د طالبانو سترې محکمې نن چهارشنبه خبر ورکړ، چې په هلمند کې یې څلورو کسانو ته سزا ورکړې ده. د سترې محکمې په خبر کې راغلي دي، چې دغه کسان «د لواطت، غلا او نامشروع اړیکو» په تور د ځايي چارواکو او عامو خلکو په حضور کې په درو وهل شوي دي. طالبانو پرون چهارشنبه هم میدان وردګ ولایت کې د دوو مېرمنو په ګډون ۱۰ کسان په درو ووهل.

په دې وروستیو کې طالبانو د دوی په وینا »په بېلابېلو جرمونو تورنو کسانو« ته د دغه شان سزا ورکول زیات کړي دي. دغه راز طالبانو په غزني ولایت کې دوه او جوزجان کې یو کس «قصاص» کړي دي.

پر افغانستان د طالبانو له بیا واکمنېدو وروسته د دغې ډلې مشر ملا هیبت الله اخونزاده د خپلې ادارې قاضیانو ته امر کړی دی، چې«حدود او قصاص» دې په عام محضر کي عملي کړي دي. د طالبانو ادارې محکمو تر دې دمه په بېلابېلو جرمونو تورن لسګونه کسان د خلکو په مخ کې په درو وهلي او پر پنځو کسانو یې د «قصاص حکم» عملي کړی دی.

نړیوالې ټولنې او د حقوقي چارو کارپوهانو مدافع وکیل او قانوني محاکمې ته له لاسرسي پرته د تورنو کسانو دا وړ مجازات غندلی او دا یې د بشري حقونو خلاف کړنه ګنلې ده. ملګرو ملتونو په وروستیو کې له طالبانو غوښتي دي چې دا وړ اعدامونه بند کړي او اروپايي ټولنې بیا دا اعدامونه «په سختو ټکو» غندلي دي. د دغې ټولنې استازي دا اعدامونه «سپکوونکي او د انساني ارزښتونو خلاف» بللي دي. 

خو طالبانو دغو غبرګونو ته پام نه دی کړی او د خپل رهبر د فرمان مطابق په عام محضر کې د تورنو کسانو په درو وهل او قصاص اجرا کوي.