د فرانسې په شمال کي په يو بار کي اورلګېدنې لږ تر لږه ۱۳ انسانان وژلي دي. وژل سوي اکثره کسان ځوانان دي.
انځور: Getty Images/AFP/M. Alexandre
اعلان
د فرانسې د پوليسو په وينا د اورلګېدني دغه پېښه په داسي حال کي رامنځ ته سوې، چي د دغه بار په زيرخانه کي د ږېږېدني د کليزي مېلمستيا روانه وه.
زياته سوې چي د شمالي فرانسې په غوئن نومي ښار کي د دغي پيښي له کبله ۶ انسانان سخت ژوبل سوي هم دي. دا معلومات د پوليسو يوې وياندي د شنبې په سهار (د ۲۰۱۶ کال د اګست ۶مه نېټه) ورکړل.
پلټونکي اټکل کوي چي د اورلګېدني دغه پېښه به د حادثې په نتيجه کي رامنځ ته سوې وي. د کوبا ليبرې بار په نوم دغه ځای کي د شپې په منځ کي د اورلګېدني اصلي لاملونه لا تر اوسه نه دي څرګند.
بعضو رسنيو په لومړي سر کي داسي راپورونه هم ورکړي ول، چي هلته چاودنه سوې ده. خو د پوليسو وياندي ويلي دي چي په دغه پيښه کي هيڅ کومه چاودنه نه ده سوې.
د وژل سوو کسانو هويت تر اوسه نه دی څرګند، خو په هکله يي ويل کيږي چي عمرونه يې د ۱۸ او ۲۵ کلونو تر منځ دي. د يادي ورځپاڼي د راپور له مخي دغه ځوانان د يوې کليزي د لمانځلو له پاره د شرابخانې يا بار په دغه لاندني منزل کي سره راټول سوي ول. ويل سوي چي اور هغه وخت بل سو، کله چي مېلمنو هڅه کوله چي پر کيک ولاړ شمان ولګوي.
د اوروژني کارونو د سهار تر ۳ بجو پوري وخت ونيوی. د فرانسې د کورنيو چارو د وزارت په وينا د اور وژني په کارونو کي ۵۰ چارواکي پر ځای حاضر ول. وزارت د اوروژونکي عملې د کار ستاينه کړې ده. د کورنيو چارو وزير بېرنارد کازنيف ويلي چي د پيښي پلټني لا ادامه لري.
پر ورته موضوع یو انځوريز البوم زموږ له آرشيف څخه (06.10.2014):
په پاريس کي د موټرو نندارتون جذاب موټر
د موټرونو د نړۍ پسرلی په ژينيف کي پيليږي، خو د مني پېل يې په پاريس کي کيږي. په پاريس کي د موټرو سږنی نندارتون د اکتوبر پر ۱۹مه پيليږي او پکښي بېل شرکتونه خپل نوي موټر نندارې ته وړاندي کوي. غورچاڼ يې دلته ليدلای سئ.
انځور: AFP/Getty Images/E. Piermont
لوکس فرانسوی
په لومړي سر کي به د کوربه هيواد د سيتروين شرکت موټر وګورو. د DS په نوم د لوړي درجې موټرو د لړۍ دغه طرحه ډيواين نوميږي. د دغه موټر په بتيو کي کرسټال کار سوي او د ګېر بدلولو د آلې سر يې له مرمر ډبري څخه جوړ سوی دی.
انځور: Citreon
ځانګړي مواد
سيتروين په ۱۹۷۹م کال د پيژيو له خوا رانيول سو. خو دغه شرکت په تيرو کلونو کي زياتي اقتصادي لانجې درلودې او که د فرانسې دولت او د دونګ فېنګ په نوم چينايي شرکت له خوا ورسره مرسته نه وای سوې، ښايي اوس به ډيوالي وای. د نوي پېل له پاره د پيژيو اېکسالټ ماډل موټر په پام کي نيول سوی دی. دغه موټر هم په برېښنا او هم په تيلو چليږي او پکښي مثمره مواد کار سوي دي.
