په يوه هيواد کې د متوسط عمر لوړوالې په ډيرو عواملو پورې تړلې وي چې په هغه کې د امنيتي د کچې څخه نیولې د ژوند د کيفيت، د پرمختګ تر ميزان پورې شامل وي. ناروې د نړيوال اقتصادي فورم په دې درجه بندۍ کې ۱۵ ځای خپل کړې. دلته متوسط عمرڅه باندې ۸۱ کاله دی.

د نړيوال اقتصادي فورم په دې درجه بندۍ کې شاملو کارپوهانو د څيړنيو په چوکاټ کې بيلا بيلې نظر پوښتنې هم ترسره کړي او د نورو سربيره یې د خلکو د روغتيايي وضعيت هم پوښتلی. سويدن د ۸۲ کالو متوسط عمر په درلودو سره په دې جدول کې ۱۴ ځای خپل کړی.

څومره چې په يوه هيواد کې د روغتيايي سستم، زده کړو او همدا راز د ټولنیزو خدماتو کچه لوړه وي، هومره د خلکو متوسط عمر هم ډير وي. د کانادا وګړي په اوسط ډول ۸۲ کاله عمر کوي. په دې جدول کې دا هيواد ۱۳ ځای لري.

د ایسلند وګړي د سويدن، ناورې او کانادا د وګړو په پرتله يو څه اوږد عمر لري. د ماشومانو د مړينې او همدا راز د چاپيريال د ککړتيا د کچې ټيټوالې هغه عوامل دي چې د وګړو پر متوسط عمر اغیز لري.

په جنوبي کوريا کې د اقتصادي پراختيا او همکارۍ د سازمان د نورو غړو هيوادونو په پرتله د کار کچه ډيره لوړه ده. د اوسط کلني کار حجم يا بار د ۲۱۱۱ ساعتو څخه زيات دی. خو سربیره پر دې هم متوسط عمر د ۸۲ کالو څخه يو څه لوړ دی. د امنيت او په مدني برخه کې د خلکو فعاليتونه د متوسط عمر پر اوږدوالي بې اغیزه نه دي پاتې.

د کوګزامبورګ وګړي هم د ۸۲ کالو زيات متوسط عمر لري. دا هيواد چې کم نفوس لري، وګړي یې په ټولیزه توګه د روغتيا او نظافت په برخه کې ښه خدماتو برخمن دي. لوګزامبورګ په دې جدول کې ۱۰ مقام لري.

په اسرائيلو کې متوسط عمر ۸۲/۲ کاله دی او په دې جدول کې ۹ ځای لري. د يادونې وړ ده چې د اسرائيل نارينه د نړي د نورو هيوادونو د نارينو په پرتله اوږد عمر لري.

په دې جدول کې ۸ ځای استرليا خپل کړی. غربي کلتور او جوړښتونه او په عینې حال کې هوسا ژوند له يوه پلوه او له بله پلوه ښکلی او وحشي طبيعت د استرليا ځانګړتياوې دي. داسې بریښي چې دا متنوع ترکيب د ژوند پر کيفيت او همدا راز د متوسط عمر پر لوړ والي بې اغیزې نه دی پاتې شوی.

فرانسويان هم په متوسط ډول ۸۲/۴ کاله عمر لري او په جدول کې ۷ ځای لري. د ژوند کيفيت او خوندونه يې د فرانسويانو له پاره دير اهميت لري. دوی په ځانګړي توګه خپل خوراک ته پام کوي او په ورځني ژوند کې په مقایسوي توګه پخلي ته ډير وخت ورکوي. ښه او باکيفيته خواړه فرانسويانو ته ډير مهم دي.

په تيرو دريو لسيزو کې په سنګاپور کې د روغتيايي خدماتو په برخه کې د پام وړ ښه والې د دې باعث شوی چې دلته د وګړو اوسط عمر ۸۲/۶ کالو ته لوړ شي. سنګاپور په ځانګړي توګه د پاکوالي له کبله شهرت لري. همدا راز مساعده هوا هم د دې لامل شوې چې خلک ډير عمر وکړي.

«خوږ ژوند» (La Dolce Vita) هغه مشهور عبارت چې د اېتاليا او کلتور سره يې تړاو لري. کورنيو اړيکو ته پاملرنه او ښه خواړه او هوا هغه څه دي چې د دې هيواد د وګړو په اوږد عمر کې مهم نقش لري.

د سویس هيواد د نړيوال اقثصادي فورم په درجه بندۍ کې ۴ ځای لري. په سوېس کې تر ټولو اوږد عمر لرونکي يوه ميرمن ده چې ۱۱۳ کاله عمر لري. دا هيواد د ډير ښه اقتصاد خاوند دی او حکومت يې د وګړو هوساينې او روغتيا ته ځانګړې پاملرنه کوي.

د هسپانیې وګړي په اوسط ډول څه باندې ۸۳ کاله ژوند کوي. دا هيواد د کار او ژوند، استوګنې، روغتيايي خدماتو او همدا راز د ټولنیزو اړيکو او امنيت له پلوه يو پرمختللې هيواد بلل کيږي. د هسپانيا وګړي په خپل ورځني ژوند کې استراحت ته خاصه پاملرنه کوي.

جاپانيان چې ډير کاري او خواري کښ خلک بلل کيږي، په اوسط ډول ۸۳/۶ کاله عمر لري. څيړنو ښوولې چې هغه کسان چې اوږد ژوند يې درلودلای وو، تر اخر عمره پورې ډير فعال او په کار بوخت ول. د څيړونکو په آند کار او فعاليت د دې باعث ګرځي چې سړی په جسمي توګه روغ پاتې شي او وروسته زوړ شي.

سره له دې چې د هانګ ګانګ هوا ډيره پاکه نه ده، خلک یې په اوسط ډول ۸۴ کاله عمر لري. هانګ ګانګ د نړيوال اقتصادي فورم د «ژوند د تمې» په درجه بندۍ کې لومړۍ مقام خپل کړی. ويل کيږي چې د درملنې ښه سسټم او صحي خوراک د هانګ ګانګ د اکثريت وګړو د اوږد عمر له لاملونه څخه دي.