عاصم منير دغه خبره د شنبې په ورځ د لاین آف کنټرول سرحدي سيمې (LoC) څخه د کتنې پر مهال وکړه. لاین آف کنټرول هغه علاقه ده چې د کشمیر لانجمنه سیمه چې پاکستان او هندوستان دواړه ورباندې دعوا لري، په دوو برخو ویشي.
جنرال عاصم منير داسې وخت له دغې سيمې کتنه کوي چې د پوځ د مشر په توګه د هغه له ټاکل کېدو له يوې اوونۍ لږ وخت تیريږي. دا په دغه کمه موده کې د پوځ د مشر په توګه د سرسخت رقیب هندوستان په هکله د هغه تر ټولو زوروه وینا ده چې کوي يې.
د پاکستان پوځ د نوي مشر ټاکنه ولي د پولو اخوا هم مهمه ده؟
د پوځ د مطبوعاتي څانګې د يوې اعلاميې پر اساس، منیر وويل: «اجازه راکړئ چې دا په اساسي توګه واضح کړم. د پاکستان پوځ کاملا چمتو دی، نه یوازې زموږ د وطن مور د هر انچ دفاع له پاره، بلکې د دښمن پر وړاندې به وجنګیږي که چېرته پر موږ باندې جنګ تحميل شي.»
د پاکستان د پوځ نوي مشر زياته کړه: «د هندوستان حکومت به هيڅ کله هم خپلو ناوړو اهدافو ته ونه رسيږي.»
په پاکستاني کشمیر کې د پاکستان د پوځ ۱۳ عسکرو ته مرګ ژوبله اوښتې
رويټرز چې دغه رپوټ يې د شنبې په ورځ ناوخته ورکړی، ويلي دي چې د هندوستان د بهرنیو چارو وزارت په سملاسي توګه د دوی پوښتنې ته ځواب نه دی ورکړی.
د آرشيف انځور - هند سرحدي ځواکونه جمو ته نژدې په آخنور سیمه کې د هند و پاکستان تر منځ سرحد کې د ګزمې پر مهالانځور: AFP هند او پاکستان اتومي طاقتونه دي او دواړه د کشمیر د بشپړې سيمې دعوا لري اما کنټرول يې يوازې پر برخو لري. د دواړو هیوادونو تر منځ د شوو درو جګړو څخه دوه يې د کشمیر پر سر شوې دي.
هند: روان کال مو په جمو او کشمیر سیمه کې ۶۲ وسلوال یاغیان وژلي دي
دواړو لورو ډیری وخت د ګوليو په وارولو، يو بل د ۲۰۰۳ کال یوه اوربند پر نقضولو تورن کړي دي. دغه ډزې په لاين آف کنټرول سیمه کې د ۷۴۰ کیلومتره سرحد چې کشمیر يې په دوو برخو ویشلی، په اوږدو کې شوي دي.
د ۲۰۲۱م کال له پیل راهیسې دغه سرحدي سیمه د پاکستان او هند تر منځ د اوربند غځولو تر موافقې وروسته تر ډیره بریده آرامه پاته شوې ده.آيا د پاکستان له سياست څخه د پوځ جلا کول آسانه دی؟
د چارو کارپوهان وايي پاکستاني جنرالان د دغه هیواد پر پوځي او بهرنيو چارو ډير نفوذ لري او د پاکستان د پوځ مشر به په ختيځ کې له هندوستان سره سرحد کې د وضعيت په ښه مدیریت کولو کې مهم رول ولوبوي په داسې حال کې چې په لويديځ کې افغانستان سره هم له احتمالي ترينګلتيا سره معامله کوي.
آیا پاکستان رښتيا نور د کشمير ملاتړ نه کوي؟
جنرال عاصم منیر چې د پاکستان د استخباراتي ادارې پخوانی مامور دی، په وروستیو ورځو کې د پاکستان د پوځ د پخواني مشر، جنرال قمر جاوید باجوه تر تقاعد کېدو وروسته د هغه ځای ناستی شو.
(Reuters)/mks/mns/
له آرشیف څخه یو انځوریز البوم:
پاکستان څه ډول توغندي لري؟
د پاکستان د اتومي انرژۍ کمېسيون، کهوټا تحقيقاتي ادارې، سپارکو او د دفاعي علومو او تکنالوژۍ سازمان په ګډه د توغنديو پر تخنيک څېړنې پېل کړې وې. په دې ګالرۍ کې د پاکستاني توغنديو په اړه جزيات ترلاسه کولی شئ: انځور: ISPR پاکستاني توغندي او واټن یې د پاکستان د بالستيک ميزايل پروګرام له نزدې واټن څخه نيولې تر منځني واټن ويشتلو پوري وړتيا لرونکي ميزايل لري.
