په دې وروستیو کې دوه یرغمل نیول شوي امریکایانې چې یوه یې مور او بله یې لور وه، د قطر هیواد په منځګړیتوب د حماس له بنده آزاد شول. اوس د قطر د بهرنیو چاروزارت د نورو یرغمل شوو کسانو د خوشې کیدو د احتمال خبر ورکړی دی. د قطر د بهرنیو چارو وزارت ویاند مجید الانصاري له «ولټ ام زونټاګ» المانۍ ورځپاڼې ته ویلي دي: «مونږ په داسې یو مسیر کې قرار لرو چې ژر به په ځانګړې توګه د ملکي کسانو د خوشې کیدو سبب شي.»
د اکتوبر میاشتې په ۷ نیټه په غزې تراډه کې پراسرائیلو د حماس تر برید وروسته، دا د حماس له خوا د يرغمل نيول شوو کسانو لومړۍ آزادیدنه ده. ویل کیږي چې حماس تر ۲۰۰ ډیر ملکیان چې الماني اتباع هم په کې شامل دي تښتولي دي.
دا چې قطر په ۲۰۲۱م کال کې په افغانستان کې د طالبانو یو وار بیا واک ته تر رسیدو وروسته د منځګړي په توګه د خلکو پام را اړولی دی، له یوې خوا دوحې سره د اسلامپاله ډلو د اړیکو او له بلې خوا له لویدیځو هیوادونو سره یې د روابطو پورې اړه لري.
This browser does not support the video element.
په فارس خلیج کې دغه عربي هیواد له تیرو ۱۵ کلونو راهیسې د حماس تر ټولو مهم ملاتړی بلل کیږي. خو ویل کیږي چې قطر د ایران برخلاف له حماس سره د وسلو مرسته نه کوي، بلکې دغه بډایه هیواد د حماس ډلې مالي ملاتړ کوي.
حماس: د یرغمل شوو ملکیانو د خوشې کیدو له پاره مختلفو هیوادونو سره په تماس کې یو
په لبنان کې د حماس استازی اسامه حمدان وایي، حماس له «جګړې وروسته» د اسرائیلي یرغمل شوو سرتیرو د آزادۍ په هکله مذاکره کوو. د هغه په خبره په غزې تراډې د اسرائیلو د برید تر پای ته رسیدو پورې به «پر دې موضوع بحث ونه شي.»
حمدان له اسرائیلي محبسونو څخه د فلسطیني زندانیانو د خوشې کیدو ضمانت پر لزوم د ټینګار تر څنګ زیاته کړی ده چې حماس د یرغمل شوو ملکي کسانو د آزادیدو په اړه له مختلفو هیوادونو، د هغو له ډلې څخه مصر، قطر، ایران، ترکیه، چین او روسیې سره په تماس کې دی.
آژانسونه: ش.ن/ ا.و.ا
د مرګ او ژوند په منځ کي د غزې د فلسطینیانو انځوریز راپور
غزه د بشري ناورین په درشل کي ده. د اکتوبرمیاشتي پر اوومه نېټه د حماس د ترهګریزو بریدونو په ځواب کي د اسرائيل د ځوابي بریدونه دوام لري، په غزه کي د وژل سویو او ټپیانو شمېر مخ پر ډېرېدو دی. انځور: Fatima Shbair/AP/picture alliance د اسرائيل درانه ځوابي بریدونه پر اسرائيل د حماس د ناڅاپي تروریستي بریدونو په دوام، دغه هیواد هم پر غزه هوايي بریدونه وکړل چې د حماس ډلي په کنترول کي ده. اروپايي ټولنه، امریکا متحده ايالات او ځيني نور هیوادونه حماس تروريستي ډله ګڼي. د اکتوبر پر نهمه دوشنبه د اسرائيل لومړي وزیر بنیامین نتانیاهو وویل: «کوم څه، چي به موږ په راتلونکو ورځو کي له خپلو دوښمنانو سره کوو د دوی د راتلونکو نسلونو له پاره به لکه زنګ داسي وي.»
انځور: Belal Al SabbaghAFP/Getty Images د ملګرو ملتونو د بشري مرستو د همږغۍ دفتر(OCHA) په وینا نژدې ۸۰۰ تعمیرونه یومخ ویجاړي سوي دي او په سونو نور د اسرائيل په هوايي بریدونو کي تاواني سوي دي. راپورونه وايي، چي په سونو زره کسان اوبه نه لري.
