د افغانستان په چارو کې د پاکستان پخواني استازي آصف دراني د چهارشنبې په ورځ افغان طالبانو ته خبرداری ورکړ چې پر ضد ېې د ملګرو ملتونو د امنیت شورا پرېکړه ليکونه لا هم پرانیستي دي.

هغه د خپلې اکس شبکې پر حساب لیکلي: «د طالبانو رژیم ته یو دوستانه نصیحت: د طالبانو پر وړاندې د ملګرو ملتونو د امنیت شورا پریکړه لیکونه لا هم خلاص دي؛ کېدای شي چې هغوی د بشري حقونو د نقض او تروریزم څخه د ملاتړ په دلیل تر قانوني تعقیب لاندې راشي.» 

پر افغانستان د طالبانو د حاکمیت له څلورو کلونو په تېرېدو تر اوسه د هغوی حکومت یوازې روسیې په رسمیت پېژندلی دی. نړېوالې ټولنې په دغه موده کې په کراتو له طالبانو غوښتي چې پر ښځو لګول شوي محدودیتونه لرې کړي، د بشر حقونو درناوی وکړي او په افغانستان کې تروریستي ډلو ته د فعالیت اجازه ورنکړي.

په پاکستان کې د ناامنيو پېښو په ډیرېدو سره د دغه هېواد چارواکي پر افغانستان حاکمو طالبانو باندې تور لګوي چې هغو وسله والو ته چې په پاکستان کې حملې کوي، پناه ورکوي. خو په کابل کې د طالبانو اداره دغه تورونه ردوي او وايي چې د افغانستان له خاورې د هېڅ هېواد پر ضد استفاده نه کيږي.

د کابل او اسلام آباد ترمنځ د ننګونو ډکې اړیکې

 دغه خبرداری داسې وخت شوی چې د کابل او اسلام آباد ترمنځ اړيکې د ګډې پولې په اوږدو کې د دواړو لورو د امنيتي ځواکونو تر منځ تر خونړیو حملو وروسته ډېرې خرابې شوي او په استانبول کې ېې د اوږدمهاله اوربند له پاره مذاکرات هم له کومې پایلې پرته پای ته ورسېدل.

په تر ټولو تازه مورد کې طالبانو د سه شنبنې په ورځ ادعا وکړه چې پاکستان د افغانستان پر شرقي ولایتونو پکتيکا، خوست او کونړ کې هوايي بریدونه کړي دي.

د طالبانو په خبره په دغو بریدونو کې یو ېې په خوست ولایت کې د هستوګنې پر یو کور شوی چې په کې۹ ماشومان او یوه ښځه وژل شوي دي.

د پاکستان پوځ د افغانستان په درو شرقي ولایتونو کې بریدونه رد کړي خو په خوست کې ځايي اوسېدونکو تائید کړي دي او وايي چې پر یوه کور شوي هوايي برید کې ۱۰ کسان وژل شوي دي.

د طالبانو د ادارې ویاند ذبیح الله مجاهد د دغو بریدونو په غبرگون کې د ایکس پر پاڼه ولیکل: «د پاکستاني پوځيانو له خوا د افغانستان د پکتيکا، خوست او کونړ په ولايتونو کې د تېرې شپې هوايي بريدونه د افغانستان د حريم نقض او د پاکستانۍ ادارې له خوا له ټولو منلو سویو نړيوالو نورمونو سره صريح ټکر دی.»