د عراق د پوځ په وینا یو لرغونی ښار چې د آشوري اثارو له پاره شهرت لري، د داعش له منگولو آزاد کړی دی. تندلارې ډلې «اسلامي دولت»په ۲۰۱۵م کال کې د نمرود ښار ډیر آثار ویجاړ کړل چې د یونیسکو په وینا په جنگي جرمونو کې راځي.
انځور: picture-alliance/Heritage Images
اعلان
د عراق د گډو عملیاتو د قوماندې مرکز، په یوه بیانیه کې ویلي دي چې د دغه هیواد پوځ د یکشنبې په ورځ د نمرود لرغونی تاریخي ښار له تندلارې ډلې «اسلامي دولت» یا داعش څخه بیرته نیولی دی او د داعش د ریښې ایستلو په مبارزه کې یې بله بریا تر لاسه کړې ده.
په موصل کې د حکومتي عملیاتو قوماندان عبدالامیر رشید، ویلي دي چې د نهمې زغروالې لوا، ځواکونو په بشپړه توگه د نمرود ښار نیولی دی او پر ودانیو یې د عراق بیرغ پورته کړی دی. دغه قوماندان د عملیاتو په هکله د نورو جزئیاتو په وړاندې کولو سره وویل چې ځواکونو دښمن ته تلفات او مالي زیانونه اړولي دي.
دا په داسې حال کې ده چې د عراقي پوځ یو شمیر افسرانو خبري آژانسونو ته ویلي دي چې ځواکونه لا هم په سیمه کې د داعش د جنگیالیو او چاودیدونکو توکو د له منځه وړلو په لټه کې دي.
داعش تندلارې ډلې په ۲۰۱۴م کال کې له تاوتریخوالي ډکه جگړه کې دغه لرغونی تاریخي ښار نیولی وو چې په دې سره یې په عراق او سوریه کې ډیره سیمه تر خپل کنترول لاندې راوستلې.
په ۲۰۱۵م کال کې داعش د انترنيټ له لاري یوه داسي ویډیو خپره کړه چې پکښې ښوول کېدل چې د دغې ډلې جنگیالي د څټکو او چاودیدونکو توکو په واسطه لرغوني آثار له منځه وړي.
د ملگرو ملتونو علمي، فرهنگي او تربیتي سازمان یا یونیسکو، د تندلاري ډلې دغه اقدام د «جنگي جرم» په توگه یاد کړی وو.
د سوريې حکومت له داعش څخه د پالميرا ښار تر نيولو وروسته، د دغه ښار د بيا رغاولو ژمنه کړې ده. د لومړیو ارزونو له مخي کارپوهانو ويلي دي چي دغه ښار په هغه اندازه تخريب سوی نه ده لکه اټکل چي ئې کېدی.
انځور: picture-alliance/dpa/C. Melzer
پالميرا ښار
د سوريې پوځ د يکشنبې په ورځ په دې وتوانېد چي تر سختو جگړو وروسته د پالميرا ښار څو دروازې له داعش څخه ونيسي. له داعش څخه تر نيولو وروسته د پالميرا ښار انځورونه.
انځور: Reuters/Sana
پر پالميرا ښار جگړه کي ۵۸۰ عسکر او جنگيالي وژل سوي
د سوريې پوځ د مارچ مياشت له ۲۰ نېټې راهيسي د روسيې د هوايي ځواک په مرسته يرغلونه پيل کړل. ويل کيږي چي په دغه جنگ کي ۴۰۰ کسان د داعش جنگيالي او ۱۸۰ عسکر وژل سوي دي. د پالميرا تر نيولو وروسته د سوريې پوځ د يوه عسکر انځور.
انځور: picture-alliance/dpa/V.Sharifulin
پالميرا
د ايران حکومت اسد ته د دغه ښار د نولو تبريکي ورکړې او ويلي ئې دي چي ملاتړ ته به ئې دوام ورکړي. د پالميرا ښار تر نيولو وروسته د هغه يو انځور.
انځور: picture alliance/dpa/TASS/V. Sharifulin
پالميرا تاريخي ښار
پالميرا ښار د دمشق په شمال کي واقع دی او د يونسکو د نړيوالو ميراثونو په ليست کي دی. د داعش تر نيولو وروسته په دغه ښار کي ډېر ارزښمن تاريخي اثار موجود ول. د پالميرا ښار تر نيولو وروسته يو انځور.
انځور: picture-alliance/Robert Harding World Imagery/C. Rennie
په دغه ښار کي شامين-بعل معبد يو ډېر تارخي ځای وو چي داعش ونړاوه. دغه معبد له دوو زرو کلونو راهيسي خوندي پاته وو او په منځي ختيځ کي يو له مهمو معابدو څخه وو. د داعش له خوا د دغه معبد تر نړولو دمخه د هغه انځور.
