوه خپلواک فلسطیني هیواد د تشکیلولو او د دوو هیوادونو د حل لارې عملي کیدو په برخه کې د بیرته نه ستنیدونکو ګامونو پر پورته کولو ټینګار کړی وو.
د اسرائیل لومړی وزیر بنیامین نتانیاهو د دوو هیوادونو د حل لارې او په دې ترتیب په خپل ګاونډ کې د یوه مستقل فلسطیني هیواد د تشکیلیدو مخالف دی. له همدې امله په تیرو کلونو کې په دې برخه کې هڅې له ناکامۍ سره مخامخ شوي دي.
آژانسونه: ش.ن/ ا.و.ا
د مرګ او ژوند په منځ کي د غزې د فلسطینیانو انځوریز راپور
غزه د بشري ناورین په درشل کي ده. د اکتوبرمیاشتي پر اوومه نېټه د حماس د ترهګریزو بریدونو په ځواب کي د اسرائيل د ځوابي بریدونه دوام لري، په غزه کي د وژل سویو او ټپیانو شمېر مخ پر ډېرېدو دی.
انځور: Fatima Shbair/AP/picture alliance
د اسرائيل درانه ځوابي بریدونه
پر اسرائيل د حماس د ناڅاپي تروریستي بریدونو په دوام، دغه هیواد هم پر غزه هوايي بریدونه وکړل چې د حماس ډلي په کنترول کي ده. اروپايي ټولنه، امریکا متحده ايالات او ځيني نور هیوادونه حماس تروريستي ډله ګڼي. د اکتوبر پر نهمه دوشنبه د اسرائيل لومړي وزیر بنیامین نتانیاهو وویل: «کوم څه، چي به موږ په راتلونکو ورځو کي له خپلو دوښمنانو سره کوو د دوی د راتلونکو نسلونو له پاره به لکه زنګ داسي وي.»
انځور: Belal Al SabbaghAFP/Getty Images
په غزه کي پراخي ویجاړۍ
د ملګرو ملتونو د بشري مرستو د همږغۍ دفتر(OCHA) په وینا نژدې ۸۰۰ تعمیرونه یومخ ویجاړي سوي دي او په سونو نور د اسرائيل په هوايي بریدونو کي تاواني سوي دي. راپورونه وايي، چي په سونو زره کسان اوبه نه لري.
انځور: Mohammed Talatene/dpa/picture alliance
د پاته سویو کسانو په لټه کي
د اسرائيل په هوايي بریدونو کي د غزې تراډي په شمال کي د جبالیه کډوالو پنډغالي له منځه تللي او ژغورونکي کوښښ کوي، چي پاته سوي ژوندي کسان وژغوري. هغه شمیرې چي د پنجشنبې په ورځ خپرې سوي دي، د دواړو لوریو قربانیان تر۲۵۰۰ زیات دي. لږ تر لږه ۱۲۰۰ اسرائيليان او ۱۳۰۰ فلسطینیان وژل سوي دي په زرهاوو کسان ټپیان دي.
انځور: Mahmud Hams/AFP/Getty Images
د ښځو فرياد
مړي په یوه موټر کي وړل کیږي او یوه فلسطینۍ ښځه بوغاري وهي . په غزه کي د روغتیا مسؤلان وايي تر ۱۴۰ ډېر کوچنیان او ۱۰۰ ښځي وژل سوي دي.
انځور: Said Khatib/AFP/Getty Images
غزه کلابنده سوې ده
فلسطینیان په یوه زاړه مني بس موټر کي د اسرائيل له انتقامي هوايي بریدونو څخه تښتي. د ملګرو ملتونو د یو راپور پربنسټ په غزه کي ۱۸۷ زره کسان بې ځایه سوي دي. ۱۳۷ زره کسانو د ملګرو ملتونو په ښوونځیو کي او ۴۰ زره په شخصي کورونو کي پنا اخیستې ده. امکان نه لري، چي د غزې تراډه دي یومخ پرېږدي. اسرائيل دغه سیمه محاصره کړې او د مصر لار يې هم تړلي دي.
انځور: Saleh Salem/REUTERS
اسرایلي ځواکونه د غزي تراډي پوله خپله مهاروي
د اسرائيل ځواکونه د غزې تراډي پر پوله ګزمه کوي. د حماس ډلي وسله والو د اکټوبر مياشتي پر اوومه پر پوله د اسرائيل درول سوی کټارې ماتي او دغه هیواد ته له ور اوښتلو سره یې عملیات شروع کړل، چي ډېری قربانیان يې ولسي وګړي ول. اسرائيل په ۱۹۹۴م کال کي د غزې پر پوله اغزن تار وغځاوه. په غزه کي د مصر سره پر پوله هم اغزن سیم درول سوی دی.
جان ایګلنډ د ناروې د کډوالو د شورا (NRC) عمومي منشي له CNN سره په مرکه کي خبرداری ورکړ، چي په غزه کي یو انساني ناورین سترګي په لار دی. «د بېلګي په ډول که چیري په روغتونونو کي د برېښنا د نشتوالي او لوږي له لاسه کوچنیان ومري، دا به جنګي جنایتونه وشمېرل سی.»
انځور: Mahmud Hams/AFP/Getty Images
یحیی سنوار، په غزه کي د حماس د سیاسي دفتر مشر
یحیی له ۲۰۱۷م کال راهیسي په غزه کي د حماس تروریستي ډلي مشر دی. هغه پر اسرائيل د برید له طراحانو څخه ګڼل کیږي. سنوار، چي د کډوالو په پنډغالي کي لوی سوی دی، ویلي دي: «موږ دا غوره ګڼو، چي شهیدان سوو، د دې پرځای، چي تر ظلم او سپکتیا لاندي ومروو.»
انځور: Mohammed Abed/AFP
د لوړي کچي فشار
د حماس ویاند خبري اژانسونو ته ویلي دي چي هر واري چي اسرائيل بیله خبرتیا پر غزه بمبار وکړي یو نیول سوی اسرائيلی به وژل کیږي. په داسي حال کي چی د اسرائيل د باندنیو چارو وزیر الی کوهن ګواښ وکړ چي دا ډول کړنی به هیڅ ونه بخښل سي. حماس پر اسرائيل باندی د برید پرمهال په لسهاوو اسرائيليان له ځان سره ژوندي بیولي دي.
