په آلمان کې به مهاجرو د ژبې د کورس له پاره په میاشتو انتظار کاوه، خو د آلمان د حکومت د یو لړ اقدماتو له امله په دې برخه کې مثبت تغیر راغلی او اوس مهاجرین کولی شي په لنډ وخت کې د ژبي په کورس کې داخله ترلاسه کړي.
انځور: DW/R. Dawa
اعلان
د آلماني ژبې په کورسونو کې د ګډون له پاره د آلمان حکومت په دې اقدام سره د مهاجرو د انتظار شیبې په بشپړه توګه پای ته نه دي رسیدلې خو په دې برخه کې ډیر کمښت رامنځ ته کیږي. په آلمان کې د ژبې په برخه کې د برلټز په نامه د یوه سازمان مشر ماتیاس شوارڅ ویلي دي چې اوس به مهاجرین د ژبې په کورس کې د داخلې ترلاسه کولو له پاره په میاشتو انتظار نه باسي. دا په داسې حال کې ده چې د تیرو وختونو په پرتله په دې وروستیو کې په دې برخه کې څه نا څه مثبت بدلون راغلی وو خو بیا هم دغه ستونزه پر ځای پاته وه.
متیاس شوارڅ په دې هکله ویلي دي چې د آلمان د مهاجرت او پناه غوښتنې ادارې یا «بامف» به هم په دې برخه کې د مهاجرو او پناه غوښتونکو له پاره د ژبې د زده کړې فیس او نور مصارف له سره و ټاکي. د نوموړي په وینا اوس به د هغه سازمان یعنې برلټز ته د مهاجرو د ژبې په کورس کې د هر ساعت پر سر ۳،۹ یورو ورکول کیږي.
انځور: DW/R. Dawa
تر دې مخکې به د هر ساعت په بدل کې به تر دې یوه یورو کمه ورکول کیده. اوس به د آلماني ژبې ښوونکو ته د هر ساعت په بدل کې ۳۵ یورو ورکول کیږي.
دا په داسې حال کې ده چې د تیر یوه کال په ترڅ د برلټز په نامه دغه سازمان د شاوخوا ۴۰۰ مختلفو کورسونو پرمټ نږدې ۱۰ زره پناه غوښتونکو او مهاجرو ته د ژبې په برخه کې خدمتونه وړاندي کړي دي. د یاد سازمان د مشر ماتیاس شوارڅ په حواله د مهاجرو د ادغام د کورسونو له لارې دغه سازمان ګټه هم کړې، که نه نو د هغه په وینا موږ به داسې نه کول.
اندريس برينکمن (Andreas Brinkmann) د ويزل ښار د ښوونځي مدير دی. د ښوونځي کارونه له همدې ځایه پيليږي. په ۲۰۱۶ کال کې دغه ښوونځي کې ۱۶۰۰ مهاجر شامل شول. په همدې کال ۱۹۰ تنو د بي آينس سندونه واخيستل.
انځور: DW/M. Karim Saleh
يوه فعاله او محبوبه سکرتره
مونيکا کلينګ (Monique Kling) ښوونځي کې سکرتره ده. هغه د خپل کاري مسئوليت له مخې د ښوونځي تر بل هر مسئوله زياته له مهاجرو سره په اړيکه کې وي. له همدې امله په مهاجرو کې محبوبه او مشهوره ده.
انځور: DW/M. Karim Saleh
هر څه په نظر کې نيول شوي دي
ښوونځی يوازې هغو مهاجرو ته د بس ټيکټونه ورکوي چې کورونه يې لږ ترلږه له ښوونځي څخه په حدود د ۳ کيلومترو لري وي. پاتې نور مهاجر تر ډیره بريده له بایسکلونو کار اخلي.
انځور: DW/M. Karim Saleh
پرته له هر ډول توپيره
په ټولګيو کې تر څنګ د دې چې د مختلفو هيوادونو او اديانو پيروان څنګ په څنګ په ګډه درس وايي. د عمر او جنسيت د توپيرونو خبره هم په کې مطرح نده.
