آلمان، اتریش، سویډن، بلغاریا او هنګري د رد شوو پناه غوښتونکو د اخراج له پاره په اقداماتو لاس پورې کړی دی.
د افغانستان د کډوالو او راستنیدونکو چارو وزارت یوه چارواکي د چهارشنبې په ورځ (د ۲۰۲۰م کال د دسمبر۱۶مه) د آلمان خبري آژانس ته ویلي دي چې له اتریش او بلغاریا څخه یوولس اخراج شوي افغانان د چهارشنبې په سهار وختي کابل ته رسیدلي دي.
د کابل هوایي ډګر چارواکو تائید کړې ده چې د چهارشنبې په ورځ په یوه چارتر الوتکه کې له اتریش څخه لس او له بلغاریې څخه یو تن اخراج شوی په چارتر الوتکه کې کابل ته رسیدلي دي.
د یاد خبري آژانس د رپوټ له مخې په پام کې وه چې یوه بله ډله افغانان په همدغه الوتکه کې کابل ته اخراج شي، خو د کرونا ویروس له کبله دا چاره ترسره نه شوه. په سویډن کې د مهاجرو د یوې اتحادیې مشر احمد اکیل خلیل د خپل فیسبوک په یوه پیغام کې لیکلي دي چې د فعالانو له لوري د دغه پرواز مخه ونیول شوه.
په کابل کې دغه افغان چارواکي ویلي دي چې هنګري هم غوښتل ځینې افغانان اخراج کړي، خو دوی اعتراض وکړ، ځکه چې دغه چاره د دواړو هیوادونو ترمنځ د شوي توافق خلاف وه.
آلمان هم په پام کې لري چې د رد شوو افغان پناه غوښتونکي یوه ډله تر نهه میاشتنۍ وقفې وروسته واستوي. ویل شوي دي چې دغه پرواز به د پنجشنبې په ورځ کابل ته وشي.
افغانستان ته د اخراج موضوع شخړه ایزه ده او انتقاد کوونکي وایي چې جګړه ځپلي هیواد ته د پناه غوښتونکو استول ډیر خطرناک دي. د آلمان خبري آژانس د رپوټ له مخې کابو هره ورځ د طالبانو او داعش په بریدونو کې ملکي کسان وژل کیږي.
زموږ له آرشیف څخه:
د جرمني څخه د مهاجرو د اخراج مقررات څه ډول دي؟
د جرمني داخله وزیر د ۱۶ ایالتونو د کورنیو چارو د وزیرانو سره تریوه ویدیو کنفرانس وروسته اعلان وکړ، چي د جنورۍ له اولي څخه به د پناه غوښتني قضیو ته په کتو سره د اخراجیدو په هکله تصمیم نیول کیږي. نور جزيات دلته ولولئ:
انځور: picture-alliance/W. Rothermelد جرمني داخله وزارت وايي، چي د سوریایانو د اخراج د منع کیدو لایحه به تمدید نسي. داخله وزير هورست زېهوفر په دې تړاو مخکي هم څرګندونې کړي وې. خو منتقدین دا د پناه غوښتونکو څخه د ساتني بین المللي حقوقو خلاف بولي. د ویچه ویله دلته د دغي مسألې حقوقي اړخونو ته یوه کتنه کړې ده: هغه مقرره چي د ۲۰۱۲ م کال راهیسي په منظم ډول سره تمدیدیږي، په پام کي لري، چي سوریایان خپل هیواد ته د اخراج څخه وساتي.
په سوريه کي د امنيت نشته والی
په سوریه کي اوس هم جنګ دوام لري. دا په دې معنی ده، چي حتی رد سوي پناه غوښتونکي هم، د مجرمینو په شمول په جرمني کي پاته سي. منتقدین وايي، چي په سوریه کي هیڅ ډول امنیتي شرایط وجود نلري. خو داخله وزیر، هورست زیهوفر د ۱۶ ایالتونو د کورنیو چارو د وزیرانو سره تر یوه ویدیو کنفرانس وروسته اعلان وکړ، چي د جنورۍ میاشتي د اولي څخه به د پناه غوښتني قضیو ته په کتو سره د اخراجیدو په هکله تصمیم نیول کیږي.
ولي د اخراجیدو ممانعت لغؤ سو؟
په جرمني کي د هغو پناه غوښتونکي، چي رد سوي، او یا یې جرمونه کړي وي، (دولدونګ) یا د پاته کیدلو مؤقتي ویزه ورکول کیږي. خو ددغو کسانو پرضد همیشه د ښی اړخو افراطیانو لخوا اعتراضونه کیږي او تر ټولو دمخه د مسلمانانو پر ضد. د ۲۰۱۱ م کال راهیسي د سوریې جنګ، چي تر ۳۸۷ زره اضافه انسانان پکښي ووژل او په ملیونو کسان د وطن پریښولو ته مجبوره سول، ددې سبب سو، چي شکمن کسان هم په جرمني کي پاته سي.
د جرمني په داخله وزارت کي د ساختماني او هیواد ساتني چارو معین، هانس ګیورګ انګلکه پرون جمعه خبریالانو ته وویل:«هغه کسان چي جرمونه کوي او یا تروریسټي اهداف مخته وړي، زموږ دولت او خلګو ته تاوان رسوي او باید د جرمني څخه اخراج سي.» خو د زیهوفر د اظهاراتو پراساس د تقریبأ ۷۷۰ زرو سوریایانو څخه چي په دې وروستیو وختونو کي جرمني ته راغلي دي، فقط تقریبأ ۹۰ کسانو ته یې د خطرناکو کسانو په سترګه کتل کیږي.
د اخراج څخه انتظارات محدود دي
د کرونا دویروس په سبب د سفر پر محدودیتونو سربیره، سوریې ته په نورو دلایلو هم اخراج ممکن ندی: د نیدرساکسن ایالت داخله وزیر، بوریس پستوریس په دې باب وویل،«په سوریه کي هیڅ داسي مؤسسه وجود نلري، چي موږ د هغه سره ډیپلوماتیک روابط ولرو.»په دې دلیل هغه او سوسیال دموکراټ حزب یې سوریې ته د نه اخراج د قاعدې لغؤ کیدل رد او کوښښ یې وکړ، چي هغه د ۶ نورو میاشتو دپاره تمدید کړي.
د یوه رپوټ پراساس آلمان په ۲۰۱۹ م کال کي۲۲۰۰۰ تنه اخراج کړي دي. البانیا، نایجریا، ګرجستان، روسیه او صربستان د هغو هیوادو د جملې څخه وه، چي په همدغه کال کي یې هر یوه ته زر زر تنه اخراج سول. په همدغه وخت کي تقریبأ ۹۳۰ افغانان او ۸۶۰ عراقیان هم اخراج سوي دي. د رپوټ پر بنأ په ۲۰۱۹ م کال کي د اخراجیدو تقریبأ ۴۰ فیصده موارده د اروپا د اتحادیې نورو هیوادو لکه فرانسې او ایټالیا ته تر سره سوي دي.
هغه کسان نباید د جرمني څخه اخراج سي، چي په خپلو هیوادونو کي یې د جنګونو، تعقیب او یا ازار په دلیل ژوند ته خطر موجود وي. په دغه صورت کي د هغوی اخراج د اروپا د بشر د حقوقو د کنوانسیون څخه سرغړونه ده. دغه کنوانسیون د هغوکسانو اخراجیدل هم منع کوي، چي په خپلو هیوادونو کي د شکنجې سره مخامخ کیدلای سي.
