د المان په فرانکفورت ښار کې د ماین رود په ساحل کې یوه ښځه د چاقو په برید کې سخته ټپي شوې ده.
یوه ۱۹ کلن افغان د دوشنبې په ورځ د یوې اوکراينۍ ښځې چې د ماین رود په غاړه پر یوې بِنچ ډوله چوکۍ ناسته وه د شا له خوا برید کړی. د چاقو له څو ګذارونو وروسته ښځې تيښته کړې، خو لوېدلې ده او بریدګر پرې بیا حمله کړې او د چاقو ګذارونو ته یې دوام ورکړی دی.
د پولیسو په وینا بریدګر او هغه ښځه چې برید پرې شوی هیڅ آشنایي یې نه درلوده او بریدګر خپل قرباني په تصادفي ډول انتخاب کړی دی. د بریګر انګیزه لا مشخصه نه ده او په اړه یې څېړنې جریان لري. دغه ښځه د سر او اورمیږ په برخه کې وهل شوې ده.
کله چې ښځې پر خلکو د مرستې غږ کړی، خلک یې مرستې ته را رسیدلي او بریدګر تیښته کړې ده. پولیس د چورلکۍ په وسیله هغه تعقیب او بالاخره نیولی دی.
د پولیسو په وینا ښځه په سخت ټپي حالت کې روغتون ته انتقال شوې ده او د مرګ له خطره وتلې ده.
د پولیسو له خوا ورکړل شوو معلوماتو له مخې بریدګر جرمي سابقه نه لري او داسې نښې نښانې هم نه دي لیدل شوې چې ګوندې دغه کس دې افراطي تمایلات ولري.
This browser does not support the video element.
په لسو ورځو کې دویم برید پولیسو ویلي دي د عیني شاهدانو زړورتیا چې د ښځې مرستې ته یې ور دانګلي دي، د دې سبب شوې چې بریدګر تېښته وکړي. همدرانګه د پولیسو چټګ غبرګون هم د دې سبب شوی دی چې نور خلک وژغول شي.
دا په تیرو لسو ورځو کې په المان کې د چاقو په وسیله دویم برید دی. په هغه برید چې د جمعې په ورځ (د می میاشتې ۳۱ نیټه) د منهایم ښار په يوه میدان کې وشو، په ترڅ کې یې د یوه پولیس په ګډون شپږ کسان ټپيان شوي ول.
هغه پولیس چې په دغه برید کې سخت ټپي شوی وو، وروسته يې بيا د سختو ټپونو له امله په روغتون کي سا ورکړه.
د دې برید عامل یو افغان وو چې د پناه غوښتنه یې رد شوې وه او له یوې المانۍ ښځې سره یې واده کړی دی او موقتي ویزه یا اقامه لري.
له دې وروسته په المان کې له رد شوو مهاجرو سره د چلند په اړه بحثونو زور اخیستی دی. سربیره پر دې د مهاجرت په سیاست کې د تجدید نظر او د الماني ټولنې د امنیت له پاره د اسلامي افراطیت په هکله هم تاوده بحثونه روان دي.
آژانسونه: ش.ن/ ن.ز
جرمنيان څرنگه له مهاجرو سره مرسته کوي؟
په جرمني کي تقریباً هره ورځ د پناه غوښتونکو سرپناوي سوځي. خو د دغه تیاره اړخ تر څنگ المان روښانه او ښه اړخ هم لري. په زرونو انسانان او ټولني یې له کډوالو او مهاجرو سره مرستي کوي. په دې انځوريز راپور کي یو څو بېلگې. انځور: picture-alliance/dpa/P. Endig په یوتیوب او فېس بوک کي داوطلبه مرستندویان د دې غوښتنه کوي، چي له مهاجرو سره مرسته وسي. څوک چي کومک کوي، د هغه مطابق عکسونه لیږي. له ښې اشپزي سارا وینر څخه هم غوښتل سوي دي چي مرسته وکړي. هغې په برلین کي ۱۵۰ مهاجرو ته ښوروا، وچه ډوډی او خواړه برابر کړي دي.
انځور: picture-alliance/dpa/G. Fischer د پوتسدام له ریل گاډي لوبډلي څخه هېنینگ ایش د ویلکم یونایتید ۰۳ لوبغاړو هرکلی کوي.دا د جرمني لومړی يوازي د مهاجرو فوټبال ټیم دی .هغوی د پوتسدام له ریل گاډي لوبډلي سره په لومړي لیگ کي لوبه وکړه او درې پر دوه یې وگټله. هغوی ته د دغي سيالۍ زمینه د SV بابلس بېرگ سیمه ایز لیگ برابره کړه.
