سيميز حکومت د يونان په ليسبوس کې د عمومي اعتصاب اعلان کړی دی. دغه اعتصاب پر اروپايي اتحاديې د فشارونو د زياتيدو په موخه کيږي تر څو په دغه ټاپو کې تم شويو مهاجرو له پاره نورو سيمو ته د تلو اجازه ورکړي وي.
اسوشتيد خبري آژانس د سيميزو چارواکو له قوله ويلي دي چې د حکومت ضد دغه اعتصاب به د دوشنبې په ورځ (نوامبر ۲۰مه) پيل شي. د ليسبوس ښاروالۍ په جدي توګه له خلکو غوښتي دي چې په پراخه کچه اعتصاب کې ګډون وکړي تر څو يې پر آټن او اروپايي تولنې فشارونه زيات کړي وي.
د اروپايي اتحاديې د مهاجرت سياست پر اساس، د يونان په ليسبوس ټاپو کې ميشت مهاجر نشي کولای نورو سيمو ته ولاړ شي. د دغه سياست له امله په ياد ټاپو کې د اټکل له مخې لږ تر لږه ۸۰۰۰ مهاجر بند پاتې دي.
دا په داسې حال کې ده چې د دغه ټاپو د مهاجرو مرکزونه د يونيم زر کسانو د اوسيدو وړتيا لري. د مهاجرو وضعيت ته د رسيدګۍ په برخه کې نه يوازې دا چې سيمیز حکومت له سختو ستونزه سره مخ دی، بلکه د مهاجرو ژوند يې هم تريخ کړی دی.
د شنبې په ورځ د ليسبوس ښاروالۍ لخوا په يوه خپور شوي بيان کې ويل شوي دي، چې د اروپايي اتحاديې د مهاجرت د سخت قانون له امله دغه ټاپو د «مهاجرو له پاره په يو زندان» اوښتی دی. ليسبوس ته نژدي د يونان په نورو ټاپوګانو؛ کاوس، ساموس، ليروس او چيوس کې هم د مهاجرو وضعيت ناهيلې کونکی دی.
د دغو ټاپوګانو ښاروالانو تر دې مخکې هم په وار وار دا غوښتنه کړې وه چې دغې سيمې ته رسيدلو مهاجرو ته دې د يونان مرکزي سيمو ته د تلو اجازه ورکړل شي. ټول هغه مهاجر چې له ترکيې څخه د آژه سمندرګي له لارې اروپا پر لور سفرونه کوي، له سمندره تر اوښتو وروسته خپل لمړني قدمونه د يونان په همدې ټاپوګانو کې ږدي. د چارواکو پر وينا دغې سيمې ته له حد څخه زيات مهاجر رسیدلي دی چې دغه کوچني ټاپوګان يې وړتيا نلري.
د ليسبوس ټاپو چې د سياحت له اړخه نړيوال شهرت لري، د کلنيو رخصتيو پر مهال د مختلفو هيوادونو څخه سيلانيان ورځي، خو د مهاجرو کړکيچ د يونان سياحتي صنعت هم سخت زيانمن کړی دی. سربيره پر دې چې د مهاجرت پر موضوع د ترکيې او اروپايي اتحاديې تر منځ د شوي تړون څخه وروسته يونان ته لږ شمير مهاجر رسیږي، خو د چارو کارپوهان وايي چې ليسبوس ټاپو ته چې له دې اړخه کوم زيان متوجه وو هغه ورته رسيدلی دی.
که څه هم د تيرو څو کلونو په پرتله اوس په يوناني ټاپوګانو کې وضعيت ډير ښه شوی دی خو په رسنيو کې د مهاجرت کړکيج د اوج وختونو د انځورونو په خپريدو سره اوس هم ډیری سيلانيان دغې سيمې ته د تلو زړه نه ښه کوي.
پر ورته موضوع یو انځوريز البوم زموږ له آرشيف څخه (05.09.2017):
د يونان په ليسبوس ټاپو کې د مهاجرو د کړاونو ډک ژوند
د يونان په لیسبوس ټاپو کې ميشت مهاجر نور د سختيو ډک ژوند د دوام توان نه لري. ډیري موسسې چې له مهاجرو سره يې د روغتيا او نوري قانوني مرستې کولي، د مخه لا له دغه ځايه څخه وتلي دي.
انځور: DW/V. Haigesد آژه سمندرګي پر غاړه بند پاتي مهاجر
اروپا اعلان وکړ چې په يونان کې مهاجرو ته د رسيدګي په برخه کې بوديجه يې په اګست مياشت کې خلاصه شوه. تر هغې وروسته مهاجرو ته د رسيدګۍ ټول مسئوليت ته يونان په يوازې سر اوږه ورکړې ده. د دې تر څنګ، د لیسبوس مهاجرو د انتقال او يا بشري مرستو په برخه کې هم د هيڅ کوم مشخص پلان څرک نه ليدل کيږي.
