دا د عراق په سنجار ښار کي د تروريستي ډلي «اسلامي دولت» کشف سوي تونلونه دي.

سنجار ښار د روان کال د نوامبر مياشتي په مينځ کي کردي ملېشو د «اسلامي دولت» ډلي له جنگياليو څخه ونيو.

سنجار ښار د ۲۰۱۴م کال له دوبي راهيسي د تروريستي ډلي «اسلامي دولت» په کنترول کي وو.

له اسلامي دولت ډلي څخه د سنجار ښار تر نيولو وروسته يوه تونل ته د ننوتلو لار.

په سنجار ښار کي د تروريستي ډلي «اسلامي دولت» تونلونه.

په دغو تونلونو کي برېښنا او د خوب خوني هم وې.

د ۲۰۱۴م کال په دوبي کي پر سنجار ښار باندي د يرغل پرمهال په زرونو ايزديان غرونو ته وتښتېدل. ښار ټول تروريستي ډلي «اسلامي دولت» ونيو.

په دغه وخت کي د ايزديانو په زرونو نارينه د تروريستانو لاس ته ورغلل ووژل سول او په زرونو ښځي او کوچنيان ئې وتښتول.

يوه محلي چارواکي ويلي دي، احتمال سته چي «اسلامي دولت» ډلي به يوازي ځواني ښځي ساتلي وي او نور ټول به ئې اعدام کړي وي. دغي ډلي له ايزدۍ ښځو د مينځو کار اخيست او هغوی به ئې بيا پلورلې.

په سنجار ښار کي د تروريستي ډلي «اسلامي دولت» تونلونه.

دښمن همدلته باید وي. کردې جنګیالۍ حسیبه نوزاد د یوه دوربین له لاري موصل ښار ته نژدې پر هغه سرحد نظر اچوي چې دغه کردي سیمه د داعش تر کنترول لاندي سیمو څخه جلا کوي. کردي جنګیالي د عراق پوځ سره یوځای د پرمختګ په حال کې دي.

دښمن لیدل شوی اوس باید پرې ډزونه وشي. حیسبه نوزاد د خپلې ایزیدۍ همکاري عاصمه داهر او نورو همکارانو سره د داعش ډلي ترهګر په نخښه کوي. دښمن ته یوازې د هوا له لاري ماته نه شي ورکول کیدای. له دې کبله کردۍ او ایزیدۍ ښځې هم د ځمکني مقاومت په لومړۍ لیکه کې شاملې دي.

په دقیقه توګه د په نخښه کولو له پاره په ښه توګه لیدل اړین دي. له همدې امله ویښتان هم باید ښه ټول شي. حسیبه هم خپل ویښتان چوټي کوي. دغه «پوځي مود» چې د لویدیځ مجلې ورته کله کله د خوند له پاره په خپلو ګڼو کې ځای ورکوي په عراق او سوریه کې یو دردونکي حقیقت منعکسوي.

عاصمه داهر، په جګړه کې د دمې پر وخت. له هغې سره یو سور خیرسک ورسره دی. دا ښايي د هغې له پاره د ۲۰۱۴م کال تر یرغل د مخه د سوله ایز وخت یو سمبول وي چې د داعش ډلې د برید وروسته پای ته ورسید. دا د ډیرو ایزیدۍ میرمنو له پاره د کړاونو او خپلو کورنیو او د هغه څه له لاسه ورکولو د وخت پیل وو چې پر دوی ګران وو.

د افراطي ډلي «اسلامي دولت» (داعش) جنګیالو پر کمزورو هم رحم ونه کړ. د ۲۰۱۴م کال په دوبي کې په زرونو کسان تیښتې ته اړ خو په بې رحمه ډول تعقیب شول. د یوه سپين ږيري سړي او د ده سره د ملو ښځو دغه انځور دوه کاله ترمخه په ټوله نړۍ کې د ایزیدانو د کړاو په یوه سبمول واوښت.

دغه ایزیدۍ نجلنۍ نه غواړي خپله څیره وښيي. د ۲۰۱۴م کال په دوبي کې دا وتښتول شوه او په زور یوه جنګیالي ته واده شوه. دوې میاشتې وروسته دغه ۱۵کلنه په تېښته بریالۍ شوه. اوس دا له خپلې کورنۍ سره ده او د هغه څه په اړه کیسې کوي چې د ویلو وړ نه دي.

افراطيانو د سوریې شمالي ښار عین العرب چې د ترکیې پر سرحد پروت دی، څو میاشتي کلابند کړی وو. دغلته کردانو سخت مقاومت وکړ او په پای کې یې د امریکا په مشرتوب ائتلاف د هوايي بریدونو په مټ بری ترلاسه کړ. خو دغه جګړو ښار له خاورو سره خاورې کړ.

داعش د هر هغه چا ضد ده چې ایډیالوژي یې نه مني. دغه ډله د تقسیم په اصل عمل کوي او هڅه کوي بیلا بیل مذهبونه او نژادي لږکۍ یو د بل پر ضد وپاروي. خو دوی تل نه کامیابیږي. کردي او ایزیدي ښځي ژورې ملګرتیاوې لري او دغه ډله یې په دې توګه په سمبولیک ډول ماته کړې ده.

داعش لا له پوځي اړخه ماته نه ده خوړلې. د عراق او سوریې ډیري سیمې یې اوس هم په ولکه کې دي. کرداني او ایزیدانې به هم خپلې جګړې ته دوام ورکوي. خو دوی ترهګرو ته یو سبق هم ور زده کړی هغه دا چې ښځي په هیڅ صورت هم مریاني نه دي.