ملګري ملتونو په خپل يو تازه رپوټ کې ويلي دي چې داسې معتبر شواهد ېې موندلي چې ښيي د اسرائيل پر جنوب د اکتوبر میاشتې پر ۷مه د حماس ډلې د حملې پرمهال جنسي تيري شوي دي.
د حماس حملې پر مهال جنسي تاوتريخوالو شواهد په شخړو کې د جنسي تاوتريخوالو ته د رسېدګۍ له پاره د ملګرو د ځانګړۍ استازې، پراميلا پاتن، په مشرۍ يو ټيم موندلي دي. مېرمن پاتن دغه رپوټ د دوشنبې په ورځ د ملګرو ملتونو سازمان ته سپارلی دی. په هغه کې راغلي دي چې دوی «منطقي دلايل» موندلي چې باور پرې کيږي حماس ډله د جنسي تيري او «جنسي شکنجې» مرتکب شوې ده.
د اسوشتید پریس په حواله، د ملګرو ملتونو ټيم د دغو جنسي تاوتريخوالو له هېڅ قرباني سره د «منظمو هڅو او د همکارۍ له پاره د هغوی د هڅولو باوجود،» نه دي کتلي. پاتن وايي چې اکثره دغه شواهد غیرمستقیم دي.
د ټيم مشره وايي چې په دې تړاو ېې د اکتوبر ۷مې حملې څخه ژغورل شوو کسانو، شاهدانو، آزاد شوو یرغملو، روغتيايي کارکوونکو او نور سره مرکې کړي دي.
دغه رپوټ پر اسرائيل د اکتوبر ۷مې حملې څخه نژدې ۵ میاشتې وروسته خپريږي.
د ملګرو ملتونو په رپوټ کې راغلي چې داسې معتبر شواهد ېې موندلي چې ښيي حماس ډلې پر اسرائيل د اکتوبر ۷مې حملې پر مهال جنسي تاوتريخوالي کړيانځور: Jack Guez/AFP/Getty Images په دغه حمله کې شاوخوا ۱۲۰۰ کسان ووژل شول او شاوخوا ۲۵۰ نور يرغمل ونيول شول. تر دغې حملې وروسته د غزې تړانګه تر اوسه د اسرائيل ځواکونو د شدیدو حملو شاهده ده. د غزې د روغتیا وزارت په خبره، د اسرائيل په دغو حملو کې تر اوسه تر ۳۰زرو ډېر کسان وژل شوي دي. د قربانيانو دغه شمېرې تر اوسه پوري د کومي خپلواکي سرچينې له خوا تائيد شوي نه دي. ملګري ملتونه وايي د غزې څلورمه برخه، ۲.۳ ميلیونه، اوسېدونکي له لوږۍ سره مخ دي.
په خان یونس کې تلفات
فلسطيني چارواکو وايي د غزې په جنوبي ښار خان يونس کې د اسرائيل ځواکونو په حملو کې ۱۷ کسان وژل شوي دي. سرچینه وايي چې د تېرو ۲۴ ساعتونو په جریان کې ټول ټال ۹۷ کسان وژل شوي دي.
د پېښې ځای ته یو نژدې اروپايي روغتون د سه شنبې په ورځ وويل چې د شپې ېې د ۱۷ مړو جسدونه ترلاسه کړي دي.
په یوه خپره شوې وېډيو کې مرستندویان ښکاري چې د یو تخریب شوي کور له کنډوالو څخه ټپيان راباسي چې په هغو کې يو ویني شوی ماشوم چې حرکت نه کوي، هم شامل دی.
امریکا متحده ایالات غزې ته د مرستو پر رسولو ټينګار کوي - فلسطينيان د امریکايي الوتکو څخه په پراشيوټونو کې غورځول شوو خوراکي مواد پسې د منډو په حال کې انځور: AFP د اوربند له پاره هڅې
په عین حال کې په غزه کې د اوربند د رامنځ ته کېدو په موخه ديپلوماتيکې هڅې ادامه لري.
د اسرائيل د کابېنې یوه لوړپوړي چارواکي په واشنګنټن کې له امریکايي چارواکو سره کتلي، په مصر کې هلې ځلې روانې دي چې د روژې میاشتې تر رارسېدو مخکې په غز کې اوربند رامنځ ته شي.
زیاته شوې چې د جوبایدن مرستيالي کاملا هېرس د اسرائيل د پلاوې کوربه وه. دغه کتنه داسې وخت کيږي چې امریکا متحده ایالات غزې ته د لا ډېرو مرستو پر رسولو ټينګار کوي.
آژانسونه/م.ک.ص./ن.ز.
له آرشیف څخه:
د مرګ او ژوند په منځ کي د غزې د فلسطینیانو انځوریز راپور
غزه د بشري ناورین په درشل کي ده. د اکتوبرمیاشتي پر اوومه نېټه د حماس د ترهګریزو بریدونو په ځواب کي د اسرائيل د ځوابي بریدونه دوام لري، په غزه کي د وژل سویو او ټپیانو شمېر مخ پر ډېرېدو دی. انځور: Fatima Shbair/AP/picture alliance د اسرائيل درانه ځوابي بریدونه پر اسرائيل د حماس د ناڅاپي تروریستي بریدونو په دوام، دغه هیواد هم پر غزه هوايي بریدونه وکړل چې د حماس ډلي په کنترول کي ده. اروپايي ټولنه، امریکا متحده ايالات او ځيني نور هیوادونه حماس تروريستي ډله ګڼي. د اکتوبر پر نهمه دوشنبه د اسرائيل لومړي وزیر بنیامین نتانیاهو وویل: «کوم څه، چي به موږ په راتلونکو ورځو کي له خپلو دوښمنانو سره کوو د دوی د راتلونکو نسلونو له پاره به لکه زنګ داسي وي.»