انځور: Peugeot
سر خلاصی آلمانی موټر
د آلمان د بايرن ايالت د موټر جوړولو شرکت BMW په پاريس کي د خپل ۲ ليټره لړۍ لومړی بهاري يا سرخلاصی ماډل معرفي کوي. د دغه موټر چت حتی هغه وخت هم بند يا خلاص سيږي چي موټر په يوه ساعت کي ۵۰ کيلومتره واټن وهي. ياد شرکت به د X6 خپل نوی ماډل هم معرفي کړي.
انځور: BMW
چټک آلمانی موټر
د دايملر شرکت مرسيډيس بينز څانګې په پاريس کي د AMG GT خپل ماډل په دوو بيلو طرحو کي نندارې ته وړاندي کړی دی. يوه طرحه ۴۶۲ هارس پاور او بله طرحه به ۵۱۰ هارس پاور قوي ماشين ولري. دغه موټر په يوه ساعت کي ۳۰۰ کلومتره واټن وهلای سي.
انځور: Daimler AG
سپورټي بريتانوی موټر
بريتانويان هم چټک او ښکلي موټر جوړولای سي. د دغي خبري د اثبات له پاره د استون مارتين شرکت په پاريس کي خپل V12 Vantage S. نندارې ته وړاندي کړی دی. دغه موټر چي ۵۷۳ هارس پاور لري حتی په يوه ساعت کي تر ۳۲۳ کيلومتره پوري واټن وهلای سي. خو دغه موټر په ۱۰۰ کلومترو کي ۱۴ ليتره پټرول مصرفوي.
انځور: Aston Martin
لوی فورد موټر
د فورد شرکت په پاريس کي خپل نوی Edge ماډل معرفي کړی دی. نوموړي شرکت کوچني موټر Kuga او Ecosport هم نندارې ته وړاندي کړی دی. خو دغه شرکت د آلمان د کولو په خپله فابريکه کي له کارګرو سره د چلن له کبله له نتقادونو سره مخامخ دی.
انځور: Ford Europe
سوېډنی چينايي موټر
د ولوو شرکت د XC 90 لړۍ خپل نوی ماډل نندارې ته وړاندي کړی دی. دغه شرکت له ۲۰۱۰م کال راهيسي د چين د ګيلي شرکت ملکيت دی. د څلورو کالو راهيسي دا د ولوو لومړی نوی ماډل دی چي نندارې ته يې وړاندي کوي. دغه څلور سلنډره موټر ۳۲۰ هارس پاور قوت لرونکی ماشين لري.
انځور: Volvo
هر اړخيزه المانی موټر
د آلمان فولکسواګون د Golf لړۍ خپل نوی ماډل نندارې ته وړاندي کړی دی. دغه موټر هم د کوڅو او هم د دښتونو له پاره طرحه سوی دی. نوموړی شرکت د ياد ماډل تر څنګ د Passat او د Touraeg نوي ماډلونه هم نندارې ته وړاندي کړي دي.
انځور: Volkswagen
هم کوچنی هم ارزانه
د SMART شرکت خپل نوی ماډل نندارې ته وړاندي کړی دی چي اوږدوالی يې صرف ۲،۶۹ متره دی. څوک چي دغه موټر ولري نو د ښار په ګڼه ګوڼه کي خامخا په آسانه سره د موټر درولو ځای پيدا کړي. د تيرو ماډلونو په پرتله د نوي ماډل بيه نه ده لوړه سوې او د ۱۱۰۰۰ يورو په شاوخوا کي دی.
انځور: Daimler
ذکي چيکی موټر
د سکوډا نوی فابيا ماډل هم تر سمارټ زيات ګران نه دی. دغه موټر تقريبا ۱۱۷۰۰ يورو قيمت لري. د فابيا دغه نوی او دريم ماډل په بشپړه توګه نوی طرحه سوی دی او د روان مېلادي کال له نوامبر څخه به خرڅلاو ته وړاندي سی. په دغه موټر کي د ذکي موبايل له پاره بېسيم آسانتيا او داخلي ټچ سکرين داخل کړل سوی دی.
انځور: Skoda
پخوانی شناخته موټر
د اوپل دغه موټر د کورزا نوی ماډل دی. ياد شرکت په پاريس کي د کورزا لړۍ پنځم ماډل نندارې ته وړاندي کوي چي په بشپړه توګه نوی طرحه سوی دی. اوپل غواړي چي د دغه ماډل په مرسته په اروپا کي بېرته خپل پخواني دويم مقام ته ځان ورسوي.