د اروپایي اتحادیې او ترکیې تر منځ د شوي تړون له مخې یونان ته په غیر قانوني توگه د ورغلو مهاجرو د بیرته ستنولو لړۍ به د اپریل میاشتې له څلورمې نېټې څخه پیل شي. دا لا روښانه نه ده چې د دوشنبې په ورځ به څومره کسان بیرته ترکیې ته واستول شي.

په زرونو مهاجر د خپل سر په بیه یونان ته ورسیدل، خو دغه هیواد چې پخپله هم له اقتصادي لحاظه کمزوری دی، پکښې مهاجرو ته د سرپناه برابرولو له پاره ښه بندوبست نه شته. تیره ورځ د آتن چارواکو په دې پیل وکړ چې د پيريوس په ساحلي سیمه کې موجود مهاجر نورو برخو ته انتقال کړي.

له ترکیې څخه په غیر قانوني توگه يونان ته د رسېدلو مهاجرو زیاتره برخه لیسبوس ټاپو ته رسیږي. تر تړون وروسته مهاجر د لیسبوس له ټاپو څخه نورو ځایونو ته انتقاليږي. تر هغه وروسته به بیرته ترکیې د دغو مهاجرو د بیرته ستنیدو له پاره گامونه اخیستل کیږي.

په زرونو مهاجر اوس هم د یونان او مقدونيا سرحد ته څیرمه د ایدومیني په کمپ کې په دې هیله شپي سبا کوي، چې یو وخت به سرحد پرانیستل شي او دوی به د آلمان او نورو اروپایي هیوادونو پر لور خپل سفر ته ادامه ورکړی. له دغو زرونو مهاجرو سره ښځې او ماشومان هم شته.

د مقدونیا او یونان تر منځ سرحد په بشپړه توگه بنده دی. مهاجرو له بدیلو لارو مقدونیا ته د رسیدو هڅي کړي دي خو هر ځل نیول کیږي او بیرته یونان ته استول کیږي. مهاجرو د مقدونیا د امنیتي ځواکونو له لوري د تشدد او ناروا چلن په هکله هم شکایت کړی دی.

د یونان پولیسو په کراتو له مهاجرو څخه غوښتي دي چې له ایدومیني څخه نورو کمپونو ته ولاړ شي. د کمپ د خالي کولو د هڅو پر مهال مهاجرو احتجاج کړی. په دغه ترڅ کې د پولیسو او مهاجرو تر منځ آخ او ډب هم رامنځ ته شوی دی.

که څه هم دا خبره څرگنده ده چې د تړون له مخې له ترکیې څخه یونان ته په غیر قانوني توگه تللي مهاجر به بیرته ترکیې ته استول کیږي، خو پر دې سربیره هم د آژه سمندرگي له لاري مهاجر له ترکیې څخه یونان ته ځي. په تیرو ورځو کې د مهاجرو په شمیر کې بیا ډیروالی راغلی دی.

په سمندر کې د سفر پر مهال د مهاجرو له لوري استعمالیدونکي ژغورونکي واسکټونه د یونان په ټاپوگان کې اوس هم پراته دي. د بشري حقونو ادارې کارکوونکي وايي چې ترکیه د مهاجرو له پاره خوندی ځای نه دي. خو اروپایي اتحادیه وایي چې د دغو اقداماتو له لارې به پر خطرناکو لارو د غیر قانوني مهاجرو د تگ په مخنیوي کې مرسته وشي.