انځور: DW/V. Haigesپه ليسبوس ټاپو کې د موريا په نوم د راجستر تر ټولو مهم مرکز او هغې ته ورته نور مرکزونه هم په دې نه شي توانيدلی چې حتي د تازه راتلونکو لږ شمير مهاجرو وضعيت ته هم سمه رسيدګي وکړي. دلته فشارونه خورا لوړ دي. موجوده بد وضعيت په چټکۍ سره د تاوتريخوالو سبب واقع کيږي. يوه روښانه بيلګه يې د مختلفو هيوادونو د اتباعو ترمنځ د لفظي او فزيکي شخړو رامنځ ته کيدل دي.
انځور: DW/V. Haigesله موريا څخه بهر په دغه ځای کې د شامپو او اوبو ډیر خالي بوتلونه او نور کثافات غورځول شوي دي. تر څنګ د دې چې په کمپ کې روغتيايي خدمتونو د کمښت ستونزه ده، خلک هم په دغه ځای کې د ژوند د يو ښه ماحول جوړولو په برخه کې پاتې راغلي دي.
انځور: DW/V. Haigesد يوې پياله چای توان هم نه شته
دغه اريتريايي مهاجر په خپله خيمه کې له دې بابته بخښنه غواړي چې د چاي تيارولو امکانات نه لري. هغه چې درې مياشتې مخکې ليسبوس ته راغلی دی له هماغه وخته راهيسې د خپلې پناه غوښتنې د ځواب په تمه دی. دی وايي: «دلته په موريا کې ډیري ستونزي دي». د مختلفو نژادونو خلکو ګډي خيمې په کمپ کې د اخ و ډبونه د رامنځ ته کيدو سبب واقع کيږي.
انځور: DW/V. Haigesيو افغان مهاجر د اعتراض په توگه د کارتن پر کاغذ ليکلي دي: موږ هم انسانان يوو، ژوي نه يوو، د موريا کمپ دوږخ دی. دغه افغان تر يوه کال زيات وخت کیږي چې د يونان په لیسبوس ټاپو کې د خپلې پناه غوښتني د ځواب په تمه شپې او ورځې تيروي. د معلوماتو نه ورکول، د کمپ بد وضعيت او بلاخره بيرته افغانستان ته د اخراج ويره هغه څه دي چې د مهاجرو ژوند يې تريخ او د روحي فشارونه سبب شوي دي.
انځور: DW/V. Haigesمهاجرت د اقتصادي ستونزو سبب
د سيمې يو تن اوسيدونکی له افغان مهاجر سره بحث کوي چې د مهاجرو د شتون له امله يونان ته د ۲۰۱۵م کال په پرتله ۷۵ سلنه لږ سيلانيان راځي. د يونان اقتصادي بحران هم په لیسبوس ټاپو کې د خراب وضعيت په رامنځ ته کيدو کې رول لرلی دی. له بلې خوا که څه هم د سيمې ډير اوسيدونکي له مهاجرو سره خواخوږي لري خو په ټوله کې په دې باور دي چې هيواد يې د اوږدې مودي له پاره د مهاجرو مقابله نه شي کولای.
انځور: DW/V. Haigesپه ليسبوس ټاپو کې رضاکاران خپلې هڅې کوي، په ځانګړې توګه د روغتيايي خدمتونو په برخه کې چې تر ټولو اړينه ده. آلمانۍ داکتره «يوتا مای والد» د دوو اونيو له پاره ليسبوس ته تللې، څو له مهاجرو سره روغتيايي مرستي وکړي. هغه وايي چې ډیري روغتيايي ستونزي په موريا کمپ کې د موجوده بد وضعيت له کبله رامنځ ته شوي دي. د کمپ اوسيدونکي تر ډيره له دردونو او زيانونو شکايت کوي او داکتران ورته د درد ضد درمل ورکوي.
انځور: DW/V. Haigesد موزايک ملاتړ کوونکی مرکز د مهاجرو له پاره يو ښه فرصت دی. دا ډول فعاليتونه د مهاجرو له پاره يوه ښه وقفه ده چې په دوامداره توګه د کمپ په بد حالت کې ژوند کوي. دغه ځای نه يوازي دا چې مهاجرو ته د څو ساعتونو له پاره خوښۍ وربخښي، تر څنګ دوي يوه اندازه پيسې هم په لاس راوړي، لکه دغه ايرانۍ ميرمن.
انځور: DW/V. Haigesد تازه راتلونکو مهاجرو څپې ادامه لري
هغه نوی مهاجر چې د ۲۰۱۵م کال له لومړيو څخه يونان ته راغلي، بايد انتظار وباسي، څو دوسيې يې وڅیړلي شي. خو په دې برخه کې د څيړنۍ ټکنی بهير او د يو ښه کاري پلان نه شتون د دې سبب شوی چې د ډيرو لږو دوسيو څيړني وشي. د مهاجرت نړيوالې ادارې په حواله په روان ۲۰۱۷م کال کې څه باندې ۱۴ زره مهاجر يونان ته راغلي دي. تيرکال يونان ته ۱۷۳ زره مهاجر راغلي ول، خو يوازې ۱۲۵۰۰ کسان يې ومنل.
انځور: DW/V. Haiges