د قزاقستان په جمهوريت کې احتجاجونه او آخ و ډبونه دوام لري. په ميليوني ښار آلماتي کې د روسيې د تاس خبري اژانس د رپوټ له مخې د ځايي خبريالانو په حواله تر ښاروالۍ مخکې د په لسګونو وسله والو او پوځ ترمنځ د »ډزو سخته تبادله« شوې.

د پوليسو د وياند، سلطنت اسيربېګ، په حواله »افراطي ځواکونو« هڅه کړې وه چې پر اداري ودانيو او د پوليسو پر حوزو او مرکز باندې په پلازمېنه کې يرغل وکړي. په لسګونو بريد کوونکي »له منځه وړل شوي«، د پوليسو د وياند د دغو جګړه يزو الفاظو نقل قول د اينترفکس قزاقستان، تاس او ريا نووستي آژانسونو راوړی دی. د وياند په خبره د دغو خلکو د هويت په هکله اوس پلټنې کيږي. داسې ښکاري چې احتجاج کوونکي هم وژل شوي دي.

دقيق وضعيت معلوم نه دی

په نورو رپوټونو کې ويل شوي چې ۳۰۰ عسکر په زغروالو ګاډو کې سيمې ته رسېدلي دي او د پېښې ميدان يې محاصره کړی دی. د آلماتي په بېلو ناحيو کې د مظاهره کوونکو په وړاندې د امنيتي ځواکونو ماموريتونه دوام لري چې د راپورونو په حواله وسله وال کسان دي. د ښار پر اوسېدونکو هم غږ شوی چې په خوندي ځايونو کې دې پاتې او له سړکونو څخه دې ډډه وکړي.

د دغو پېښو بې طرفه تائيد لا نه دی شوی. د قزاقي رسنيو انترنېټي صفحو ته دا مهال له خارج څخه لاسرسی هم نه شته. له دې کبله دقيق وضعيت معلوم نه دی. البته داسې ښکاري چې انترنېټ تړل شوی وو. په ميليوني ښار آلماتي کې د موبايلونو شبکه هم بنده وه.

د آلماتي په دغو احتجاجونو کې د رسمي معلوماتو له مخې ۱۳ امنيتي ځواکونه وژل شوي دي. خو د احتمالي ملکي قربانيانو شمېرې تر اوسه پورې په ډاګه شوې نه دي. د چهارشبنې په ورځ چارواکو د اتو وژل شويو پوليسو او عسکرو خبره کړې وه.

د قزاقستان د روغتيا وزارت په حواله په دغو آخ و ډبونو کې څه باندې زر تنه ټپيان شوي دي چې ۴۰۰ تنه په روغتون کې او ۶۲ د جدي مراقبت په څانګو کې هم تر درمنلې لاندې دي. خو د ملکي وګړو تر منځ د وژل شوو په اړه چارواکو تر اوسه معلومات نه دي ورکړي. د تاس خبري اژانس رپوټ ورکوي چې د کورنیو چارو وزارت په حواله تقريبا ۲۰۰۰ تنه نيول شوي دي.