ميسي چي په ۲۰۱۵م کال کي ئې د اروپا د غوره لوبغاړي تاج هم گټلي، د دغه کال د نړۍ غوره لوبغاړی هم انتخاب سو. دا پنځم واری دئ چي ميسي د نړۍ د فوټبال غوره لوبغاړی ټاکل کيږي. ميسي چي له ۲۰۰۴م کال راهيسي په بارسلونا کي بازي کوي په نژدې یوه لسيزه کي ئې د کول وهلو ډېر ريکارډونه جوړ کړي دي. هغه په ۳۲۸ لوبو کي ۲۹۵ گله وهلي دي.

د ۲۰۱۵م کال فوټبال د غوره لوبغاړي جايزې ته درې کسان ميسي، رونالدو او نيمار انتخاب سوي ول.

رونالدو چي په ۲۰۱۴م کال کي د نړۍ غوره لوبغاړی ټاکل سوی وو، و نه توانېد چي دا ځل هم دغه لقب وگټي. هغه په ۲۰۰۸ او ۲۰۱۳م کال کي هم دغه لقب گټلی وو. رونالدو په ۲۰۰۹م کال کي د ۹۴ ميليونو يورو په ارزښت د هسپانيا ريال مادريد لوبډلي ته ولاړ. دا هغه مهال د فوټبال په نړۍ کي تر ټولو گران لوبغاړی وو. هغه تر اوسه د مادريد له پاره ۲۱۸ لوبي کړي او ۲۳۹ گوله ئې وهلي دي.

برازيلي کاکا هم دغه لقب په ۲۰۰۷م کال کي گټلی وو.

کاناوارو په ۲۰۰۶م کال کي د فوټبال په نړيوالو لوبو کي د ايټاليا نه ماتېدونکی دفاعي مخکښ وو. هغه یوازنی دفاعی لوبغاړی دی چي د نړۍ غوره لوبغاړی ټاکل سوی دئ.

رونالدينو د فوټبال هغه ستوری گڼل کيږي چي له لوبي خوند اخلي. دغه لوبغاړي ته به د لوبي پرمهال مقابله لوبډله گوته په غاښ پاته وه.

زين الدين زيدان هغه نوم دی چي د فرانسې فوټبال په تاريخ کي به له پلاتيني سره هر وخت یاديږي.

رونالدو د ۹۰ لسيزي په منځ کي يو له ډېرو خطرناکو گول وهونکو څخه وو. هغه له برازيل سره دوه واري د نړۍ اتلولي وگټله.

پرتگالی فيگو هم د دغه لقب گټونکی دئ.

برازيلي ريوالدو هم تر ډېره فوټبال وکړ او د برازيل په فوټبال کي ئې ډېر غوره ځای لاره.

وه آ، د افريقا په فوټبال کي تر ټولو پياوړی فارورد بلل کيږي. هغه يوازنی تور پوستی دی چي دغه لقب (د سروزرو توپ) ئې گټلی دئ.

روماريو د برازيل يو له پياوړو فاروردانو څخه شمېرل کيږي. هغه په ۱۹۹۴م کال کي له برازيل سره د نړۍ اتلولي وگټله.

باجو ډېر گړندی او پياوړی ايټالوی فوټبالر وو. هغه هم دغه لقب (د سروزرو توپ) گټلی دئ.

فان باستن د ۸۰ لسيزه په وروستيو او ۹۰ لسيزي په لومړيو کي په نړۍ کي يو له تکړه لوبغاړو څخه وو. هغه په ۱۹۸۸م کال کي له هالند سره د اروپا اتلولي وگټله.

لوتار ماتئوس په ۱۹۹۰م کال کي د آلمان له ملي لوبډلي سره د نړۍ اتلولي وگټله. هغه يوازنی لوبغاړی دی چي د آلمان په ملي لوبډله کي ئې ډېري لوبي کړي دي.