انځور: picture-alliance/dpa/O. Mehlis کارل لنډهییر د بایرن ایالت په تانن هوسن کي پناه غوښتونکو ښځو ته افتخاري الماني درس ورکوي. دښونځي دغه متقاعد مدیر له خپلو همکارانو سره په گډه مهاجرو ته په الماني ژبه یو کتاب هم تهیه کړی دی. د لنډهییر په خبره دغه کتاب د نوو راغلو مهاجر له پاره ډیر ښه لارښود دی. کتاب ورځني ژوند ته ځانگړی سوی دی او ډیر عملي ضروري مسایل بیانوي.
انځور: picture-alliance/dpa/S. Puchner کډوال او مرستندویان د مهاجرو د ښه راغلاست په یوه مېله کي نڅا کوي. د هایده ناو ۶۰۰ پناه غوښتونکي چي په یوه پخوانۍ مغازه کي ځای پر ځای سوي دي، پر شاوخوا یې اغزن دېوال راگرزیدلی دی. له دې مخکی هغوی جرأت نه کاوه چي له دغي سرپناه څخه ووزي. د ښی اړخو افراطیونو له بیري چي هلته یې ډیري ورځي اله گوله جوړه کړې وه. دغه میله د«دریسدن له نازیانو پاک اتحاد» له خوا تنظیم سوې ول.
انځور: picture-alliance/dpa/S. Willnow توبیاس فلایتر د ټوگو د یوه مهاجر بایسکل ته هوا ورکوي. د بې سرحده بایسکلانو- Bikes without Borders پروژې په لومړي سر کي په پنځو بایسکلانو او دوو داوطلبه مرستندویانو باندي شروع وکړه. خو د هغوی داوطلبان اوس ۱۵ کسانو ته رسیدلي دي. هغوی په دې منځ کي تر ۲۰۰ زیات بایسکلان ترمیم کړي. دغه سازمان مهاجرو ته بایسکلان د مؤقت وخت له پاره وړیا هم ورکوي.
انځور: picture-alliance/dpa/U. Deck د برلین د مهاجرو په لیلیه کي ټوله ځایونه ډک دي. لږ وخت مخکي درې نوري مؤقتي سرپناوي هم جوړي سوې. یوه د برلین تېسکه په نوم تش ولاړ مکتب کي جوړه سوه چي تر ۲۰۰ انسانانو پوري پکښی ځاییږي. هغه چي اصلاً د توماس ټولنیزي خدماتي شبکې د کارکونکو له خوا جوړه سوې ده چي پکښي ډیرو داوطلبانو هم برخه اخیستې ده.
انځور: picture-alliance/dpa/B. von Jutrczenka د الماني پوځ عسکر په خپلو کښتیو کي په مدیترانه کي ژغورل سوي مهاجر راولي. د ۲۰۱۵ م کال د می میاشتي له پیل راهيسي دالماني کښتیو عملې څه ناڅه ۷۵۰۰ انسانان له ډوبېدو ژغورلي دي. د هغوی په منځ کي یوه ۳۳ کلنه حمله داره ښځه رحمه علي ده. دغه ځوانه ښځه د سومالیا د پلازمیني موگادیشو څخه راځي او پنځه میاشتي یوازي په تیښته کي ول.
انځور: picture-alliance/dpa/B. Marks انځور: picture-alliance/dpa/Bundeswehr/T. Petersen دغه کوچنۍ نجلۍ چي صوفیه نومیږي، درې کیلو وزن لري. دا لومړی کوچنی دی چي د المان پوځ په کښتی- فریگاټه کي زیږي. د هغه سومالیايي مور رحمه علی له پاره دا یو ښه بخت وو، چي تر طبي پالني لاندي یې کوچنی دنیا ته راغی. یوه عسکر د نجلی تر زیږیدو وروسته وویل چي «تر همدغسی یو شیبې وروسته سړی احساس کوي چي یو ښه او معنی داره عمل یې تر سره کړی دی.»
انځور: Reuters/Bundeswehr/PAO Mittelmeer مهاجرو ته د اورگاډو په تمځايونو کي ټول مقررات ور ښوول کيږي: چيري ودريږي، څرنگه ټکټ واخلي او چيري پورته سي.
انځور: picture-alliance/dpa/H. Schmidt آلمان ته راغلو مهاجرو ته لامبو هم ور زده کيږي. په دغه هيواد کي تقريباً هر وگړی لامبو کولای سي.
انځور: picture-alliance/dpa/S. Puchner په آزاده فضا کي له مهاجرو سره سهار ناری دوی ته دا انځور ورکوي چي آلمانان خپلو مېلمنو ته څومره خوشحاله دي.
انځور: picture-alliance/dpa/P. Endig
