د ننګرهار د کډوالو او بېرته راستنېدونکو چارو ریاست چارواکي وايي، تېره یوه میاشت (جون ۲۰۱۶) کې شاوخوا ۳ زره کورنۍ هېواد ته راستنې شوي دي.

د دغه ریاست د مالوماتو له مخې د قانوني اسنادو لرونکو راستنېدونکو کورنیو هر غړي ته ۴ سوه امریکايي ډالره ورکول کېږي.

د ننګرهار د کډوالو او بېرته راستنېدونکو چارو ریاست وايي، له تېرې یوې میاشتې (جون ۲۰۱۶) راهیسې له پاکستانه د افغان کډوالو راتګ کې ۸۰ سلنه زیاتوالی راغلی.

ځینې راستانه شوي بیا وايي، پاکستان هېواد کې له افغان کډوالو سره ډېر بد چلن کېږي، چې له امله یې ډېری اړ کېږي، چې هېواد ته راستانه شي.

خو یو شمېر هغه راستنېدونکي، چې د کډوالۍ اسناد نه لري، د مرستو له روان بهیره نا خوښه دي او وايي، هېڅ مرسته ورسره نه ده شوې.

هېواد ته راستنه شوې یوه کونډه مېرمن وايي: " هېڅ هم چا نه دي راکړي. راغلو دلته مو ورځ تېره کړه خو چا هېڅ رانه کړل. دلته مو ځای شته خو کور پکې نه شو جوړولی، ځکه وس مو نه کېږي".

د بېرته راستانه شوو مهاجرو د ماشومانو له پاره د ښوونځيو کمښت هم يوه لويه ستونزه ده.

دا مهال پاکستان کې څه دپاسه دوه میلونه افغان کډوال ژوند کوي، چې شاوخوا یو نیم میلون یې ثبت او هغه هېواد کې د اوسېدو قانوني اسناد لري.

د کډوالو او بېرته راستنېدونکو چارو رییس غلام حیدر فقیرزي دویچه ویلې ته وویل، په تېره یوه میاشت کې پر تورخم بندر شاوخوا ۳ زره کورنۍ هېواد ته راستنې شوي، چې د ننګرهار سر بېره د نورو ولایتونو اوسېدونکي هم پکې شته .

افغان چارواکي وایي چې شاوخوا درې میلیونه افغان کډوال په پاکستان کې ژوند کوي چې له ډلې څخه یې یوازې ۱.۴ میلیونه ثبت شوي دي. په دې هیواد کې ۱.۶ میلیونه نور افغان کډوال په غیر قانوني توګه اوسیږي.

په وروستیو وختونو کې د کابل او اسلام آباد تر منځ د اړیکو خرابیدل د دې لامل شوي دي چې پاکستان پر افغان کډوالو فشار ډیر کړي.

د افغانستان د کډوالو او بیا ستنیدونکو وزارت ویلي دي چې له اګست میاشتې له پیل راهیسې شاوخوا درې زره افغان کډوال له پاکستان څخه بیرته خپل هیواد ته ستانه شوي دي.

دې وزارت ویلي دي چې د هغو کډوالو له ډلې چې تازه هیواد ته ستانه شوي دي یوازې ۴۵۰ تنه یې د مهاجرت کارتونه لري. د ملګري ملتونه یوازې هغو کډوالو ته نقدي مالي مرستې ورکوي چې د کډوالو کارت ولري.

پاتې کډوال کارتونه نه لري په ننګرهار ولایت کې د ملګرو ملتونو د کډوالو ادارې ته معرفي شوي چې مرستې تر لاسه کړي.

پاکستاني پولیسو په وروستیو وختونو کې ډیر شمیر افغان کډوال په جبر له دې هیواد څخه اخراج کړي دي. پر دې سربیره یو شمیر نور کډوال بیا په پاکستان کې د وروستیو ترهګرو بریدونو په تړاو د پاکستاني امنیتي ځواکونو له خوا نیول شوي دي.

پاکستان تر اوسه پورې څو وارې د افغان کډوالو د ایستلو له پاره نیټه ټاکلې ده. افغان چارواکي دغه هیواد له کډوالو څخه پر سیاسي ګټه اخیستنې تورنوي.