پر اسرائیل د ایران له حملې وروسته د یکشنبې په ورځ د ملګرو ملتونو د امنیت شورا بیړنۍ غونډه بې نتیجې پای ته ورسیدله. په ورته وخت کې ملګرو ملتونو خبرداری ورکړی چې د غچ اخیستونکو اقداماتو سره به په سیمه کې کړکیچ لا زیات شي.
انځور: Fatih Aktas/Anadolu/picture alliance
اعلان
ایران او اسرائیل دواړو یو بل د منځني ختیځ د امنیت له پاره خطر وبلل. د اسرائیل په غوښتنه د اپریل پر ۱۴ نیټې د ملګرو ملتونو د امنیت شورا بیړنۍ غونډه بې نتیجې پای ته ورسیدله.
اسرائیل د ایران له خوا پر خپل هیواد د تقریباً ۳۰۰ توغندیو او بې پیلوټه الوتکو د برید په غبرګون کې د امنیت شورا بیړنۍ غونډه بللې وه. په دې جریان کې د ملګرو ملتونو سرمنشي انتونیو ګوتېرش ټولو هیوادونو ته خبرداری ورکړ چې د ایران پر وړاندې له غچ اخیستونکو اقداماتو سره به په سیمه کې کړکیچ لا زیات شي.
نوموړي پر اسرائیل د ایران برید او په ورته وخت کې په دمشق کې د ایران پر قونسلګرۍ بریدونه وغندل او ویې ویل چې د ملګرو ملتونو منشور د هر هیواد د ځمکنۍ بشپړتیا پر وړاندې له زور څخه کار اخیستنه منع کوي.
نوموړي دغې غونډې ته په وینا کې وویل: «منځنی ختیځ د پاشل کیدو په درشل کې دی او سیمه د ناورین زیږونکي جګړې له خطر سره مخامخ ده. اوس د دې وخت را رسیدلی دی چې تاوتریخوالی راکم کړای شي او له زغم څخه کار واخیستلی شي.»
ګوتېرش وویل: «نه هم سیمه او نه هم نړۍ نوره جګړه زغملی شي او اوس د بربادۍ له څنډې څخه د ځان ژغورنې وخت را رسیدلی دی.»
ایران ویلي دي چې دغه برید یې په دمشق کې د دوی پر سفارت د شوي حملې په ځواب کې کړی دی. په ملګرو ملتونو کې د ایران سفیر امیرسعید ایراوني وویل: «ایران د خپل ځان د دفاع له اساسي حق څخه کار اخلي.»
د ایران سفیر وویل: «امنیت شورا د نړیوال امنیت او ثبات ساتلو په برخه کې خپل مکلفیت پوره کولو کې پاتې راغلې ده. له دې امله له تهران سره د ځواب ورکولو پرته بله چاره نه وه. هیواد یې تاوتریخوالی یا جګړه نه غواړي، خو د هر ډول خطر او ظلم ځواب به ورکوي.»
نوموړي زیاته کړه: «اوس د دې وخت را رسیدلی دی چې ملګري ملتونه خپل مسئولیت پوره کړي او نړیوال امنیت او ثبات ته له متوجه حقیقي خطرونو سره مقابله وکړي.»
د ایران سفیر پر اسرائیلو شدیده نیوکه وکړه او خبرداری یې ورکړ چې که امریکا د ایران پر وړاندې نظامي اقدامات پیل کړل، نو ایران به د مناسب غبرګون له خپل حق څخه استفاده وکړي.
اعلان
اسرائیل: ایران باید درنه بیه پرې کړي
په ملګرو ملتونو کې د اسرائیل سفیر ګیلاد ایردان، ایران د نړیوالو قوانینو پر نقضولو تورن کړ. نوموړي د امنیت شورا له غړو څخه یو وار بیا پر ایران د بندیزونو لګولو او سپاه پاسداران د ترهګر سازمان بللو غوښتنه وکړه.
ګیلاد ایردان وویل: «د ترهګرۍ نړیوال تمویلونکی د سیمې او نړۍ د بې ثباته کوونکي په توګه خپله اصلي څېره ښودلې ده. له دې امله د امنیت شورا دې د ایران سپاه پاسداران یو ترهګر سازمان وبولي او مخکې له دې چې ډیر ناوخته شي پر ایران دې ټول ممکنه بندیزونه ولګوي.»
سپینې ماڼۍ د ایران پر وړاندې د اسرائیل له خوا په هر ډول احتمالي ځوابي عملیاتو کې د ګډون نه کولو خبره کړې ده. د سپینې ماڼۍ د ملي امنیت ویاند جان کربي د NBC شبکې په یوه پروګرام کې وویل: «موږ نه غواړو چې له ایران سره جګړه زیاته شي. ولسمشر بایدن ویلي دي چې نتانیاهو ته یې ویلي دي چې امریکا به له اسرائیل سره له خپل ځان څخه د دفاع په برخه کې خپله مرسته جاري وساتي، خو هغه له ایران سره جګړه نه غواړي.»
جان کربي زیاته کړه: «ولسمشر بایدن څو ځله ویلي دي چې موږ په سیمه کې د جګړې پراخول نه غواړو. موږ له ایران سره جګړه نه غواړو او زه فکر کوم چې دا نظر په خپل حال پریږدم.»
آژانسونه: ش.ن/ ن.ز
د ايران او اسرائيل پټه جګړه په انځورونو کې
په داسي حال کې چې عربي ملکونه له اسرائيل سره د فلسطين پر سر خپلې ترینګلې اړیکي پای ته رسوي، د ايران او اسرائيل د «پټې» جګړې لمبې هره ورځ له يوې ګوښې راپورته کيږې. د ايران او اسرائيل پټه جګړه په دې انځوريز راپور کې:
انځور: Reuters/WANA/N. Tabatabaee
پټه جګړه
په داسې حال کې چې په ايران کې د بيرغ جوړولو کارخانې په مظاهرو کې د بیرغ سوزولو او تر پښو لاندې کولو له پاره د اسرائيل بيرغونه تولیدوي، عربې هيوادونه مخکې له مخکې خپلې خصمانه اړيکې له اسرائيل سره د فلسطين په اړه پاې ته رسوې.
انځور: Reuters/WANA/N. Tabatabaee
د نطنز پر تاسیساتو پرله پسې بريدونه
د «تکنالوژۍ هستوي ملي ورځ» او د نطنز د تاسيساتو بيا رغولو څخه يوه ورځ وروسته يې د بريښنا پر سیستم برید وشو. د ایران د هستوي انرژۍ رئيس علي اکبر صالحې دا بريد د «هستوي ترهګرۍ» په نامه یاد کړ.
انځور: picture-alliance/Tampa Bay Times
سمندري جګړه
رسنيو د اپريل پر اومه نېټه د «ایران ساويز» پر بیړۍ د برید خبر ورکړ. نيويارک ټايمز، دغه حمله د اسرائيل له خوا ګنلې وه او ليکلې يې ول، چې دغه برید د لوري او هلپوس رې په نامه د اسرائيلو پر سوداګریزو بیړیو باندي د بريد په ځواب کې شوی دی.
انځور: Planet Labs Inc/AP/picture alliance
له ليري څخه د فخري زاده ترور
د ايران د دفاع وزارت معاون او د پوځ مشر محسن فخری زاده، چې په اتمي پروګرام کې له ګډون مخکې يې له حسن تهراني سره شمالي کوريا ته سفر وکړ او د ايران د توغندیو پروګرام بنسټ يې کيښود. هغه په يوه چاودنه کې وويشتل شو. د ده د مړيني په هکله د اسرائيلو لومړي وزير بينيامین نتانياهو ويلي وو:«د هغه نوم په ياد کي وساتئ».
اسرائيل د ايران اسلامي جمهوريت د عراق او سوريې له لارې د لبنان په سويل کې حزب الله ته د نظامي تجهيزاتو په رسولو تورنوي او تل په دغه سيمو کې د «ایران متحد حزب الله» پر مرکزونو بريدونه کوي.
