آیا له آلمانه «یو پاکستانی او ایرانی» کابل ته اخراج شوي؟
۱۳۹۷ اسفند ۲, پنجشنبه
د افغانستان د کډوالو وزارت ادعا کوي چې له آلمانه د ۳۸ اخراج شوو افغان مهاجرو په ډله کې یو ایرانی او یو پاکستانی هم شته. خو د آلمان د کورنیو چارو وزارت وایي چې د اخراج تر مخه د افغانانو په توګه د هغوی هویت تثبیت شوی وو.
انځور: picture alliance/dpa/B. Roessler
اعلان
د آلمان حکومت د دوشنبې په ورځ په یوه چارتر الوتکه کې ۳۸ تنه افغان مهاجر خپل هیواد ته اخراج کړل. د افغانستان د کډوالو او راستنېدونکو چارو وزارت وایي چې دوی ته د اخراج شوو کسانو تر تحويلیدو وروسته لومړني تحقیقات ښيي چې له دغې ډله څخه دوه تنه افغانان نه دي.
د افغانستان د کډوالو او راستنېدونکو چارو وزارت د ویاند مرستیال رضا باهر، له دویچه ویله سره په خبرو کې وویل: «په هوايي ډګر کې د اسنادو د ارزولو له مخې، الطاف حیدری د پاکستان او نور محمد محمدي د ایران تبعه دی. دوی د افغانستان د کډوالو چارو وزارت و نه منل او فعلاً له افغان امنیتي ځواکونو سره دي.»
د دغه مرستیال ویاند په وینا له دغو مهاجرو څخه یو یي پاکستانی پاسپورت لري او دوهم کس هم «داسې اسناد له ځانه سره لري» چې ښيي د ایران تبعه دی.
د رضا باهر، په خبره دغه دواړه کسان اوس له پولیسو سره دي، څو مشخصه شي چې بیرته آلمان او که يا ایران او پاکستان ته لېږل کيږي.
د آلمان د کورنیو چارو وزارت د دویچه ویله د یوې پوښتنې په ځواب کې دا خبره تائید کړه چې له اخراج شوو مهاجرو څخه دوو تنو د کابل په هوایي ډګر کې ادعا کړې ده چې د افغانستان تبعه نه دي، خو د هغوی دغه ادعا سمه نه ده.
د آلمان د کورنيو چارو وزارت لیکلي دي چې له دغو مهاجرو څخه یوه ادعا کړې ده چې پاکستانی دی، خو ډېر ژر ثابت شول چې د هغه څرګندونې د اخراج پر وړاندې د خوندیتوب له پاره پلمه ده، ځکه چې «ترمخه هم د هغه د افغاني تابعیت په هکله هیڅ تردید نه وو» او د کابل په هوایي ډګر کې هم د دغه اخراج شوي پناه غوښتونکي ادعا په يوه افغاني سند سره رد شوې ده.
د آلمان د کورنیو چارو وزارت د هغه کس په اړه چې په خپله وایي ایرانی دی، ویلي دي چې د اخراج تر مخه «د یاد کس افغاني تابعیت په آلمان کې د افغانستان يوې قونسلگرۍ تائيد کړی دی.»
د آلمان د کورنیو چارو وزارت زیاته کړې ده چې اوس هغه مهاجر چې ادعا يې کړې ده ایرانی دی، په کابل کې په یوه مؤقتي ځای کې ساتل کیږي او د دې قضیې د روښانوالي له پاره له افغان چارواکو سره په تماس کې دي.
د هویت د تثبیت ستونزه
اصولاً که چیرې کوم رد شوی پناه غوښتونکی د هویت تذکره یا پاسپورت و نه لري، آلماني ادارې د هغوی د اخراج ترمخه، د افغانستان له دیپلوماتیکو نمایندګو څخه د هویت د تثبیت سند تر لاسه کوي. په دې قضیه کې د آلمان د کورنیو چارو وزارت هم دغه ټکي ته اشاره کړې ده.
د افغانستان د کډوالو چارو وزارت د ویاند مرستیال وایي چې ممکنه ده، دغو کسانو په آلمان کې د خپلې پناه غوښتنې د چانس د زیاتیدو له پاره خپل ځانونه د افغانانو په توګه معرفي کړي وي: «د افغانستان سفارت هم د لېست او نومونو له مخې اشخاص تائیدوي. امکان نه لري چې ټول ۳۸ تنه یي له نزدې څخه لیدلي وي.»
هغه د آلمان د کورنیو چارو وزارت د دغو څرګندونو د جواب په ترڅ کې پر خپلو لومړيو څرگندونو ټينگار وکړ: «موږ په هوایي ډګر کې له لومړنیو ارزونو څخه ډاډ تر لاسه کړی چې یو پاکستانی او بل ایرانی دی.»
زموږ له آرشیف څخه:
له آلمانه اخراج شوي افغان مهاجر په کابل کي
آلماني چارواکو اعلان وکړ چې د آلمان له دوسلدورف هوايي ډګر څخه ۱۲ تنه رد شوي افغان مهاجرین بیرته خپل هیواد ته اخراجیږي خو په کابل کې رسنیو رپوټ خپور کړی چې له دوی څخه یوازې ۸ کسان له هوايي ډګر څخه بیرون شوي.
