ګامبا زیاته کړه چې دا به ډير وخت ونیسي څو دغه تنکي ځوانان بيرته په خپلو پخوانيو کليو او ښارونو کې عادي ژوند وکړای شي.
پای لا نه ترسترگو کيږي
د نړۍ په هغه ټولو شلو شخړو کې، چې د ملگرو ملتونو د ماشومانو اداره یې څاري، تر اوسه هم کم سنه کسان جلبيږي او يا هم په زور جنگ ته اړيږي. گامبا وویل: «دا ماشومان د ډارونکي زور زياتي شاهدان دي.» د ملګرو ملتونو دغې چارواکې زیاته کړه: «دا زموږ مکلفيت دی چې دوی ته وښيو چې په امن او ثبات کې د ژوند او د سولې هیلې هم شتون لري.»
د ملگرو ملتونو په حواله اوس مهال په ټوله نړۍ کې په جگړو کې ښکيلې ۶۱ ډلې له ماشومانو څخه په تيره بيا د جنگيالو په توگه او يا هم د پيغام رسوونکو، آشپزانو او يا د جنسي مريانو په توگه کار اخلي. تر ټولو زيات په سوریه، عراق، جنوبي سوډان، سوماليا او کانگو کې وضعيت خراب دی.
د ادغام له پاره هلې ځلې
د ملگرو ملتونو ځانگړې استازې ويرجينيا گامبا د نړۍ پر دولتونو غږ وکړ چې د ماشوم عسکرو د آزادولو او د دوی بيرته عادي ژوند ته د ستنيدو له پاره کار وکړي. دی وويل: «بې له پياوړو سياسي گامونو او مالي مرستې به د ماشومانو بيرته پر ټولنه د ورگډولو پر ځای په ډير احتمال سره دوی يو وار بيا دغه ډول جگړو ته جلب شي.»
د ملگرو ملتونو د معلوماتو په حواله په تولیزه توگه له ۲۰۰۰م کال راهيسې په ټوله نړۍ کې تر ۱۱۵ زرو زيات ماشوم عسکر آزاد شوي دي.
haz/jj(dpa) (B.S/S.R)
زموږ له آرشيف څخه:
ماشوم عسکر او د هغوی غلا سوی کوچنوالی
د نړۍ په ځينو هيوادونو کي ماشوم عسکران چي اووه يا اته کلن دي اړايستل کيږي چي نشې وکړي او انسانان په وسلو ووژني. دغه ماشومان له وحشتناک سرنوشته رنځ وړي. د دوی ډېر لږ توانېدلي دي چي عادي ژوند ته بيرته وگرځي.
انځور: Jm Lopez/AFP/Getty Images
د سوريې په کورني جنگ کي ډېر کوچنيان دې ته اړايستل سوي چي وسلې واخلي او جنگ وکړي. دغه کوچنيان مجبوره کړل سوي چي د خپل ژوند د ژغورلو له پاره وجنگيږي.
انځور: AFP/Getty Images/F. al Halabi
تروريستي ډله «اسلامي دولت» بې له شرمه له کوچنيانو سره زورزياتی کوي. د ملگرو ملتونو د راپور له مخي دغه ډله کوچنيان په ځانمرگو بريدونو کي استعمالوي. ډيری ئې دې ته مجبوره کيږي چي انسانان او کوچنيان ووژني.
انځور: picture-alliance/ZUMA Press/Medyan Dairieh
د ملگرو ملتونو د کوچنيانو د ساتني صندوق د ادارې د راپور له مخي ډير کوچنيان د ياغيانو او حکومتي ځواکونو له خوا استخدام سوي او په وسله والو جنگونو کي گومارل کيږي.
انځور: picture-alliance/dpa/epa Albadri
د ملگرو ملتونو د معلوماتو له مخي په سوډان، جنوبي سوډان، سوماليا او چاد کي په تيرو کلونو کي نزدې ۲۵۰۰۰۰ کوچنيان استخدام سوي او وسله وال سوي دي. د راپور له مخي د نړۍ په ۲۳ هيوادونو کي ۵۲ وسله والو ډلو په وسله والو نښتو کي له کوچنيانو څخه کار اخيستی دئ.
انځور: picture-alliance/AP Photo/S. Azim
د ملگرو ملتونو د معلوماتو له مخي په جنگ کي له کوچنيانو څخه کار اخيستل ډېر اسانه او ارزانه دي. دوی ته نشه ورکول کيږي او جنگي فيلمونه ور ښول کيږي. دوی بيا له دې څخه ويره لري چي هغو ډلو چي دوی استخدام کړي دي ويې نه وژني.
انځور: picture-alliance/dpa
يو شمېر کوچنيان بيا بيرته تښتي يا د دولتي ځواکونو له خوا آزاد سوي وي. دغه ماشوم عسکر خپله وسله د ملگرو ملتونو سوله ساتي ځواک ته تسليم کړې ده. دغه کوچنيان له جنسي تيريو او نشه يي موادو څخه رنځ وړي.
انځور: picture-alliance/dpa
هغه کوچنيان چي له دغه زورزياتي څخه وژغول سي د عادي ژوند ورته پيل ستونزمن وي. له دوی سره بايد ډېر کار وسي چي په ټولنه کي بيرته خپل ځای پيدا کړي.
انځور: picture-alliance/dpa/W. Langenstrassen
دغه نجلۍ هم په زوره وسله واله سوې وه او بيرته ئې ځان وژغوری. اوس هغې د خپل هغه وخت په اړه يو کتاب ليکلی دئ. دې دغه کتاب هغه مهال وليکی چي ډيمنارک ته په تېښته بريالی سوه.
