د آلمان خبري آژانس د مهاجرو په چارو کې د ملګرو ملتونو د عالي کمشنرۍ له قوله ليکي چې د سپتمبر مياشتې تر پايه پورې ۲۳ زره او ۴۱۹ مهاجر او پناه غوښتونکي يونان ته رسيدلي دي. د ملګرو ملتونه دغه اداره وايي چې د ۲۰۱۷م کال په پرتله سږ کال يونان ته د رسيدلو مهاجرو او پناه غوښتونکو په شمير کې ۱۷ سلنه لوړوالی راغلی دی.
په عين وخت کې د يونان د کورنيو چارو وزارت ويلي دي چې د دغه شمير مهاجرو څخه علاوه د روانې مياشتې (اکتوبر) په لومړنيو څلورو ورځو کې ۵۶۰ تنه مهاجر د آژه سمندرګي له لارې د يونان ټاپوګانو ته رسيدلي دي. آژه سمندرګی د يونان او ترکيې ترمنځ د اوبو يو پخوانی سرحد دی.
د يونان د کورنيو چارو وزارت دغه راز ويلي سږ کال پر دغې لارې يونان ته د رسيدلو مهاجرو شمېر د تېر کال د رسيدلو مهاجرو په پرتله، دوه برابره لوړ دی.
د يونان د مهاجرت د چارو وزير ديمتريز ويتساس د دغه هيواد پارلمان ته وويل چې په ۲۰۱۷م کال کې ۵۵۰۰ مهاجر د آژه سمندرګي له لارې يونان ته رسيدلي ول، په داسې حال کې چې د ۲۰۱۸م کال په يوازې لومړيو ۹ مياشتو کې له دغې لارې شاوخوا ۱۲ زره مهاجر رسيدلي دي.
يونان غواړي په ټاپوګانو کې د منتظرو مهاجرو شمير تر لس زرو راښکته کړيانځور: DW/D. Cupolo ويتساس زياته کړه چې يوناني چارواکي په پام کې لري چې له ټاپو ګانو څخه ډير مهاجر وچې ته انتقال کړي.
د رپوټونو په حواله له ټاپوګانو څخه وچې ته د مهاجرو د ايستلو يو دليل دا دی چې په ټاپوګانو کې د کمپونو له وړتيا څخه دوه برابره ډير مهاجر ځای پر ځای کړل شوي، چې له امله يې د کمپونو وضعيت ډير خراب شوی دی. د يونان حکومت دغه هيواد ته رسیدلي مهاجر په لومړي سر کې په دغو کمپونو کې ساتي.
د يونان د ساحلي ساتونکو په حواله، په تيرو لسو ورځو کې له ۲۰۰۰ څخه ډير کسان د يونان شمالي او مرکزي کمپونو ته ليږدول شوي او ۱۹ زره نور بيا وچې ته د انتقال په انتظار کې دي.
د يونان حکومت په پام کې لري چې د هغو مهاجرو شمير چې د آژه سمندرګي په ټاپوګانو کې د انتظار په حال کې ژوند کوي، لس زرو ته راښکته کړي.
له آرشيف څخه يو انځوريز البوم:
د یونان او ترکیې تر منځ مرګونی سیند
مهاجر یوازي له ترکيې څخه يونان ته د آژه سمندرګي له لاري د تګ هڅه نه کوي، بلکي د ایوروس یا ماریتسا سیند له لاري هم یونان ته ځانونه رسوي. خو په دغه هڅه کې تل انسانان خپل ژوند بايلي.
انځور: DW/M.Karakoulakiد ایوروس سیند پر څنډه په یوناني ژبه پر لوحه باندي لیکل شوي دي چې«احتیاط سرحد دی. د سیند په بله ژۍ ترکیه ده». د روان میلادي کال په اوږدو کې په زرونو مهاجرو هڅه کړې ده چې د خپل ژوند په بیه له دغه سینده په تیریدو سره اروپا ته ځانونه ورسوي.
یوازې په روان میلادي کال کې د یونان د ایفورس سیند په څنډه کې ۲۹ جسدونه موندل شوي دي. په وروستیو کې د یوه ۱۵ کلن ماشوم مړی موندل شوی وو. د موندل شوو مهاجرو جسدونه د یونان د الکساندرپولي ښار روغتون ته لیږدول کیږي. اوسمهال د روغتون په مرده خانه کې تر لسو زیات جسدونه پراته دي.
د روغتون په انګړ کې یخچالي کانتینر. دغه کانتنیر د سره صلیب نړیوالې کمېټې له لوري د روغتونو په اختیار کې ورکړل شوی دی. ځکه چې د السکاندرپولي روغتون د دې وړتیا نه درلوده چې د ډیرو مړو شوو مهاجرو جسدونه وساتي.
کله چې ښکاریان، کب نیونکي یا سرحدي چارواکي په سیند کې کوم مړی وویني، لومړی پولیس د تحقیقاتو په موخه دغه ځای ته رسیږي او انځورونه اخلي. تر هغې وروسته مړي د عدلي طب څیړنو له پاره وړل کیږي، چیرې چې پاولوس پاولیدیس، د مړي پر بدن نخښې نښانې لکه تاتو یا خالونه تشخیصوي او د جسد د ډې ان اې، نموني اخلي.
د پاولس د معلوماتو له مخې په دغه سیند کې زیاتره موندل شوي کسان ډوب شوي وي. خو ځيني بيا د یخنۍ له کبله مړه شوي وي. د هغه په خبره په وروستیو کې د سړک او اورګاډي د پيښو په ترڅ کې د انسانانو مړینه زیاته شوې ده.
هغه شخصي شیان چې له جسدونو سره موندل شوي په پلاستیکي کڅوړو کې ساتل کیږي، څو د تشخیص پر مهال ترې کار واخیستل شي.
دا دردونکې پروسه ده چې د مړو شوو مهاجرو پاته شوي شیان په نخښه شي او په کڅوړو کې واچول شي. زیاتره دغه شیان هغه څه وي چې په اوبو کې له منځه نه ځي.
هغه شیان چې له منځه نه ځي
زیاتره موندل شوي شخصي توکي چې د مهاجرو له جسدونو سره موندل کیږي د سرو یا سپینو زرو ګوتې او غاړگۍ وي. پاولس پاولیدیس وایي: «جامې او رسمي اسناد لکه پاسپورتونه زیاتره مهال په اوبو کې له منځه ځي.»
زیاتره مهال له مړو شوو مهاجرو سره داسي شیان موندل کیږي چې د هغوی له مذهب سره تړاو لري، لکه د بیلګې په توګه د څرمنې دغه ځانګړی کمربند. دا کمربند ښيي چې د دې کمربند تړونکی کس له افریقا سره تړاو لري. که چیرې یو کس وپيژندل شي د هغه پاته شوي شیان د هغه د کورنۍ غړو ته ورکول کیږي، البته د امکان په صورت کې.
که چیري د یوه مړه شوي مهاجر پيژندنه یا بیرته خپل اصلي ټاټوبي ته استول امکان و نه لري، نو بیا د یونان اړونده چارواکي هغوی خاورو ته سپاري. یا هغوی په زیدرو کې د مسلمانانو په هدیره کې او یا هم په اورستیادا کې د عیسویانو په هدیره کې ښخوي. ۲۱ کلن مطفی رهوان، چې د سوریې د حلب ښار اوسیدونکی وو دغلته ښخ دی.