حتف ون يا حتف يو د لنډ واټن لومړی بالستېک میزايل وو چې پاکستان جوړ کړی وو او په لومړي سر کې یې له ۷۰ تر ۱۰۰ کلوميترو پورې واټن وهلای شوای. دا ميزايل د سپارکو شرکت د نورو په مرسته په ۱۹۸۹م کال کې جوړ کړی وو. دا په ۱۹۹۲م کال کې د پاکستان پوځ ته وسپارل شو.
انځور: ISPR حتف اته يا رعد دوه توربو جېټ پاور کروز ميزايل دی. پاکستان د ۲۰۰۷م کال په اګست کې د دې آزموينه پيل کړې وه. د رپوټونو په حواله تر يو شمير تجربو وروسته د ۲۰۱۶م کال په جنورۍ کې ترسره شوې تجربه یې تر اوسه تر ټولو بريالۍ وه. دا ميزايل تر ۳۵۰ کيلومترو پوري واټن وهي.
انځور: ISPR حتف شپږ، شاهين دوه توغندی شاهين دوه د منځني واټن بالستېک توغندی په اصل کې د شاهين ون توغندي عصري شکل دی چې په لومړي سر کې د شاهين ون توغندي سره د دويمې درجې د موټور په توګه لګول شوی وو. په ۲۰۰۰م کال کې د جوړ شوي دې توغندي آزموينه په ۲۰۰۴م کال کې وشوه، په داسې حال کې چې د نصبولو وروستۍ تجربه یې په ۲۰۱۴م کال کې ترسره شوه. دا ميزايل د ۱۵۰۰ او ۲۰۰۰ ترمنځ واټن وهلې شي.
انځور: Getty Images/AFP/F. Naeem حتف دوه يا د لنډ واټن ابدالي بالستېک توغندي ته په لومړي سر کې د حتف ون میزايل د دويمې مرحلې د بڼې په سترګه کتل کيدل او دا د حتف ون میزايل په لاندنۍ برخه کې نصب شوی وو. له دې کار څخه موخه د ميزايل واټن زياتول وو. د توغندی د ۲۸۰ څخه تر ۴۰۰ کلوميترو پورې واټن وهلی شي.
انځور: Getty Images/AFP/J. Samad د پاکستان د حتف پنځه توغندي د جوړولو کار په اتيايمه لسیزه کې پیل شوی وو چې وروسته د غوري په نوم ونومول شو او په ۱۹۹۸م کال کې و آزمويل شو. غوري دوه بالستېک میزايل کې د فولادو پر ځای المونيوم کارول شوي ول چې له کبله یې دا تر ۱۸۰۰ کلوميترو پورې واټن وهلی شي.
انځور: Getty Images/AFP/F. Naeem په ميزايل تکنالوژۍ کې د پاکستان تر ټولو مهمه وسله د ابابيل توغندی دی. دا ميزايل په يوه وخت کې تر ۲۲۰۰ کيلومترو واټن پورې څو اهدافه په نخښه کولی شي. دا توغندی د کهوټا تحقيقاتي مرکز ساينس پوهانو او انجينرانو جوړ کړی او لومړۍ آزموينه یې د ۲۰۱۷م کال په جنورۍ مياشت کې شوې وه.
انځور: picture alliance/AA/Pakistani Army Handout حتف څلور، شاهين ون توغندی د حتف څلور يا شاهين ون توغندي د جوړولو چارې په ۱۹۹۳م کال کې پېل شوې وې او لومړۍ آزموينه یې د ۱۹۹۹م کال په اپريل مياشت کې ترسره شوې وه. د ۲۰۰۲ او ۲۰۱۰م کالونو ترمنځ موده کې یې تخنيک عصري کړل شو او نورې آزموينې یې ترسره شوې. دا ميزايل له ۷۵۰ څخه تر ۹۰۰ کيلومتره پورې واټن وهلی شي او د ۲۰۰۳م کال په مارچ مياشت کې د پاکستان پوځ ته وسپارل شو.
انځور: picture alliance / dpa