د دې رد شوو افغان مهاجرینو الوتکه د سې شنبې (د ۲۰۱۷ کال د سپتمبر میاشتې په ۱۲ نیټه) د آلمان له دوسلدورف هوايي ډګر څخه د کابل هوايي ډګر په لور والوته. آلماني چارواکو ویلي چې د اخراج کیدونکو افغانانو په دې دور کې داسې مهاجرین دي چې د پناه غوښتنه یې رد شوې او ځینو یې جرمونه ترسره کړي.
انځور: Getty Images/AFP/W. Kohsar
په کابل کې د آلمان پر سفارت باندې تر خونړي برید وروسته، افغانستان ته د رد شوو اخراجیدونکو مهاجرینو لړۍ ځنډیدلې وه. له هغې پیښې وروسته، دا لومړی ځل دی چې یو ډله افغان رد شوي مهاجرین له آلمان څخه افغانستان ته اخراجیږي.
انځور: Getty Images/AFP/W. Kohsar
د افغانستان د مهاجرینو وزارت چارواکو ویلي چې ټاکل شوې وه په دې پرواز کې ۱۱ افغان مهاجرین افغانستان ته اخراج شي، خو یوازې ۸ مهاجرین رسیدلې دي. د یاد وزارت یو چارواکي آصف عباسي د فرانسې خبري آژانس ته ويلي چې «دا چې پاتې درې کسان ولې نه دي اخراج شوي، دلیل یې موږ ته هم معلوم نه دی.»
انځور: Getty Images/AFP/W. Kohsar
په داسې حال کې چې آلماني چارواکو ویلي چې د اخراجیدونکو مهاجرینو په ډله کې لږ تر لږه درې کسان د آلمان له زندان څخه د کابل هوايي ډګر ته اخراج شوي، خو افغان چارواکو د دې کسانو د راتلونکي برخلیک په هکله تر اوسه پورې کوم نظر نه دی ورکړی.
انځور: Getty Images/AFP/W. Kohsar
د اخراج شوو کسانو له ډلې څخه پنځه رد شوو افغان مهاجرینو د آلمان په بایرن آیالت کې ژوند کوو. د بایرن د کورنیو چارو وزیر یواخیم هرمن ویلي چې دغه کسان مجرم وو. د هغه په وینا له دوی څخه لږ تر لږه دوه کسان یې د جنسي تیري د جرم له امله په زندان کې وو.
انځور: picture-alliance/dpa/M. Jawad
د رد شوو افغان مهاجرینو له ډلې څخه ځینو یې هیڅ هم نه درلودل. دوی ادعا کوله چې دوی په کور کې وو او د آلمان د پولیسو لخوا ونیول شول او سمدلاسه د دوسلدروف هوايي ډګر ته انتقال او له هغه ځایه افغانستان ته اخراج شول. آلماني چارواکي وايي چې څو میاشتې وړاندې یې دغو کسانو ته خبر ورکړی چې باید د آلمان خاوره ترک کړي.
انځور: Getty Images/AFP/W. Kohsar
د آلماني چارواکو د څرګندونو سربیره، ځینې اخراج شوي مهاجرین وايي چې دوی په آلمان کې کوم جرم نه دی کړی او یوازې له دې امله اخراج شوي چې د دوی د پناه غوښتنه نه ده منل شوې. دغه مهاجر هغه مهال چې کابل ته ورسیدو، سترګې یې له اوښکو ډکې شوې خو معلومه نه ده چې دغه اوښکې د خوښی دې که د خفګان.
انځور: Getty Images/AFP/W. Kohsar
بل لوري ته بیا په آلمان کې د بشري حقونو مدافع سازمانونه او ګڼ شمیر نورې ډلې افغانستان ته د دې مهاجرینو پر اخراج نیوکې کړي. دوی ویلي چې د بشري حقونو او امنیت له امله افغانستان په داسې حالت کې نه دی چې آلمان دې وکولای شي رد شوي افغان مهاجرین هلته اخراج کړي.
انځور: Getty Images/AFP/W. Kohsar
د سپتمبر په ۱۲مه په آلمان کې د دوسلدروف هوايي ډګر په مخ کې د بشري او د مهاجرینو د حقونو فعالانو د رد شوو افغان مهاجرینو د اخراج پرضد لاس لاریون او اعتصاب وکړ. ویل کیږي چې د آلمان په لږ تر لږه څلورو ایالتونو کې د رد شوو مهاجرینو د ساتلو له پاره ساتن ځایونه جوړ شوي.
انځور: picture-alliance/dpa/B. Thissen
د سپتمبر په ۱۲مه د آلمان د دوسلدورف په هوايي ډګر کې د لاریون سره په یو وخت کې شاوخوا ۲۰۰ کسانو افغانستان ته د رد شوو افغان مهاجرینو د ډله ایز اخراج پر ضد لاریون وکړ.