په خبرپاڼه کي زياته سوې ده چي «دغه پروژې بايد د اسلامي امارت له تگ لارې سره مطابقت» ولري. خو دا روښانه سوې نه ده چي څه ډول مطابقت.
دوی پر خپلو ټولو جنگياليو ږغ کړی دئ، چي د دغه شان پروژو په ساتنه کي مرسته وکړي. طالبانو تر اوسه پوري په جنگونو کي دغه شان ډېري پروژې له خطر سره مخامخ کړي يا ئې ويجاړي کړي دي.
د بېلگې په توگه همدا اوس کندهار ولايت برېښنا نه لري او دليل ئې په هلمند ولايت کي د طالبانو له خوا د مزو پريکول ښوول کيږي. کندهار او هلمند ته له کجکي بنده د بريښنا نه رسېدلو يوازنی علت وسله وال طالبان ښوول کيږي.
طالبانو تر دې دمخه هم دغه شان خبري کړي وې. اوس داسي ويل کيږي چي د وسله والو طالبانو ترمنځ د دغه غورځنگ د راتلونکو موخو په اړه بحثونه روان دي. د روان کال په اکتوبر مياشت کي سيد محمد طيب آغا چي مخکي په قطر کي د طالبانو استازی وو، طالب مشرانو ته داسي يو ليک ولېږه چي پکښې د دوی په دريځ کي د اصلاحاتو راوستلو خبره سوې وه.
په دغه ليک کي راغلي ول چي «د طالبانو له غورځنگه اوس نفرت کيږي». پر نورو سربيره هغه غوښتنه کړې وه چي نور هغه وگړي مه وژني چي د هيواد په بيا جوړونه کي مرسته کوي.
د بريتانيا «گاردين» ورځپاڼي د سه شنبې په ورځ د طالبانو د يوه پخواني قوماندان رحمت الله کاکازاده په حواله ليکلي دي چي په روان کال کي په افغانستان کي د ملکي تلفاتو د ډېرېدو له وجي طالبانو ډېري لږ پيسې ترلاسه کړي دي.
نور مطالب:
انځورونه: آلمان او ایټالیا د بامیان د غلغله ښار بیا رغوي
د بامیان د غلغله، ښار د لوړو او مضبوطو دیوالونه پاتې شوني چې په روغني رنگونو د پخوانۍ زمانې د شهکاریو نقاشۍ پرې شوي دي د یوه آلماني سازمان او د ایټالیې هیواد په مالي مرسته بیا رغول کیږي.
انځور: DW/N.Behzad
که څه هم ویل کیږي چې په لومړي سر کې غلغله، د دې ښار نوم نه وو، او وروسته له هغې چې د چنگیز خان تر واکمنې لاندې مغلو، دغه ښار ویجاړ کړ نو د غلغله، په نوم ونومول شو.
د بامیان ولایت د اطلاعاتو او کلتور رئیس کبیر دادرس وايي چې د غلغله ښار مهمې برخې رغول شوي دي او نورې برخې به یې په راتلونکي کال کې ورغول شي.
انځور: DW/N. Behzad
د ښاغلي دادرس په وینا د غلغله ښار پاتې شوني، چې په کې لوی برجونه، گنبدې او ستر دیوالونه شامل دي بیا رغول کیږي. همداشان دغه ښار ته د ډیرو سیلانیانو د ورجذبیدو هڅې هم ادامه لري.
انځور: DW/N. Behzad
ویل کیږي چې د غلغله ښار ارگ، د بودایی عقیدی له دورې وروسته، د اسلام مرکز وو او د چنگیز تر یرغل او عام قتل وروسته دغه ښار د غوغا او یا د غلغله په نوم ونومول شو.