فرانسه: د يوه مسجد مخکې ډزو دوه تنه ټپيان کړي
۱۳۹۸ تیر ۷, جمعه![Frankreich Schüsse vor Moschee in Brest](https://static.dw.com/image/49384327_800.webp)
د فرانسې په برېست ښار کې يوه سړي پر دوو تنو ډزې کړي او هغه يې ټپيان کړي دي. دغه کس له پېښې وروسته په خپل موټر کې تښتېدلی دی. يو ساعت وروسته بيا د شکمن عامل مړی وموندل شو. هغه د پوليسو د يوه وياند په خبره ځان په سر کې ويشتلی او وژلی دی. په برېست ښار کې د رامنځته شوې دغې پېښې انګيزه لا معلومه شوې نه ده.
د عبادتځايونو زيات حفاظت
د پلازمېنې پاريس د څارنوالۍ د تروريزم ضد کارپوهان دغه قضيه پلټي. د فرانسې د کورنيو چارو وزير کريستوف کستانې، له دغې پېښې وروسته امر وکړ چې په ټول هېواد کې دې عبادتځايونه په زيات ډول وڅارل او حفظ کړای شي.
دواړه ټپي شوي کسان روغتون ته لېږدول شوي دي. داسې ويل کيږي چې ژوند ته يې خطر نور نه شته. د رسنيو په حواله ښايي د ټپي شویو کسانو په ډله کې د ياد مسجد امام هم شامل وي.
د جومات امام په انترنېټ کې، په تېره د يوټيوب په صفحه کې ډېر شهرت او په سلګونو زره پلويان لري. د هغه ويډيوګانې ناندريزې هم دي. په ځينو رپوټونو کې داسې هم ويل شوي دي چې نوموړی په تېر وخت کې د دولتي ادارو له خوا هم تر تعقيب لاندې وو.
(ns/ms (dpa, afp