د آلمان جمهوررييس د کرونا بحران ته په کتو سره د اروپایانو څخه د یووالي او یو له بل سره د نژدې پاته کیدو غوښتنه وکړه. په خبره یې، کرونا ويروس سرحدونه نه پيژني او يوازې په گډه سره یې مخ نيول کیدلی سي.
انځور: picture-alliance/dpa/S. Kahnert
اعلان
جمهوررييس فرانک والټر شټاین مایر نن دوشنبه (د مارچ میاشتي ۱۶مه) د «ټي انلاین» سره په مرکه کي وویل: «د خپلو سرحدونو مؤقتي تړل عاقلانه او ضروري دي، خو د کرونا ویروس اصلأ سرحدونه نه پیژني او په اصطلاح د هيڅ دولت تابعیت نه لري. ځکه نو که اوس څوک (یو دولت) یوازي د خپل ځان په فکر کي وي او ددغه ساري مرض د راپیدا کیدو علت پر نورو باندي وراچوي، دا یوه ډیره خطرناکه لار ده، چي تر گټي به یې تاوان ډیر وي.« هغه وويل: «واضح خبره ده ، چي یوازي په گډه سره د کرونا پر ویروس باندي بریالي کیدلای سو.«
شټاین مایر همدارنگه وویل: «د کرونا بحران موږ د یوه لوی چلنج سره مخامخ کړي یو. اوس نو دا زموږ په لاس کي ده، چي په داخل او خارج کي یووالی او همبستگي غالبه کیږي او یا دا چي خودخواهي به غالبه کیږي او هرڅوک به د ځان لپاره کارکوي.» په خبره یې «تر کرونا وروسته به نړۍ بل ډول وي. خو دا چي هغه به کومي خواته ځي، دا په موږ پوري مربوطیږي.«
انځور: epd/O. Dietze
فرانک والټر شټاین مایر دا هم وویل، چي د کرونا ویروس د پراخیدو د مخنیوي په خاطر لازمه ده، چي «زموږ په ورځني عادي او کاري ژوندانه کي په عاجل ډول سره محدودیتونه رامنځته سي. د کرونا ویروس له وجي زموږ دیموکراسي د یوه داسي سخت چلنج سره مخامخ ده، چي زموږ نسل هیڅ نه وه مشاهده کړې.» شټاین مایر اضافه کړه: «لیبراله ټولني د فردي ژوندانه او ازاد تگ راتگ سره عادت سوي دي او دقیقأ په همدغو ساحو کي به اوس د مؤقت وخت لپاره محدودیتونه رامنځته سي، ترڅو نور په نظر کی ونیسو او په خطر کي یې وا نه چوو.»
د شټاین مایر په خبره کرونا د دې سره هم کومک کوي، چي احتیاط کول زده کړو او د نورو مراعت وکړو. همدغه د «همبستگۍ او یووالي تجربې د داسي یوه بحران پر وخت، چي موږ پخوا هیڅ وخت نه یو ورسره مخامخ سوي، کولای سي زموږ ټولنه نوره هم تقویه کړي.«
کومو شرکتونو د کرونا ویروس په سبب ګټه کړې؟
د کرونا ویروس ویرې اقصتادي بازارونه اغیزمن کړي. که څه هم دغه وبا په تیزۍ سره مخ پر خپریدو او نړیوالو بازارونو ته یې سخت تاوان اړولی دی، خو بیا هم ځینې شرکتونه د ګټې په حال کې دي.
انځور: picture-alliance/B. Kammerer
انتظار او نېټفلېکس کې د فلمونو لیدل
په آنلان بڼه د ویډیوګانو ښوولو پلېټ فارم نېټفلېکس په تیره اوونۍ کې ښه کاروبار کړی دی. د دې علت دا دی چې ورځ تر بلې خلکو ته ویل کیږي چې د کرونا ویروس د خطر له کبله په کورونو کې پاتې شي او خلک بیا د دغه فلېټ فارم له لارې سریالونه او فلمونه تعقیبوي.
انځور: picture-alliance/AA/M.E. Yildirim
د کور په سالون کې ورزش
د پېلټن انټراکتیف، فټنس شرکت چې د ورزش یا تمرین کولو بایسکلونه جوړوي او په آنلاین بڼه ورزشي تمرینونه هم وړاندې کوي، د ونډو ورځنۍ بیې لوړې شوي. دغه بیې له دې وړاندوینې وروسته لوړې شوي چې د سپورت شوقیان به د کرونا ویروس د ویرې له کبله جیمونو ته نه ځي او د دې پر ځای به د پیلټن وزرشي بایسکلونو څخه استفاده کوي.
انځور: picture-alliance/AP Photo/M. Lennihan
د کرونا ویروس احتمالي میلیاردران
د مودرنا، په نوم د دواو جوړولو شرکت مشر ستیفن بېنسل (ښي اړخ ته) ښایي په نزدې وخت کې میلیاردر شي چې شرکت یې د کرونا ویروس له پاره واکسین جوړوي چې پر انسانانو وازمویل شي. دا کار د دې سبب شوی چې دغه شرکت د ونډو بیې لوړې شي. مالیزیایي وي چای (کیڼ اړخ ته) چې شرکت یې زیاتره د طبي دستکشو په جوړولو کې ونډه لري، د میلیاردرانو کلب ته د ننوتو په حال کې دی.
په آنلاین بڼه د کاروبار غوړیدل
امریکایي شرکت زوم ویډیو کمونیکیشن، چې د ویډیویي کنفرانس له لارې خدمات وړاندې کوي له فبرورۍ میاشتې راهیسې یې د ونډو بیه پنځوس سلنه لوړه شوې. د بیرن شتاین د تحقیق کوونکو د څیړنې له مخې کله چې خلک د کرونا ویروس د وبا د خطر له کبله له کورونو څخه کار کوي نو دا د کاروبار له پاره ښه دی. دغه شرکت د ټول ۲۰۱۹م کال په پرتله په روان میلادي کال کې زیات فعاله مشتریان راخپل کړي دي.