م م: په ۵ کلونو کې شاوخوا ۱۹ زره مهاجر په سمندر کې مړه شوي
۱۳۹۸ آبان ۵, یکشنبه
د ۲۰۱۴م کال راهيسې شاوخوا ۱۹ زره کسانو په مديترانې سمندرګي کې خپل ژوند له لاسه ورکړی او يا ورک شوي دي. دا هغه مهاجر ول چې غوښتل يې له دغې لارې ځان د اروپايي اتحاديې يوه غړي هيواد ته ورسوي.
انځور: Getty Images/C. McGrath
اعلان
د ملګرو ملتونو سازمان د ارقامو له مخې له ۲۰۱۴م کاله تر اوسه پورې، لږ تر لږه ۱۸ زره او ۹۹۹ تنه مهاجرو د مديترانې سمندرګي په اوبو کې خپل ژوند له لاسه ورکړی او يا ورک شوي دي. په ژنيو کې د ملګرو ملتونو د مهاجرت ادارې د جمعې په ورځ ويلي وو چې د دغو کسانو له ډلې څخه ۱۵ زره او ۷۵۴ تنه يې د ليبيا او ايټاليا تر منځ اوبو کې مړه شوي دي.
په تيرو پنځو کلونو کې تر ټولو ډير مهاجر په ۲۰۱۶م کال، د اروپا د مهاجرت بحران پر وخت مړه شوي دي. په دغه کال په مديترانې سمندرګي کې ۵۱۴۳ تنه مهاجر مړه او يا ورک شوي ول.
په روان ميلادي کال کې هم پر دغې خطرناکې لارې ډيرو کسانو خپل ژوند له لاسه ورکړی دی. د ۲۰۱۹م کال له پيله تر اکتوبر مياشتې پورې، په مديترانې سمندرګي کې د مړو شوو او لادرکه شوو کسانو شمير کوم چې په رسمي توګه ثبت شوي دي، ۱۰۸۰ تنو ته رسيدلی دی.
پر ورته موضوع زموږ له آرشيف څخه د ۲۰۱۷م کال يو انځوريز البوم:
په مديترانه کي تر ۵۰۰۰ زيات مهاجر وژل سوي
په ملگرو ملتونو کي د کډوالو چارو ادارې د راپور له مخي په ۲۰۱۶م کال کي د مديترانې له لاري اروپا ته د مهاجرت پرمهال تر ۵۰۰۰ زيات مهاجر په اوبو کي ډوب سوي دي. دغه راپور د جمعې په ورځ خپور سوی.
انځور: Opielok Offshore Carriers/dpa
د ملگرو ملتونو د کډوالو چارو ادارې د راپور له مخي په ۲۰۱۶م کال کي په مديترانه کي ۵۰۸۹ ښځي، ماشومان او نارينه اروپا ته د مهاجرت پر لار د مديترانې په اوبو کي ډوب سوي دي.
انځور: Reuters/Marina Militare
په ټوله ايزه توگه اروپا ته د مهاجر پرمهال په ۲۰۱۶م کال کي د۷۵۰۰ انسانانو ژوند ختم سوی دی.
انځور: Reuters/A. Konstantinidis
په مديترانه سمندرگي کي تر ټولو زيات ډوب سوي مهاجر د افراقايي هيوادونو دي.
انځور: Reuters/Marina Militare
د دوی ډېری په داسي کښتيو کي د اروپا پر لور مهاجرت ته زړه ښه کړی چي په سمندر کي د ياغي څپو مقاومت نه لري او ډېر ژر چپه او ډوبيږي.
