د روان ميلادي کال په لومړيو شپږو مياشتو کې له آلمان څخه د غيرقانوني اخراج شوو مهاجرو شمیر د تيرکال د همدې مودې په پرتله خورا ډير راټيټ شوی دی.
د «نويه اوسنابروکر» ورځپاڼې د پنجشنبې په ورځ (د اګست ۷مه) رپوټ ورکړ چې د ۲۰۲۰م کال په لومړۍ نيمايي کې په مجموع کې ۴۶۱۶ کسان په اجباري توګه له آلمان څخه اخراج او خپلو هيوادونو ته ستانه شوي دي.
د رپوټ په حواله، دغه معلومات د آلمان د کورنيو چارو وزارت د آلمان په مرکزي پارلمان (بونديستاګ) کې د کيڼ اړخ ګوند يا د چپيانو فراکسيون د پوښتنې په ځواب کې ورکړي دي.
تيرکال دوه برابره ډير اخراجونه
د تير ميلادي کال په لومړيو شپږو مياشتو کې څه باندې ۱۱۴۹۶ بهرني اتباع اړ شول چې د آلمان له خاورې څخه ووځي چې دغه شمير د روان کال په همدې موده کې د شوو اخراجونو په پرتله څه باندې دوه برابره لوړ دی.
په سږنيو اخراجونو کې د کمښت د راتلو لوی دليل، په نړيواله کچه د کرونا وبا خپريدل ښودل شوي دي چې د روان ميلادي کال له دريمې مياشتې راوروسته په آلمان کې هم ډيره شوه. د کورنيو چارو وزارت د دغو نوو ارقامو په خپرولو سره، د کيڼ اړخ فراکسيون يو ځل بيا د غيرقانوني مهاجرو او پناه غوښتونکو د اخراجونو د درولو غوښتنه کړې ده.
د آلمان د يو تلويزيون د«ټاګس شاو» ويب پاڼې په حواله، د ۳۴۷۷ تنه بهرنيانو اخراج د الوتکو په وسيله تر سره شوی دی چې په دوی کې نژدې ۱۰۰۰ يې ښځې او ۷۸۲ ماشومان او تنکي ځوانان دي.
د دغه رپوټ پر اساس، د آلمان پوليسو او سرحدي چارواکو، د بهرنيو وګړو د اخراج په ۳۶۲ پيښو کې اړ شوي چې له زور څخه کار واخلي.
د آلمان د کورنيو چارو وزارت د کيڼ اړخ فراکسيون د پوښتنې په ځواب کې دا هم ويلي دي چې دوی سږکال د ۴۴۸ تنه بهرنيانو په اخراجولو کې پاتې راغلي او د اخراج په ۷۴ مواردو کې هوايي شرکتونو او د دوي پيلوټانو له دغه کار څخه ډډه کړې ده.
«اخراجونه دي متوقف شي»
په بونديستاګ کې د کيڼ اړخ ګوند د فراکسيون غړې، اولا يلپکه، د کرونا وبا د خپريدا ادامې ته په کتو، له آلمان څخه د مهاجرو د اخراج د بشپړ توقف غوښتونکې شوې ده.
هغې د آلمان د مهاجرت ادارې چارواکي تورن کړل چې د کرونا وبا په دليل په اخراجونو کې د کمښت په راتلو سره اوس غواړي چې دغه لړۍ له سره پيل کړي.
د چپيانو د ګوند استازې وویل، په داسې وخت کې چې د کرونا وبا خپريدل اوس هم ادامه لري، له آلمان څخه د بهرنيانو اخراجول يو غیرمسئولانه کار دی. هغې وويل چې د مرکزي او ايالتي حکومتونو مسئولان، بايد د دې له پاره چې د مهاجرو روغتيا له خطر سره نه وي مخ شوي د اوس له پاره دې د اخراجونو لړۍ په بشپړه توګه متوقف کړي.
دويچه وله ف/ م.ک.ص./ن.ز.
د اخراجونو پر موضوع له آرشيف څخه يو انځوريز البوم (14.09.2017):
له آلمان څخه د افغانانو د اخراج پروسه ـ انځوريزه کرونولوژي
له آلمان څخه د افغان مهاجرو ډليز اخراجونه وروسته له هغې پيل شوه چې افغانستان د ۲۰۱۶ کال د اکتوبر میاشتې په سر کې د بروکسل په غونډه کې د مهاجرت پر موضوع د اروپايي اتحاديې سره يوې هوکړې ته ورسيد.
انځور: Imago/J. Heinrichد ۲۰۱۶ کال د اکتوبر مياشتې په لمړيو کې د بروکسل په غونډه کې افغانستان له اروپايي اتحاديې سره د مهاجرت پر موضوع يوې هوکړې ته ورسيدل، د دغې هوکړې له مخې د اروپايي اتحاديې غړو هيوادونو څخه افغانستان ته د رد شويو افغان مهاجرو د اخراج اسانه کړل شو.
د بروکسل د توافق له مخې، افغانستان دې ته حاضر شو چې د اروپايي اتحاديې د غړو هيوادونو لخوا رد شوي افغان مهاجر ومني.
د بروکسل په غونډه کې افغانستان د اروپايي اتحاديې لخوا مالي ملاتړ ترلاسه کړ، خو د بشر حقونو سازمانو پر دغې اتحاديې نيوکې وکړې چې دغه ملاتړ نبايد د مهاجرو له اخراج سره تړلي وي.
