د فرانسې ولسمشر امانوئل ماکرون د کډوالو په چارو کې د ملګرو ملتونو له عالي کمیسار فیلیپو ګراندي سره د الیزې په ماڼۍ کې د لیدنې کتنې پر مهال وویل چې هیواد یې په پام کې لري چې له ترکیې، لیبنان، اردن، نیجر او چاد هیوادونو څخه۱۰ زره مهاجرو ومني.
البته دا به د بحراني هیوادونو مهاجر وي چې پورته ذکر شویو هیوادونو ته راغلي دي او د ملګرو ملتونو د مهاجرت سازمان په همکارۍ به فرانسې ته د راتګ اجازه ترلاسه کړي.
د دغه هیواد د کورنیو چارو وزیر ګرارد کولومب ویلي دي چې دغه مهاجر باید د ۲۰۱۹ م کال تر اکتوبر میاشتې پورې ومنل شي. په دې اساس فرانسه د مهاجرو په اړه هغه موافقتنامه عملي کوي چې په پاريس کې د مهاجرت په کنفرانس کې پرې موافقه شوې وه.
د اګست میاشتې په پای کې په دغه غونډه کې فرانسې او د اروپایې اتحادیې نورو غړو هیوادونو موافقه وکړه چې افریقایې مهاجرو ته به د اروپا پر لور نوې او قانوني لاره خلاصوي او په بدل کې به یې د مدیترانې له لارې اروپا ته د غیر قانوني مهاجرت مخه نیسي.
اروپایې کمیسیون د سپټمبر میاشتې په پای کې وړاندیز وکړ چې په راتلونکو دوو کلونو کې دي لږ تر لږه ۵۰ زره مهاجر له دریمو هیوادونو څخه «د مهاجرو د دوباره میشت کولو پروګرام» په چوکاټ کې اروپا ته راوستل شي. اوس فرانسې دغه هدف ته د نږدې کیدو په برخه کې لومړی ګام اخيستی دی.
په چاد او نیجر کې د مهاجرو مرکزونه
فرانسه غواړي په راتلونکو اونیو کې په نیجر او چاد افریقایې هیوادونو کې هم هلته پناغوښتونکي ثبت او د پناهندګۍ غوښتنلیکونه یې و ارزوي.
د دغه هیواد د کورنیو چارو وزیر کولومب په خبره له ټاکل شویو لسو زرو مهاجرو څخه باید ۳۰۰۰ یې په دغو دواړو هیوادونو کې انتخاب شي. د «اوفیرا» په نوم د فرانسې د مهاجرو چارو اداره او د ملګرو ملتونو د مهاجرت اداره (UNHCR) به په ګډه د دې بهیر د پر مخ بیولو له پاره کار وکړي.
د فرانسې ولسمشر د کډوالو په چارو کې د ملګرو ملتونو سازمان له کمیسار سره د ملاقات په ترڅ کې وویل چې د اقتصادي مهاجرو د هجوم د مخنیوي په سبب باید هغو کسانو ته چې غواړي خپل هیواد پریږدي او اورپا ته راشي، خو د پناهندګۍ چانس نه لري، د وضعیت په اړه بهتر معلومات ورکړل شي.
زموږ له ارشيف څخه:
له ځنګل کمپ څخه پاريس ته او بيا ...
د فرانسې په کاله کې پولیسو لخوا د «ځنګل» موقت کمپ له ورانيدو وروسته، په زرونو مهاجر پلازمينه پاریس راوړل شول. خو لا هم زیات شمير مهاجر غواړي بيرته کاله ته ولاړ شي تر څو له هغه ځایه بريتانيا ته تللي وي. انځور: Reuters/C. Platiau پاریس کې د مهاجرو د خيمو غورځول د فرانسې پولیسو د پاریس ښار د ستالينګراد ميترو ستيشن ته نژدې د پياده روونو پر سر د مهاجرو درول شوې خيمې او د خوب لپاره هوارې کړل شوې دوشکې او بیسترې ټولې کړې. د کالې کمپ له ورانيډو وروسته پاريس کې د مهاجرو شمير تر ۳۰۰۰ پورې لوړ شو.
انځور: Reuters/C. Platiau دا به د کمپ د پاک کارۍ وروستی ځل وي؟ مهاجرې ښځې په سړه هوا کې بسونو ته ولاړې دي تر څو یې د فرانسې ښار بلې سيمې ته د مهاجرو د پزيرش مرکز ته رسولي وي. په پاريس کې د مهاجرو کمپ په وروستيو مياشتو کې هم دوه ځله پاک کاري شوی وو. د پزيرش مرکزونه به په راتلونکې کې د موقتي کمپونو د جوړيدو مخنيوي وکړي.
انځور: Reuters/B. Tessier په زرونو هغه مهاجر چې د «ځنګل» کمپ تر ورانيدو وروسته د فرانسې پلازمينې پاریس ته راغلي، په دې هيله دي چې بيرته کالي ته ولاړ شي، تر څو له هغه ځايه بريتانيا ته تللي وي.
انځور: picture-alliance/dpa/Y. Valat د فرانسې حکومت لخوا په کالې کې د مهاجرو کمپ تر ويجاړيدو وروسته، یو شمير مهاجرو د پاريس ښار په کوڅو کې خپلې خيمې ودرولې. له همدې کبله اوس د فرانسې په کوڅو کې د مهاجرو شمير زیات شوی دی.
انځور: Reuters/C. Platiau کوم مهاجر چې تيرکال فرانسې ته رسيدلي ول، اکثره یې د افغانستان، عراق، اريتيريا او سوډان هيوادونو څخه دي. دوي غالباً هڅې کړي تر څو د لاريو او نوور وسايطو په ذريعه د بريتانيا پر لور وتښتي.
انځور: Reuters/P. Rossignol يوه ډله ځوان مهاجر په کاله کې «ځنګل» کمپ ته نژدې ولاړ دي. د اکتوبر میاشت په ۲۶ مه، کله چې پوليسو له کمپ څخه د شاوخوا ۱۰ زره مهاجرو د وښکلو کار پیل کړ، کمپ ميشتو په اعتراض کې اورونو بل کړل.
انځور: picture-alliance/dpa/E. Laurent مهاجر له کالې څخه د وتلو په حال کې د فرانسې د کالې په «ځنګل» نومې کمپ کې شاوخوا لس زره مهاجر په دې اميد ميشت ول چې بريتانيا ته به ځي. چارواکو د فرانسې نورو سيمو ته د دغو مهاجرو د انتقال پر وخت هڅې وکړې، تر څو يې د اعتراضاتو د پيښيدو څخه مخنيوی کړی وي.
انځور: picture-alliance/AP Photo/T. Camus دا په کاله کې د «ځنګل» کمپ یوه برخه ده. په دغه کمپ کې مهاجر په ناپاکه کانتينرونو او خيمو کې په بد حالت کې ژوند کاوه. دغو خيمو د باد او لمر په مقابل کې ډیر کم مقاومت لاره.
انځور: Reuters/P. Wojazer د فرانسې ولسمشر فرانسوا اولاند وویل چې نور به څوک پرې نښودل شي چې د کالې د مهاجرو په کمپ کې له سره میشت شي. د «ځنګل»کمپ په اروپا کې د مهاجرو د بحران د سمبول په توګه بدل شو.
انځور: Reuters/C. Platiau