انځور: Mohammed Talatene/dpa/picture alliance د پاته سویو کسانو په لټه کي د اسرائيل په هوايي بریدونو کي د غزې تراډي په شمال کي د جبالیه کډوالو پنډغالي له منځه تللي او ژغورونکي کوښښ کوي، چي پاته سوي ژوندي کسان وژغوري. هغه شمیرې چي د پنجشنبې په ورځ خپرې سوي دي، د دواړو لوریو قربانیان تر۲۵۰۰ زیات دي. لږ تر لږه ۱۲۰۰ اسرائيليان او ۱۳۰۰ فلسطینیان وژل سوي دي په زرهاوو کسان ټپیان دي.
انځور: Mahmud Hams/AFP/Getty Images مړي په یوه موټر کي وړل کیږي او یوه فلسطینۍ ښځه بوغاري وهي . په غزه کي د روغتیا مسؤلان وايي تر ۱۴۰ ډېر کوچنیان او ۱۰۰ ښځي وژل سوي دي.
انځور: Said Khatib/AFP/Getty Images فلسطینیان په یوه زاړه مني بس موټر کي د اسرائيل له انتقامي هوايي بریدونو څخه تښتي. د ملګرو ملتونو د یو راپور پربنسټ په غزه کي ۱۸۷ زره کسان بې ځایه سوي دي. ۱۳۷ زره کسانو د ملګرو ملتونو په ښوونځیو کي او ۴۰ زره په شخصي کورونو کي پنا اخیستې ده. امکان نه لري، چي د غزې تراډه دي یومخ پرېږدي. اسرائيل دغه سیمه محاصره کړې او د مصر لار يې هم تړلي دي.
انځور: Saleh Salem/REUTERS اسرایلي ځواکونه د غزي تراډي پوله خپله مهاروي د اسرائيل ځواکونه د غزې تراډي پر پوله ګزمه کوي. د حماس ډلي وسله والو د اکټوبر مياشتي پر اوومه پر پوله د اسرائيل درول سوی کټارې ماتي او دغه هیواد ته له ور اوښتلو سره یې عملیات شروع کړل، چي ډېری قربانیان يې ولسي وګړي ول. اسرائيل په ۱۹۹۴م کال کي د غزې پر پوله اغزن تار وغځاوه. په غزه کي د مصر سره پر پوله هم اغزن سیم درول سوی دی.
انځور: Oren Ziv/AP/picture alliance د غزې پر پوله اسرائيلي ځواکونه اسرائيل ۳۰۰ زره ریزرف ځواکونه چمتو کړي دي. د غزې اوسیدونکي ویره لري چي اسرائيل به مځکني عملیات شروع کړي. د غزې پولي ته د اسرائيل زغروال موټر او پوځي تجهیزات لېږل سوي او پولي ته څېرمه د اسرائيل ښارګوټي یومخ تش سوي دي.
انځور: Ilia Yefimovich/dpa/picture alliance په غزه کي انساني ناورین ته انتظار جان ایګلنډ د ناروې د کډوالو د شورا (NRC) عمومي منشي له CNN سره په مرکه کي خبرداری ورکړ، چي په غزه کي یو انساني ناورین سترګي په لار دی. «د بېلګي په ډول که چیري په روغتونونو کي د برېښنا د نشتوالي او لوږي له لاسه کوچنیان ومري، دا به جنګي جنایتونه وشمېرل سی.»
انځور: Mahmud Hams/AFP/Getty Images یحیی سنوار، په غزه کي د حماس د سیاسي دفتر مشر یحیی له ۲۰۱۷م کال راهیسي په غزه کي د حماس تروریستي ډلي مشر دی. هغه پر اسرائيل د برید له طراحانو څخه ګڼل کیږي. سنوار، چي د کډوالو په پنډغالي کي لوی سوی دی، ویلي دي: «موږ دا غوره ګڼو، چي شهیدان سوو، د دې پرځای، چي تر ظلم او سپکتیا لاندي ومروو.»
انځور: Mohammed Abed/AFP د حماس ویاند خبري اژانسونو ته ویلي دي چي هر واري چي اسرائيل بیله خبرتیا پر غزه بمبار وکړي یو نیول سوی اسرائيلی به وژل کیږي. په داسي حال کي چی د اسرائيل د باندنیو چارو وزیر الی کوهن ګواښ وکړ چي دا ډول کړنی به هیڅ ونه بخښل سي. حماس پر اسرائيل باندی د برید پرمهال په لسهاوو اسرائيليان له ځان سره ژوندي بیولي دي.
انځور: Mahmud Hams/AFP/Getty Images