انځور: Belal Al SabbaghAFP/Getty Images د ملګرو ملتونو د بشري مرستو د همږغۍ دفتر(OCHA) په وینا نژدې ۸۰۰ تعمیرونه یومخ ویجاړي سوي دي او په سونو نور د اسرائيل په هوايي بریدونو کي تاواني سوي دي. راپورونه وايي، چي په سونو زره کسان اوبه نه لري.
انځور: Mohammed Talatene/dpa/picture alliance د پاته سویو کسانو په لټه کي د اسرائيل په هوايي بریدونو کي د غزې تراډي په شمال کي د جبالیه کډوالو پنډغالي له منځه تللي او ژغورونکي کوښښ کوي، چي پاته سوي ژوندي کسان وژغوري. هغه شمیرې چي د پنجشنبې په ورځ خپرې سوي دي، د دواړو لوریو قربانیان تر۲۵۰۰ زیات دي. لږ تر لږه ۱۲۰۰ اسرائيليان او ۱۳۰۰ فلسطینیان وژل سوي دي په زرهاوو کسان ټپیان دي.
انځور: Mahmud Hams/AFP/Getty Images مړي په یوه موټر کي وړل کیږي او یوه فلسطینۍ ښځه بوغاري وهي . په غزه کي د روغتیا مسؤلان وايي تر ۱۴۰ ډېر کوچنیان او ۱۰۰ ښځي وژل سوي دي.
انځور: Said Khatib/AFP/Getty Images فلسطینیان په یوه زاړه مني بس موټر کي د اسرائيل له انتقامي هوايي بریدونو څخه تښتي. د ملګرو ملتونو د یو راپور پربنسټ په غزه کي ۱۸۷ زره کسان بې ځایه سوي دي. ۱۳۷ زره کسانو د ملګرو ملتونو په ښوونځیو کي او ۴۰ زره په شخصي کورونو کي پنا اخیستې ده. امکان نه لري، چي د غزې تراډه دي یومخ پرېږدي. اسرائيل دغه سیمه محاصره کړې او د مصر لار يې هم تړلي دي.
انځور: Saleh Salem/REUTERS اسرایلي ځواکونه د غزي تراډي پوله خپله مهاروي د اسرائيل ځواکونه د غزې تراډي پر پوله ګزمه کوي. د حماس ډلي وسله والو د اکټوبر مياشتي پر اوومه پر پوله د اسرائيل درول سوی کټارې ماتي او دغه هیواد ته له ور اوښتلو سره یې عملیات شروع کړل، چي ډېری قربانیان يې ولسي وګړي ول. اسرائيل په ۱۹۹۴م کال کي د غزې پر پوله اغزن تار وغځاوه. په غزه کي د مصر سره پر پوله هم اغزن سیم درول سوی دی.
انځور: Oren Ziv/AP/picture alliance د غزې پر پوله اسرائيلي ځواکونه اسرائيل ۳۰۰ زره ریزرف ځواکونه چمتو کړي دي. د غزې اوسیدونکي ویره لري چي اسرائيل به مځکني عملیات شروع کړي. د غزې پولي ته د اسرائيل زغروال موټر او پوځي تجهیزات لېږل سوي او پولي ته څېرمه د اسرائيل ښارګوټي یومخ تش سوي دي.
انځور: Ilia Yefimovich/dpa/picture alliance په غزه کي انساني ناورین ته انتظار جان ایګلنډ د ناروې د کډوالو د شورا (NRC) عمومي منشي له CNN سره په مرکه کي خبرداری ورکړ، چي په غزه کي یو انساني ناورین سترګي په لار دی. «د بېلګي په ډول که چیري په روغتونونو کي د برېښنا د نشتوالي او لوږي له لاسه کوچنیان ومري، دا به جنګي جنایتونه وشمېرل سی.»
انځور: Mahmud Hams/AFP/Getty Images یحیی سنوار، په غزه کي د حماس د سیاسي دفتر مشر یحیی له ۲۰۱۷م کال راهیسي په غزه کي د حماس تروریستي ډلي مشر دی. هغه پر اسرائيل د برید له طراحانو څخه ګڼل کیږي. سنوار، چي د کډوالو په پنډغالي کي لوی سوی دی، ویلي دي: «موږ دا غوره ګڼو، چي شهیدان سوو، د دې پرځای، چي تر ظلم او سپکتیا لاندي ومروو.»
انځور: Mohammed Abed/AFP د حماس ویاند خبري اژانسونو ته ویلي دي چي هر واري چي اسرائيل بیله خبرتیا پر غزه بمبار وکړي یو نیول سوی اسرائيلی به وژل کیږي. په داسي حال کي چی د اسرائيل د باندنیو چارو وزیر الی کوهن ګواښ وکړ چي دا ډول کړنی به هیڅ ونه بخښل سي. حماس پر اسرائيل باندی د برید پرمهال په لسهاوو اسرائيليان له ځان سره ژوندي بیولي دي.
انځور: Mahmud Hams/AFP/Getty Images
