ملا حسن: پاکستان دې د افغانانو د نیولو لړۍ ودروي
۱۴۰۲ آبان ۱۲, جمعه
له هغه وروسته، چي اسلام اباد د دوی له خاوري څخه د ۷.۱ میلون کډوالو د وتلو وخت وټاکی، تراوسه ۱۶۵زره افغانان د یوې میاشتي په موده افغانستان ته ستانه سوي دي.
په کابل کي د طالبانو مشران د پاکستان دغه پرېکړه«ظالمانه» ګڼي.
د طالبانو رئیس الوزرا ملامحمد حسن اخوند نن جمعه په یو ویډیويي پيغام کي د پاکستان پولیس د کډوالو په وړاندي په « ظالمانه کړنو» تورن کړل او زیاته يې کړه، چي «دغه بدنامي» به په تاریخ کي ولیکله سي.
ده له پاکستانهوغوښتله، چي بې له اسنادو افغان کډوالو ته وخت ورکړي، ترڅو په خپله خوښه هیواد ته ستانه سي. نوموړي زیاته کړه:« ښه او بد حکومتونه ځي او راځي، خو د خلکو ترمنځ اړیکي تر قیامته پوري پاتیږي. زه غواړم، چي افغانانو ته وخت ورکول سي، چي په درناوي خپل هیواد ته را ستانه سي.»
ملاحسن اخوند په دغه ویډیويي پیغام کي ویلي، چي ټولو ملکي او نظامي څانګو ته يې امر کړی دی، چي له پاکستان څخه د راستنېدونکو کډوالو ستونزي دي ور حل کړي:«ټولي نظامي او ملکي ادارې مکلفي دي، چي هیواد ته د راستنېدونکو افغانانو د خوراک، پوښاک او نورو اړتیاوو غم دي وخوري.»
اوسمهال په زرهاوو افغانان دپاکستاناو افغانستان پر پوله افغانستان ته د تګ شېبې شمېري، د مرستندویه ټولنو په خبره، د ګڼي ګوڼي صحني ناهیلي کوونکي دي.
په همدې حال کي د طالبانو د دفاع سرپرست وزیر ملا محمد یعقوب اخوند هم په یو ږغیز پيغام کي، چي په ټولنیزو رسنیو کي خپور سوی دی ویلي دي:« پاکستان به ددې کار، چي کوي يې انجام وویني، فکر په کار دی، چي څه کرې هغه به ریبې.»
مجاهد پاکستان له افغان کډوالو سره په بې عدالتۍ تورن کړ اوغواړي، چي د افغانانو د نیولو او شړلو لړۍ ودروي.
د طالبانو د باندنیو چارو د وزارت سیاسي مرستیال شیرمحمد عباس ستانکزی هم له پاکستانڅخه د افغان کډوالو ایستل «غیري انساني سیاست» بولي او له پاکستانه غواړي، چي دغه سیاست بدل کړي او کنه دده په خبره:« کابل اړ دی، چي غبرګون وښيي.»
کارپوهان: د طالبانو ځیني سیاستونه د کډوالو د شړلو سبب سول
د سیاسي چارو کارپوه احمد سعیدي وايي، له هغه وروسته، چي طالبان د تحریک طالبان پاکستان« ټي ټي پي» د له منځه وړلو او له افغانستان څخه د ایستلو په ژمنو کي پاته راغلل او په دې اړه لاس په کار نه سول، نو اسلام اباد د کډوالو په شړلو غواړي، چي د افغانستان له طالبانو یوډول غچ واخلي.
سعیدي ډویچه ویله ته وویل:«طالبانو له پاکستاني چارواکو سره ژمنه کړې وه، چي د ټي ټي پي غړي به له منځه وړي او له افغانستان څخه به يې شړي، خو طالبانو دا کار ونه کړ او دا د دې سبب سو، چي پاکستان د افغانکډوالوایستلو ته ملا وتړله، ترڅو له طالبانو غچ واخلي.»
د سعیدي په خبره، طالبان نه سي کولای، چي له پاکستان څخه ورستنېدونکي افغانان وپالي ځکه دده په قول:«د ژمي په رارسېدو به یوانساني ناورین پېښ سي. طالبان یوشمیر دغه کسان د افغانستان شمال ته لېږي، چي دا قومي حساسیتونه راپاروي او په هیواد کي د ننه به یو لوی کړکېچ رامنځ ته کړي.»
پاکستاني چارواکو د نومبر میاشتي له لومړۍ نېټې څخه د ورکول سوي مهلت د پاته رسېدو سره سم د ټولو هغو باندنیانو، چي ډېری يې افغانان دي له خپل هیواد څه د ایستلو لړۍ روانه کړې ده.
دبشري حقونوفعالان او نړيوال بنسټونه له پاکستان څخه غواړي، چي د بې اسنادو کډوالو د شړلو او نیولو لړۍ ودروي، خو پاکستان دغه غوښتنه نه ده منلې.