د فرانسې د «تولوز» ښار په شمال کي د یوه پله د نړیدو په ترڅ کي لږ تر لږه دوه موټرونه یوه سیند ته ورلویدلي او ډیر کسان پکښي زخمیان سوي دي. د اطفاییې یوه ویاند نن دوشنبه سهار(د نومبر میاشتي ۱۸ نیټه) بي ايم اف ټلویزوني چینل ته ویلي چي «پُل کاملاً نړیدلی دی. موږ په اطمیان سره دومره پوهیږو چي دوه موټرونه اوبو ته لویدلي او دریم هم لیدل سوی دی.» د هغوی په حواله په دې کي لږتر لږه نهه انسانان ټپيان سوي دي، چي دوه یې ډیر سخت دي.
اطفاييه په چټکۍ سره د نورو قربانیانو په لټه کي ده ځکه چي پر پله باندي ډیر موټرونه په حرکت کي ول. د پیښې په ځای کي اوس د اطفایې تقریبأ ۸۰ موټرونه او دوه هلیکوپترونه په فعالیت باندي بوخت دي.
فرانسوي رسنیو بیا د یوه تن د وژل کیدو او ډیرو ورکو سوو کسانو خبر ورکړی دی. د یوې فرانسوۍ ورځپاڼي په حواله دغه پيښه نن سهار د اتو څخه د اته نیمو بجو په شاوخوا کي رامنځته سوې ده. هغوی دا هم ویلي چي یوه لارۍ په دغه وخت کي پر پله باندي په حرکت کي وه، چي تر ورکړل سوي اجازې ډیره درنه وه. د پل د نړیدو پر وخت درانه ږغونه راپورته سول او اوسیدونکي یې سخت وارخطأ کړل.
د نړۍ تر ټولو خطرناکه پلونه
د تګ راتګ د آسانۍ له پاره پلونه د نړۍ په هره سیمه کې موجود دي، خو په دې انځوریز رپوټ کې تاسي داسي پلونه وينئ چې تیریدل ترينه لوی زړه غواړي.
انځور: Imago/D. Delimontد کوستاریکا په مونتینیګرو ځنګل کې لرګين کیبلي پول په څو ځایونو کې د ماتیدو له امله ډیر خطرناک ګڼل کیږي. پر دې پله د تیریدو پرمهال لږ بې احتیاطي، سړی ډیري ژورې کندي ته غورځولی شي.
په روسيه کې د کولیما پر سيند له لرګو څخه جوړ ۱،۸۷۰ فوټه اوږد پول له تیرو دریو لسیزو راهیسې پاملرنې ته منظر دی. ډیر لږ خلک پر دې پله تیریدو ته زړه ښه کوي.
د سايبیریا په تر ټولو لوړه غرنۍ سیمه کې پر Katun سیند باندي پر لرګين پول تیریدل یو له خطره ډک، خو شاید هم یوه نه حیریدونکې خاطره وي.
په جاپان کې د Eshima ohashi پول د جوړیدو چارې په ۱۹۹۷م کال کې پیل او په ۲۰۰۴ کال کې بشپړې شوې.دا د جاپان لومړی او د نړۍ دریم لوی داسی پول دی چې حرکت نه لري۔
په فلوريدا ایالت کې د Sunshine skyway پول ټول ټال ۸۸۵۱ متره اوږدوالی او ۵۸،۸ متره لوړوالی لري. له دغه پله څخه ډيرو کسانو ځانونه هم غورځولي دي، نو له همدې امله پر دې پله تیریدونکي موټر مکلف دي چې د تیریدو پر مهال کرار تیر شي.
د امریکا متحدو ایالاتو د Lake Pontchartrain Causeway پول نوم په ۱۹۶۹م کال کې د نړیوالو ریکارډونو په کتاب ګنیز کې په نړۍ کې د اوبو پر سر د تر ټولو لوی پله په توګه ثبت شو.
په فلوريدا ایالت کې د Seven Mile Bridge په نوم دوه پلونه موجود دي. یو پول د بايسکل چلونکو او پلی کسانو له پاره دی، په داسې حال کې چې دویم یې نسبتاً نوی او د موټرو له پاره ځانګړی شوی دی. دا د نړۍ یو له اوږدو پلونو څخه شمیرل کیږي.
په شمالي ايرلنډ کې د Carrick-a-Rede Rope Bridge، د پړو په وسیله اوبدل شوی لرزانه پول دی. له دې پول څخه تیریدونکي هر انسان (هغه چې له خطرونو سره له لوبیدو خوند اخلي) هم په زړه لاس ږدي او بیا له دې پول څخه تیریږي.
د Mount Tittleys په واورو پوښل شوي غرونو کې د سمندر له سطحې څخه په ۱۰ زره فوته لوړوالي کې جوړ د Titlis Cliff Walk کیبلي پول، هغه پول دی چې د اروپا په کچه تر ټولو په لوړوالي کې جوړ شوی دی. دا د نړۍ تر ټولو ویرونکی پول هم ګڼل کیږي.
