د متحده عربي اماراتو د کډوالو په (Emirates Humanitarian City) کمپ کې پراته افغانان، چې اوس مهال یې شمېر شاوخوا درې زره دی وايي، له یو کال ډېره موده وشوه چې په دغه پنډغالي کې بې برخلیکه پراته دي او کوم هېواد ته د وړلو ډاډ یې نه دی تر لاسه کړی.

دغه افغانان چې په افغانستان کې د ۲۰۲۱م کال په اګست کې له افغانستان څخه ایستل شوي دي.

په دغه ډله کې داسې کسان هم شته چې د کورنۍ غړي یې امریکا او نورو هيوادونو ته رسېدلي، خو دوی بې برخلیکه پاتې دي. د دوشنبې په ورځ په دغه پنډغالي کې اوسېدونکیو افغانانو لاریون کړی او د خپل برخلیک د معلومولو غوښتنه یې کړې ده.

امريکا د افغانانو د انتقال پر پاليسۍ له سره کتنه کوي

د کونړ ولایت یو اوسېدونکي سباوون حمیدزی چې له تېر څه باندې یوه کال راهیسې هلته اوسېږي وايي چې هر ځل امریکايي او د عربي اماراتو چارواکي ډاډ ورکوي چې ژر به یې له دغې کمپه امریکا ته ولېږدوي، خو دغه ژمنې هم همداسې ژمنې پاتې شوي دي.

نوموړي وویل: «دلته پراته ټول مهاجر بې برخلیکه دي. د چا یو کال وشو، د چا څوارلس میاشتې، ټول بې برخلیکه دي. هر ځل ژمنې کېږي، خو عملي کېږي نه. دلته داسې کسان هم شته چې د کورنۍ غړي یې امریکا ته رسېدلي دي. د چا کورنۍ افغانستان کې په بد حال کې دي.»

نوموړي وویل، نن سې‌ شنبه یې لاریون ته د اماراتو د شیخ د دفتر رئیس او د امریکا د سفیر استازی ورغلي ول او ژمنه یې ورسره وکړه چې په راتلونکیو درېو اونیو کې به ښه خبر ورکړي، نو له همدې امله یې د نن له پاره لاریون وځنډاوه.

هغه وویل، که په دریو اونیو کې دوی له دغه پنډغالي ونه لېږدول شي، نو لوی لاریونونه به پیل کړي.

ایران افغان کډوال په زوره باسي خو سوداګرو ته بیا د تابعیت اسناد ورکوي

په دغه پنډغالي کې یو بل افغان کډوال جاوید افغان دویچه ویله ته وویل چې له تېرو دریو میاشتو راهیسې له عرب او امریکايي چارواکیو سره ناستې کويږ خو تر اوسه یې کوم مثبت خبر نه دی تر لاسه کړی. دی وايي، یو کال وشو چې په دغه پنډغالي کې اوسي، خو تر اوسه همداسې بې برخلیکه دي او څوک یې غږ نه اوري.

نوموړي وویل: «هر ځل له دوی سره کښېنو؛ خبرې کوو، خو نتیجې ته نه رسېږو. کوم مثبت خبر نه شته، بې برخلیکه یوو. هر څومره ژر چې کېږي، موږ باید له دې ځایه وویستل شو. خو تر اوسه کوم ځواب نه شته، اګست میاشت یې یاده کړې وه، هغه هم تېره شوه.»

جاوید افغان وايي چې اوس نه وطن ته ګرځېدلی شي او نه هم امریکا د دوی غږ اوري، دوی او کوچنیان یې له یوه «سخت» رواني حالت تېرېږي او باید ژر له دغه کمپه و ایستل شي.

وړاندې هم داسې راپورونه ورکړل شوي وو، چې په عربي اماراتو کې د افغان کډوالو په پنډغالي کې میشت افغانان په رواني ناروغیو اخته شوي دي.

دغو افغانانو څو میاشتې مخکې هم پراخ لاریونونه کړي وو. موده وړاندې له دغه کمپه امریکا ته د افغانانو د انتقال پروسه پیل شوې وه، خو هلته د مېشتو افغانانو د معلوماتو له مخې، اوس هغه پروسه بنده شوې ده.

د رویټرز خبري اژانس د تېر اګست میاشتې د یوه راپور پر بنسټ، هغه مهال امریکايي چارواکو ویلي ول چې د ډېرو افغانانو دوسیې پېچلي دي. د امریکايي چارواکیو تر مخه، د ځینو افغانانو دوسیې پېچلي دي او له ایستلو وړاندې ارزونې ته اړتیا لري.

عربي امارات: افغانانو د خپل نامعلوم راتلونکي په اړه لاريون کړی

متحده عربي امارت هم لکه د نورو خلیجي هيوادونو په څېر کډوال نه مني. مدافع وکیلانو ویلي دي چې په عربي اماراتو کې تر ډېره هغه افغانان دي چې د جګړې پر مهال یې په افغانستان کې د امریکا له پوځ، ایتلافي ملګرو او نورو بهرنیو مرستندویه ډلو سره کار کاوه.

له بل پلوه، د پاکستان پلازمېنې اسلام اباد په ګډون ځینو نورو ښارونو کې ډېر افغانان له شاوخوا یوه کال راهیسې د امریکا او نورو بهرنیو هېوادونو ویزو ته په تمه دي، خو تر اوسه ورته ویزې نه دي ورکړل شوي. هلته په اسلام اباد کې هم افغانانو څو ځل لاریونونه کړي او د خپل اوسني بې‌ برخلیکه حالت څخه یې سر ټکولی دی.

زموږ له آرشیف څخه: