د ملگرو ملتو په حواله په سوریه کې د اوږدې مودې د واکمن بشار الاسد له راپرځېدو نهه میاشتې وروسته یو میلیون انسانان بیرته دغه جگړه ځپلې هیواد ته ستانه سوي دي. د ملگرو ملتو له کډوالو څخه د ملاتړ ادارې  UNHCR په ژنيو کې ویلي دي چې علاوه پردې د تیر کال د ډسمبر له پیل راهیسې یو اشاریه ۸ میلیونه داخلي بې ځایه سوي هم خپلو ټاټوبو ته ستانه سوي دي. 

د نوموړې ادارې په حواله بیرته ستنیدونکي کسان په خپل هیواد کې له ویجاړو سویو کورونو، ډیر لږو کارځایونو او یوه بې ثباته راتلونکي سره مخامخ کیږي. د ملگرو ملتو د کډوالو د ادارې عالي کمیشنر، فیلیپو گراندي له نړیوالې ټولنې، شخصي سکټور او په بهر کې سوریایانو څخه غوښتي دي چې د هیواد له بیا رغونې څخه لا زیات ملاتړ وکړي.

په میلیونو نور بې ځایه سوي کسان

ګراندي ویل: «موږ ډیر کم فرصت په لاس کې لرو چې په نړۍ کې د کډوالو له بحرانونو څخه یو حل کړو.» د ملګرو ملتونو د مهاجرو د عالۍ کميسارۍ په حواله په سوریې کې په اوس وخت کې لاهم له اوه میلیونه څخه ډېر انسانان د داخلي کډوالو په توگه ژوند کوي. او نور څه د پاسه ۴،۵ میلیونه په بهر کې د مهاجرو په توگه شپې او ورځې تیروي.

خو د ملگرو ملتونو د کډوالو د ادارې د سروې د معلوماتو له مخې، د سوریې د کډوالو لویه برخه چې د عربي هېوادونو له خوا منل سوې ده، غواړي بیرته خپلو ټاټوبو ته ستانه سي. اسد له اوږدې کورنۍ جگړې وروسته په دسمبر کې له واکه وغورځول سو. سوريه چې شاوخوا ۲۳ میلیونه نفوس لري، اوس د لنډمهاله ولسمشر الشرع په مشرۍ د انتقالي حکومت له خوا اداره کیږي. الشرع د اسلامي ډلې حیات تحریر الشام (HTS) مشر و، چې د یاغیانو هغه اتحاد یې رهبري کاوه چې بالاخره یې اسد رانسکور کړ.