په روانه اونۍ کې د ملګرو ملتونو له لوري په یوه تازه خپاره شوي رپوټ کې ویل شوي چې تحریک طالبان پاکستان په افغانستان کې له داعش ډلې سره اړیکې لري او په ځینو مواردو کې یې جنګیالي له داعش ډلې سره یوځای شوي دي. د افغانستان حکومت تر اوسه پورې په دې هکله رسمي تبصره نه ده کړې.

د ملګرو ملتونو په دغه تازه رپوټ کې همدا راز راغلي چې په افغانستان کې د داعش د خراسان ډله د افغان امنیتي ځواکونو، ناټو او امریکايي ځواکونو او په ځینو مواردو کې د طالبانو له لورې سخته ځپل شوې ده. دغه رپوټ د ملګرو ملتونو د تحلیل او د بندیزونو د څار څانګې چمتو کړی دی. د ملګرو ملتونو دغه څانګه، په ټوله نړۍ کې د ترهګریزو ډلو فعالیتونه او شبکې څاري.

د ملګرو ملتونو رپوټ په افغانستان کې د داعش جنګیالیو شمیر شاوخوا ۲۲۰۰ جنګیالي اټکل کړی دی. په رپوټ کې همدا راز ویلي شوي چې د دوی څارونکو داسې رپوټونه او معلومات هم ترلاسه کړي چې د داعش دلې جګپوړي قوماندانان ابو قطیبه او ابو حجر العراقي هم په دې وروستیو کې له منځني ختیځ څخه افغانستان ته تللي دي.

په داسې حال کې چې داعش ډله د پلازمینې کابل په ګډون د هیواد په یو شمیر سیمو کې د خونړیو بریدونو د ترسره کولو وړتیا لري، دغه ډله د ناراضه طالب جنګیالیو د جذب له پاره يو مرکز هم شمیرل کیږي.