تر هوکړې وروسته د آلمان په مختلفو ښارونو کې د افغان مهاجرو د اخراج پر ضد ډیرې مظاهرې وشوي. افغان مهاجر او د هغو بهرني ملاتړي وايي چې افغانستان امن ندی.
آلمان څخه کابل ته د افغان مهاجرو لمړنی ډليز اخراج د ۲۰۱۶ کال په سپټامبر مياشت کې ترسره شو. په دغه پرواز کې ۳۸ تنه ردشوي افغان مهاجر کابل ته بيرته وليږدول شول.
آلمان څخه د رد شويو افغان مهاجرو دويم ډليز اخراج د ۲۰۱۷ کال په جنورۍ مياشت کې ترسره شو. په دا ځل پرواز کې ۲۶ تنه افغانان کابل ته اخراج شول.
که له ېوې خوا ډليز اخراجونه ترسره کيږي ورسره جوخت په ټول آلمان کې افغانانو ته دا حق ورکول کيږي چې د افغان مهاجرو د اخراج په ضد مظاهرې وکړي. په مظاهره کې يوازې افغانان نه بلکه آلمانان هم برخه اخلي. انځور په هامبورک ښار کې د مظاهرې يوه برخه.
آلمان څخه د افغان رد شويو مهاجرو دريم ډليز اخراج د ۲۰۱۷ کال په فبرورۍ مياشت کې ترسره شو. په دې پرواز کې ۱۸ تنه افغانان کابل ته اخراج کړل شول.
آلمان کې د مهاجرو ملاتړ کونکو او بشري سازمانونو په وار وار د افغان مهاجرو د اخراج ضد مظاهرو کې د افغانانو تر څنګ خپل اواز اوچت کړی دی. د آلمان ځيني ګوندونو هم د افغان مهاجرو له اخراج سره مخالفتونه ښکاره کړي دي. د بيلګې په توګه د ۲۰۱۷ کال په اپريل کې د آلمان د شلزويګ هولشتاين ايالت صدراعظم تروستن البیک د رد شويو افغان مهاجرو د اخراج بهير د درولو غوښتونکی شو.
اخراج شوي مهاجر او راتلونکې
افغانستان ته اخراج شوي افغان مهاجر ناهيلي ښکاره کوي. نور ايم رحمن له آلمان څخه په څلور پرواز کې کابل ته اخراج شو. د رحمن په څير اخراج شويو افغان مهاجرو لپاره تر ټولو ناهيلې کونکې خبره دا ده چې زيات وخت يې بې ګټي تير شوی دی. دوی له پاره په افغانستان کې له سره د نوی ژوند پيلول ګران کار بريښي.
آلمان څخه کابل ته د ردشويو افغان مهاجرو څلورم ډليز اخراج د ۲۰۱۷ کال په مارچ مياشت کې ترسره شو. په دغه ځل ۱۵ تنه افغانان اخراج شول.
په کابل ښار کې د آلمان سفارت مخته د می مياشتې په ۳۱ نيټه د موټر بم ستره چاودنه وشوه. په دغې چاودنه کې شاوخوا ۱۵۰ تنه ووژل شول. د آلمان سفارت ودانۍ هم سخته زيانمنه شوه. آلمان دا ځل د افغانانو پنځم ډليز اخراج وځنډاوه.
کابل کې د ۲۰۱۷ کال د می مياشتې د ۳۱ مې بريد وروسته آلمان افغانستان ته د افغان مهاجرو اخراج د نامعلوم وخت لپاره ودراوه. دغه هيواد وپتيله چې د افغانستان د امنيتي وضعيت په اړه له سره کتنه وکړي. د مي ۳۱ بريد د آلمان سفارت مخته شوی وو چې دغه سفارت په کې سخت زيانمن شو.
تر درو مياشتو ځنډ وروسته د اخراج لړۍ بيا پيل
د رد شويو افغان مهاجرو وروستي ډلييز اخراج د ۲۰۱۷ کال د سپټمبر په ۱۲ نيټه د دوسلدورف له هوايي ډګر څخه ترسره شو. په دغه پرواز کې لږ تر لږه ۱۲ تنه افغانان کابل ته اخراج کړل شول. دا له هغه وخته چې آلمان حکومت د افغان مهاجرو اخراج تر يو نامعلوم وخت پورې درولی وو، لمړی ډليیز اخراج دی چې له دغه هيواده ترسره کیږي.
کابل ته رسيدلی یو نوی رد شوی افغان مهاجر. دغه ځوان د ۲۰۱۷ کال د سپټمبر په ۱۳ يعنې په وروستي پرواز کې افغانستان ته اخراج شوی دی.
اخراج د رايو ترلاسه کولو لپاره
د آلمان د مهاجرو له حقونو څخه د ملاتړ ادارې مشر ګهونتر بورکهارت د افغان مهاجرو د وروستي اخراج په اړه د آلمان حکومت پر اعلان سختې نيوکې وکړې. بورکهارت ویلي وو چې هغوی ځکه د انتخاباتو څخه يوازې څو ورځې د مخه دغه کار کوي تر څو وښيي چې د اخراج په مسئله کې جدي دي او په دې ترتيب رايي ترلاسه کړي. سرچينې: آژانسونه، انځورنه د دويچه ویله له آرشیف څخه