انځور: DW/M. Karim Saleh
ګروپي کارونه
پر زدکونکو عملي محاوره کول او ديالوګ د درسي پروګرامونه يوه مهمه برخه ده. دا د بي آينس ټولګی دی. د بې آينس سند په لرلو مهاجر ته ډير سهولتونه برابريږي. د ټولګي يو شمير زده کونکي نغواړي چې انځورونه يې واخيستل شي.
انځور: DW/M. Karim Saleh
مهربانه ښوونکي
ښوونکې دايمند (Deimann) د خپلو زده کونکو له عملي کاره ننداره کوي. زده کونکي له هغې خوښ بريښي. دوی وايي د استادانو صمیمي او دوستانه رويې سبب ګرځي چې دوي تشویق او ښه زده کړه وکړي.
انځور: DW/M. Karim Saleh
تر بي آينس وروسته
هغه مهاجر چې د بي آينس سند ترلاسه کړي يوه ګټه يې دا ده چې حکومت ورته د بي څوای يا بي دوه ټولګی هم برابروي. پله بې آینس پرته درسونه ډیر سختيږي.
انځور: DW/M. Karim Saleh
مهمې ورځې
د ښوونځي عمومي مدير اندريس برينکمن يوازې په مهمو ورځو لکه د کلنې رخصتي اعلان او داسې نورو مناسبتونو کې ټولګېو ته راځي. هغه وايي يوازې د بي آينس ټولګي لپاره حکومت پر هر شاګرد ۲۰۰۰ يورو مصرفوي.
انځور: DW/M. Karim Saleh
د ورځي ۱۵ ساعته تدريس
د ويزل ښار ښوونځي په ورځ کې درې وخته (سهار، ماسپښين او ماښام) صنفونه لري. هر صنف ۵ درسي ساعتونه لري.
تيودور او ملګری ېې ګريګوري (کيڼ لور) چې عمرونه يې پاخه دي وايي چې د ويزل ښار کې يې څو مياشتې درس وویل خو څه يې په کې زده نکړل. د ښوونځي مدير هم دا مني چې د پاخه عمر لرونکي د ځوانانو په پرتله ډیر وخت ته اړتيا لري تر څو آلماني زده کړي.
انځور: DW/M. Karim Saleh
هم ثواب هم خرما
خو دا دواړه رومانيايي مهاجر بيا په دې خوښ دي چې په يو ساختماني شرکت کې کار کوي. ګريګوري وايي چې په ساعت لس يورو ورکوي چې دا ښې پیسې دي. دوي وايي چې دلته به د کار ترڅنګ رو رو ژبه هم زده کړي.
انځور: DW/M. Karim Saleh
په راډيو اوريدو او روابطو ټينګار
ښوونکې ماريا کرولي (Maria Caroli) پر خپلو زده کونکو تل ټينګارکوي چې يوازې ښوونځی ته په راتلو دې بسنه نکوي. هغه مهاجرو ته تل توصيه کوي چې هره ورځ کم له کمه دوه ساعته آلماني راډيوي پروګرامونه واوري.
انځور: DW/M. Karim Saleh
«له بې آینس پرته چانس هيڅ چانس نشته»
خو اندريس برينکمن بيا وايي که مهاجر غواړي چې آلمان کې تحصيل وکړي يا په اداراتو کې کار وکړي بيا د ژبې رسمي سنده لرل ډیر مهم ده. هغه وايي چې« له بي آينس پرته هيڅ چانس نشته». دی وايي تير کال يې ښوونځي کې ۱۶۰۰ تنه مهاجر شامل شول.
انځور: DW/M. Karim Saleh
د بي آينس سند يو څو ګټي:
برينکمن وايي د بي آينس په لرلو مهاجر کولای شي تحصيلات وکړي، دفترونو کې کار پيدا کړي، حکومت ورته په نورو اوچتو صنفونو کې د زدکړې وړيا شرايط برابروي او تر ټوله لويه ګټه يې دا ده چې ډیر امکان يې شته چې حکومت د مهاجر د اقامې وخت « ډیر» زيات کړي. چمتو کونکی: محمد کريم صالح
