طالبانو د قطر ځواکونو خبر رد کړ
۱۴۰۱ فروردین ۱۸, پنجشنبه![Afghanistan Erster ziviler Evakuierungsflug seit US-Abzug aus Kabul gestartet](https://static.dw.com/image/59135976_800.webp)
دغه ويډيو چي بي بي سي فارسي خپره کړې ده، پکې لیدل کېږي، چې په تور نظامي یونیفورم کې وسله په لاس سرتېري د یوې ودانۍ مخې ته ګوته په ماشه روان دي.
په دې لنډه ۱۷ ثانیهيي ویډیويي کلیپ کې ښکاري چې په شخصي لباس کې څو افغانان د دوی نندارې ته ولاړ دي.
د طالبانو د حکومت د اطلاعاتو او کلتور وزارت مرستیال او د حکومت ویاند ذبيح الله مجاهد رد کړه چې ګنې تازه دې قطري ځواکونه د کابل په هوايي ډګر کې مېشت شوي وي.
هغه وايي، د کابل هوايي ډګر امنیت طالبانو نیولی او اړتیا نه ویني چې په دې برخه کې دې دوی له کوم هيواده مرسته وغواړي: «د کابل هوايي ډګر ټول امنیت د اسلامي امارت ځواکونو په لاس کې دی او چا ته اړتیا نه لیدل کېږي، چې دلته موږ ته امنیت ساتلو ته راشي.»
د ترانسپورت او هوايي چلن ادارې ویاند امام الدین احمدي هم دویچه ویله ته هغه رپوټونه رد کړل چې ګنې تازه دې د قطري پوځ کومه ډله د کابل هوايي ډګر ته ورغلې وي.
هغه وویل هوايي چلن ادارې د بېړنیو مرستو له پاره په هوايي ډګر کې روزلې او ویډیو هم له هماغې ډلګۍ اخستل شوې ده.
د کابل په هوايي ډګر کې یوه مامور د نوم نه خپرولو په شرط دویچه ویله ته وویل، په دې میدان کې د سقوط له ورځو تر اوسه شاوخوا درې سوه قطري سرتیري پاتې دي او هوايي ډګر د ترمینل په برخه کې دنده لري.
دې سرچینې وویل، د تازه راغلیو سرتېرو په اړه مالومات نه لري. خو ذبېح الله مجاهد بیا په هوايي ډګر کې د قطري ځواکونو شتون نه مني.
په کابل هوايي ډګر کې د تېر نظام نه پاتې یو سرتېري هم د نوم نه ښودلو په شرط وویل، هوايي ډګر ته د تازه ورغلو قطري ځواکونو په اړه معلومات نه لري؛ خو د دغه هيواد پوځیان په هوايي ډګر کې له پخوا شته او که کوم وخت ورته نور راځي، نو څوک پرې نه خبرېږي.
هغه وویل: «دوی په هماغه خپل ځای کې دي. شمېر یې راته نه دی معلوم، خو که نوي ورته راځي هم، څوک پرې نه خبرېږي.»
امید دیدار