د حکومت د اپوزیسیون یو شمیر سیاستوالو پر زیهوفر باندې د دغه جنګیالي د دوسیې له کبله سختې نیوکې کړي دي. د سه شنبې په ورځ (د ۲۰۱۸م کال د جولای میاشتې۱۷ نیټه) د آلمان د زرغون ګوند مشر روبرت هابیک د «زید، ډي، ایف» په نامه آلماني تلویزیوني چینل سره په خبرو کې زیهوفر ته په خطاب کې وویل: «ته کولی نه شې چې په قوانینو کې بدلون راولې.»
د حکومت له بل اپوزیسیون ګوند څخه د آزاد دیموکراتانو مرستیال ولف ګنګ کیوبیکي بیا «آر. بي. بي» تلویزیوني چینل ته وویل: «که چیرته محکمې د حقیقت ویلو له امله پر چارواکو اعتماد نه شي کولی بیا نو په آلمان کې چارې ښې نه بریښي.»
د سمیع ا. په نامه د اسامه بن لادن پخواني شکمن ساتونکي د «بیلډ» په نامه یوې وتلې آلمانۍ ورځپاڼې ته ویلي دي چې هغه ته ویل شوي ول چې د اخراج پریکړه یې له «ډیر لوړ مقام څخه راغلې او زه په دې برخه کې څه نه شم کولی.»
په عین وخت کې د آلمان د کورنیو چارو وزارت ویلي دي چې په داسې حال کې چې د شکمن کس د ژر اخراجیدو موضوع له سیاسي اړخه مهمه وه، خو بیا هم دوی په نورد راین ویستفالن ایالت کې پر ځايي چارواکو د هغه د اخراج د چټکوالي په برخه کې فشار نه دی راوړی. په آلمان کې د یوه کس اخراج تر ډیره پورې د هر ایالت داخلي موضوع وي.
سربیره پر دې د مهاجرت او پناه غوښتنې په چارو کې د آلمان فدرالي ادارې یا «بامف» ویلي دي چې دوی د اداري محکمې د پریکړې په هکله معلومات هغه وخت ترلاسه کړل، چې شکمن کس لا له وړاندې تونس ته په یوه پروازې کې پر لار وو.
د اخراجونو په هکله د زیهوفر سخت دریځ
د آلمان په بایرن ایالت کې د انګل امیرکل د ملګري ګوند غړی زیهوفر د پناه غوښتنې او مهاجرت په برخه کې سخت دریځ غوره کړی دی. نوموړي د تیرې میاشتې په اوږدو کې نږدې محافظه کاران سره پاشلې او روانه میاشت یې بیا د مهاجرت د سیاست له کبله نږدې حکومت نسکور کړی وو.
ټاکل شوې چې په النزبخ کې د «فرانکفورتر الګماینه څایتونګ» د یوې سروې پایلې هم د چهارشنبې په ورځ خپرې شي. په دغو پایلو کې د محافظه کارانو له پاره عمومي ملاتړ له ۳۳ سلنه څخه ۳۰،۵ سلنه ته رالویدلی او په دې ترتیب سره د ۲۰۱۰م کال راهیسې دا د دوی له پاره تر ټولو کم ساری ملاتړ دی. خو په مقابل کې بیا د آلمان له پاره بدیل ګوند چې د مهاجرت ضد سیاست لري، ملاتړ له ۱۳سلنه څخه ۱۵ سلنه ته لوړ شوی دی.
د اسامه بن لادن د ساتونکي جنجالي کیسه
سمیع ا. په ۲۰۰۶م کال کې په آلمان کې د پناه غوښتنه کړې چې بریالۍ نه وه. پر هغه تور دی چې په افغانستان کې یې د القاعدې په یوه روزنیز کمپ کې پوځي او فکري روزنه ترلاسه کړې. سربیره پر دې سمیع ا. په مختلفو وختونو کې د القاعده شبکې د مشر اسامه بن لادن د شخصي ساتونکي تور هم لگول شوی. نوموړی دغه تورونه ردوي او بیا وروسته په همدې تیره جون میاشت کې په آلمان کې نیول کیږي.
د تونس د عدالیې وزارت یوه ویاند د «بلډ» ورځپاڼې ته په دې هکله ویلي چې تورن کس د تونس تابعیت لري. نوموړي هغه تورونه هم رد کړل چې ګواکۍ دغه کس به په تونس کې شکنجه شي.
په عین وخت کې له آلمان څخه افغانستان ته اخراج شوو کسانو له ډلې څخه په کابل کې د یوه مهاجر د ځان وژنې د پیښې له کبله هم د آلمان د کورنیو چارو وزیر له سختو انتقادونو سره مخامخ دی. زیهوفر تیره میاشت د «مهاجرت په برخه کې خپل ماستر پلان» وړاندې کړ او اوس د آلمان پارلمان د ګوندي اهدافو له پاره د وزارت له موقف څخه د احتمالي ناوړه استفادې په هکله پلټنې پیل کړي دي.
زموږ له ارشيف څخه:
آلماني چارواکو اعلان وکړ چې د آلمان له دوسلدورف هوايي ډګر څخه ۱۲ تنه رد شوي افغان مهاجرین بیرته خپل هیواد ته اخراجیږي خو په کابل کې رسنیو رپوټ خپور کړی چې له دوی څخه یوازې ۸ کسان له هوايي ډګر څخه بیرون شوي.
