د افغانستان د ملکي هوايي چلند ادارې اعلان کړی دی چې تر څو میاشتو وروسته یو ځل بیا له افغانستانه نړیوالې الوتنې پېل شوې. «ترکش ایر لاینز» په خپل لومړني پرواز کې له ترکیې څخه ۳۵۰ مسافر افغانستان ته ولېږدول.
انځور: picture-alliance/EPA/S. Sabawoon
اعلان
د افغانستان د ملکي هوايي چلند ادارې ویلي دي چې د چهارشنبې په ورځ (د جون ۲۴/ د سرطان څلورمه) افغانستان ته نړیوالې الوتنې پېل شوې. د ترکیې هوایي شرکت په خپل لومړني پرواز کې له دغه هیواده کابل ته ۳۵۰ مسافر انتقال کړل او په پام کې ده چې دوهمه الوتنه د جون میاشتې پر ۲۷مه نېټه ترسره کړي.
د ملکي هوايي چلند ادارې ویاند محمد نعیم صالحي، له دویچه وېله سره په خبرو کې وویل چې نړیوال پروازونه د دوی د ادارې په دستورالعمل د ځانګړو تدابیرو او صحې سپارښتنو په رعایتولو سره ترسره کیږي: «سبا د جون میاشتې پر ۲۵مه د اماراتو هوایي شرکت هم افغانستان ته خپل نړېوال پروازونه پېلوي.»
د دغو الوتنو تر پېلېدو وروسته به، د ترکش هوایي شرکت په اوونۍ کې له درو څخه تر څلورو او د اماراتو هوایي شرکت په اوونۍ کې دوه وارې افغانستان ته تګ راتګ کوي.
د صالحي په خبره داخلي هوایي شرکتونه آریانا او کام ایر هم دوبۍ او ترکیې ته خپل پروازونه پیلوي. د دغې ادارې په وینا هرات، کندهار او مزار ته هم په غیر منظم ډول داخلي پروازونه پیلیږي.
د افغانستان د ملکي هوايي چلند ادارې له ټولو مسافرو او هوایي شرکتونو څخه غوښتي دي چې د دغې ادارې دستورالعمل او د روغتیا وزارت صحي سپارښتنې د سفر پر مهال رعایت کړي.
د کرونا ویروس له خپریدو راهیسې تر درو میاشتو زیاتې مودې څخه په افغانستان کې نړیوال او داخلي پروازونه دریدلي ول. دغه اداره وایي چې د الوتنو له بندید راهیسې د دغي ادارې په عوایدو کې تر دوو میلیاردو افغانیو زیات کمښت راغلی دی. پر دې سربیره آریانا هوایي شرکت ته تر ۱۲ میلیونه ډالر او کام ایر ته تر ۲۰ میلیونه ډالر زیات زیان اوښتی دی.
شکیلا ابراهیم خیل
زموږ له آرشیف څخه:
کرونا؛ د هوايي شرکتونو راتلونکی به څنګه وي؟
د کرونا بحران پر هوايي شرکتونو ډېر ناوړه اغیز کړی دی. د آلمان هوايي شرکت لوفتانزا سره دولت مرسته کوي خو منتقدين پرې خوښ نه دي. خو دمګړۍ د ټولې نړۍ هوايي شرکتونه د حکومتي مرسته په لټه کې دي.
انځور: AP
مرسته په مو کار ده، مداخله نه!
د آلمان حکومت د لوفتانزا هوايي شرکت سره د نهو ميلياردو يورو مرسته کوي. تر دې مرستې وروسته به حکومت د لوفتانزا شرکت د ۲۰ فيصده ونډو مالک وي او دا فيصدي لوړيدی هم شي. د آلمان د اقتصاد وزير پيټر آلتماير روښانه کړې چې له مالي مرستې سره به هم حکومت د شرکت په داخلي پريکړو کې مداخلت نه کوي.
انځور: picture-alliance/dpa/A. Dedert
د سمارت يا ځيرک ونګز ځيرک تړون
د چيک جمهوريت حکومت غواړي چې د چيک هوايي شرکت د سمارت ونګز پر څانګه خپل کنترول ډېر کړي. د چيک جمهوريت د صنعت وزير ويلي چې حکومت د سمارت ونګز بشپړ کنترول په لاس کې اخيستلی شي. خو بل لوري ته د دې شرکت مشر روښانه کړې چې هغه د کرونا بحران په ترڅ کې يوازې د مرستې غوښتونکی دی او نور څه نه غواړي.
انځور: picture-alliance/dpa
لا ډېرې دولتي مرستې ته اړتيا!
د پرتګال ملي هوايي شرکت «ټي پي ای» د خپلې بقا له پاره غواړي چې له حکومته پور واخلي. خو کارکوونکي یې پر مالي مرستو سربيره د لا زيات حکومتي کنترول غوښتونکي هم دي. لومړي وزير د دغه شرکت د دولتي کولو خبره هم کړې ده. حکومت لا دمخه د دې شرکت ۵۰ فيصده ونډې لري.
انځور: picture alliance/M. Mainka
مرستو ته شديده اړتيا
د ناروې د «نارويجين» په نوم ارزان بيه هوايي شرکت په اصطلاح د دولتي مرستو پر مټ په هوا کې دی. د کمپنۍ په جوړښت کې تر تغیراتو وروسته ورسره حکومت د مرستو اعلان وکړ.
انځور: picture-alliance/dpa/M. Mainka
کابو ۵۰ کاله وروسته لومړی تاوان
د سنګاپور هوايي شرکت په خپل ۴۸ کلن تاريخ کې په لومړي ځل روانه اوونۍ د تاوان خبره وکړه ځکه د کرونا د وبا له کبله يې زیاتره الوتکې پروازونه نه کوي. د دې هوايي شرکت ډېره برخه د حکومت تر کنترول لاندې ده خو حکومت ته دا مهمه ده چې شرکت په خپله اداره کې خپلواک وي.
انځور: Singapore Airlines
د خليج هوايي شرکتونه: دولتي مرستې، د تجارت بڼه!
د خليج د اماراتو، اتحاد او قطر دولتي هوايي شرکتونو ته یې سيالان لا له ډېرې اوږدې مودې راهيسې تنقيدي کتنه کوي. نور هوايي شرکتونه ادعا کوي چې د خليج د سيمې دغه درې هوايي شرکتونه د نامحدودو دولتي مرستو په ترلاسه کولو سره غير عادلانه ګټې په لاس راوړي او په دې توګه نور هوايي شرکتونه څنډې ته کوي. خو د کرونا بحران پر دغه شرکتونو هم سيوری غوړولی دی.
انځور: C. Furlong/Getty Images
دولتي کنترول د يورو فلات له پاره نوې خبره نه ده
د ایروفلوت ډله چې د يورو فلایت روسيه او پوبيدا هوايي شرکتونه هم پکې شامل دي، د هغو شرکتونو يو بل مثال دی چې په دولتي مرستو پايي. د دې شرکت ۵۱ فيصده برخه د روسیې په حکومت پورې اړه لري. د ويکيپيديا په حواله د نړۍ کابو ۱۵۰ د هوايي شرکتونو زیاتره برخه په دولتونو پورې تړاو لري. په ټوله نړۍ کې کابو ۵۰۰۰ هوايي شرکتونه موجود دي.