افغانستان کې د طالبانو ادارې ویلي، چې خوست ولایت کې  پاکستاني  پوځ پر خبریالانو ډزې کړي، چې له امله یې د پکتیا د ملي ټلوېزیون خبریال عبدالغفور عابد وژل شوی دی. چارواکو ویلي، یاد خبریالان له پکتیا څخه د خوست ځاځي میدان ته د رپوټ جوړونې له پاره تللي وو.

د خوست ولایت د والي ویاند مستغفر ګربز دویچه ویله ته وویل، دغه خبریال تېره ورځ له پکتیا څخه د خوست ځاځي میدان ته د رپوټ جوړونې له پاره تللی و، چې د پاکستاني پوځ ډزو کې وژل شوی دی. که څه هم له وژل شوي خبریال سره یې د بل همکار تواب ارمان د ټپي کېدو رپوټونه هم شته؛ خو مستغفر ګربز یې په اړه یوازې همدومره وویل:« چې هغه ښايي سطحي زخمي وي.»

له خوست ولایت څخه یوې سرچینې بیا د نوم نه خپرولو په شرط دویچه ویله ته وویل، چې د خبریالانو په دغې ډلګۍ ځاځي میدان کې مخامخ برید شوی، چې د خبریال عبدالغفور د وژل کېدو سربېره تواب ارمان، د دوی موټر چلوونکی او یو بل کس هم ټپي شوي دي؛ خو تر اوسه د دغو کسانو د ټپي کېدو په اړه  طالب  چارواکیو څه نه دي ویلي.

له نیږدې یوې اونۍ راهیسې د طالبانو او پاکستان تر منځ د پولې په اوږدو کې وقفه‌يي جګړې روانې دي، چې دواړه لوري پکې یو بل ته د مرګ، ژوبلې او مالي زیانونو اړولو ادعاوې کوي.

نن سهار هم د کندهار سپین بولدک کې جګړه شوې، چې پکې د ۱۵ ملکیانو د وژل کېدو او له سلو د ډېرو د ټپي کېدو پخلی شوی دی.