انځور: Getty Images/AFP/W. Kohsarله آلمان څخه اخراج شوي ۸ تنه رد شوي افغان مهاجرین د کابل هوايي ډګر ته رسیدلي. په پیل کې آلماني رسنیو ویلي وو چې په دې پرواز کې ۱۵ افغان مهاجرین بیرته خپل هیواد ته استول کیږي، خو تیره ورځ بیا رسنیو د ۱۲ کسانو یادونه وکړه. په پای کې د کابل له هوايي ډګر څخه یوازې ۸ مهاجرین بهر شوي.
د دې رد شوو افغان مهاجرینو الوتکه د سې شنبې (د ۲۰۱۷ کال د سپتمبر میاشتې په ۱۲ نیټه) د آلمان له دوسلدورف هوايي ډګر څخه د کابل هوايي ډګر په لور والوته. آلماني چارواکو ویلي چې د اخراج کیدونکو افغانانو په دې دور کې داسې مهاجرین دي چې د پناه غوښتنه یې رد شوې او ځینو یې جرمونه ترسره کړي.
په کابل کې د آلمان پر سفارت باندې تر خونړي برید وروسته، افغانستان ته د رد شوو اخراجیدونکو مهاجرینو لړۍ ځنډیدلې وه. له هغې پیښې وروسته، دا لومړی ځل دی چې یو ډله افغان رد شوي مهاجرین له آلمان څخه افغانستان ته اخراجیږي.
د افغانستان د مهاجرینو وزارت چارواکو ویلي چې ټاکل شوې وه په دې پرواز کې ۱۱ افغان مهاجرین افغانستان ته اخراج شي، خو یوازې ۸ مهاجرین رسیدلې دي. د یاد وزارت یو چارواکي آصف عباسي د فرانسې خبري آژانس ته ويلي چې «دا چې پاتې درې کسان ولې نه دي اخراج شوي، دلیل یې موږ ته هم معلوم نه دی.»
په داسې حال کې چې آلماني چارواکو ویلي چې د اخراجیدونکو مهاجرینو په ډله کې لږ تر لږه درې کسان د آلمان له زندان څخه د کابل هوايي ډګر ته اخراج شوي، خو افغان چارواکو د دې کسانو د راتلونکي برخلیک په هکله تر اوسه پورې کوم نظر نه دی ورکړی.
د اخراج شوو کسانو له ډلې څخه پنځه رد شوو افغان مهاجرینو د آلمان په بایرن آیالت کې ژوند کوو. د بایرن د کورنیو چارو وزیر یواخیم هرمن ویلي چې دغه کسان مجرم وو. د هغه په وینا له دوی څخه لږ تر لږه دوه کسان یې د جنسي تیري د جرم له امله په زندان کې وو.
د رد شوو افغان مهاجرینو له ډلې څخه ځینو یې هیڅ هم نه درلودل. دوی ادعا کوله چې دوی په کور کې وو او د آلمان د پولیسو لخوا ونیول شول او سمدلاسه د دوسلدروف هوايي ډګر ته انتقال او له هغه ځایه افغانستان ته اخراج شول. آلماني چارواکي وايي چې څو میاشتې وړاندې یې دغو کسانو ته خبر ورکړی چې باید د آلمان خاوره ترک کړي.
د آلماني چارواکو د څرګندونو سربیره، ځینې اخراج شوي مهاجرین وايي چې دوی په آلمان کې کوم جرم نه دی کړی او یوازې له دې امله اخراج شوي چې د دوی د پناه غوښتنه نه ده منل شوې. دغه مهاجر هغه مهال چې کابل ته ورسیدو، سترګې یې له اوښکو ډکې شوې خو معلومه نه ده چې دغه اوښکې د خوښی دې که د خفګان.
بل لوري ته بیا په آلمان کې د بشري حقونو مدافع سازمانونه او ګڼ شمیر نورې ډلې افغانستان ته د دې مهاجرینو پر اخراج نیوکې کړي. دوی ویلي چې د بشري حقونو او امنیت له امله افغانستان په داسې حالت کې نه دی چې آلمان دې وکولای شي رد شوي افغان مهاجرین هلته اخراج کړي.
د سپتمبر په ۱۲مه په آلمان کې د دوسلدروف هوايي ډګر په مخ کې د بشري او د مهاجرینو د حقونو فعالانو د رد شوو افغان مهاجرینو د اخراج پرضد لاس لاریون او اعتصاب وکړ. ویل کیږي چې د آلمان په لږ تر لږه څلورو ایالتونو کې د رد شوو مهاجرینو د ساتلو له پاره ساتن ځایونه جوړ شوي.
د سپتمبر په ۱۲مه د آلمان د دوسلدورف په هوايي ډګر کې د لاریون سره په یو وخت کې شاوخوا ۲۰۰ کسانو افغانستان ته د رد شوو افغان مهاجرینو د ډله ایز اخراج پر ضد لاریون وکړ.
لاریون کوونکو داسې شعارونه لیږدول چې د افغانستان امنیتي وضعیت یې تشریح کوو. دوی افغانستان ته د «اخراج د توقف» غوښتنه کوله.
په دې لاریون کې ګڼ شمیر افغان مهاجرینو هم ګډون کړی وو. د دوی په لاسونو کې په ځینو شعارونو کې لیکل شوي وو چې «افغانستان خوندي نه دی.»
