د ناورې په پلازمېنه اوسلو کې د افغانستان سفارت چې د سپتمبر په ۱۲مه وتړل شو، تر یادې نېټې ېې چارې د افغانستان د پخواني حکومت چارواکو له خوا مخته وړل کېدې.
د ناروې حکومتي چارواکو وویل چې په ناروې کې د افغانستان سفارت ېې په کابل کې د طالب چارواکو د غوښتنې مطابق وتاړه. طالبان په ۲۰۲۱م کال کې پر افغانستان بیا حاکم شوي خو حکومت ېې تر اوسه هېڅ هېواد په رسمیت نه دی پېژندلی.
د ناروې د کورنيو چارو وزير، ایسپن بارت اېدي، ويلي دي: «موږ طالبانو ته دا واضح کړه چې په اوسلو کې د نوي افغان سفير د منلو د پوښتنې ځای نشته،» که چېرته طالبان دا ډول یو نیت ولري.
اېدي د طالبانو وروستي اقدام ته اشاره کړې ده: «په وروستیو کې په (افغانستان کې) نوي محدودیتونه وضع شوي چې په ځانګړې توګه افغان ښځې او نجونې اغیزمنوي.»
د ناروې دغه وزیر زیاته کړې چې «په همدې دلیل» ناروې خپلې اړيکې راکموي.
هغه په یوه اعلاميه کې ويلي دی چې ناروي به یوازې یو افغان چارواکی ومني تر څو «قونسلي چارې، ویزې او نور عاجل موضوعات» مخته یوسي.
ناروې دغه اعلان د طالبانو تر يو نوي اقدام وروسته کړی دی. طالبانو چې مخکې ېې افغان نجونې او ښځې له شپږم ټولګې پورته ښوونځيو او پوهنتونونو ته له تلو منع کړې وې، تازه ېې نجونې طبي انستيتوتونو ته چې فعال پاته وو، هم له تلو منع کړي دي.
پرافغان ښځو د طالبانو د بندیزونو کرونولوژي
له هغه وخت راهیسي (۲۰۲۱م کال په اګست میاشت کې) چې طالبان بيا واک ته رسېدلي، په ځانګړي توګه يې پر ښځو باندې بندیزونو ته دوام ورکړی دی. د ډسمبر میاشتې پر ۳ نېټه یې ښځې د روغتياپالنې په برخه کې هم له زده کړو منع کړي دي.
انځور: Wakil KOHSAR/AFPطالبانو د نجونو او هلکانو پر يوځايي زده کړې بندیز ولګاوه او نارينه یې نجونو ته له زده کړو ورکولو منع کړل.
طالبانو د ښځو پر سپورت بندیز وضع کړ.
نجونې تر شپږم ټولګي پورته له زده کړو منع شوې.
نجونې او ښځې په کابل پوهنتون کې له زده کړو څخه منع شوې.
طالبانو د محرم پرته له هېواده دباندې د ښځو پر سفر بندیز ولګاوه.
پوهنتونو ته د جنسيت پر بنسټ د جلا جلا ټولګيو لارښوونه وشوه.
طابانو د تلویزیون ښځينه وياندویانو ته د مخ پټولو لارښوونه وکړه.
طالبانو ورزشي کلبونو او پارکونو ته د ښځو او نجونو پر ورتګ بندیز اعلان کړ.
تر امر ثاني پورې دولتي او شخصي پوهنتونونه ته د ښځو پر تګ بندیز اعلان شو.
تر شپږم ټولګي وروسته نجونې شخصي کورسونو ته له تګ څخه هم منع شوې.
طالبانو په نړيوالو غیر دولتي موسسو کې د ښځو پر کار بندیز ولګاوه.
ښځې په بهرنيو غير دولتي موسسو کې په ښونیزو پروګرامونو کې له ونډه اخيستو څخه منع شوې.
د طالبانو د امر بالمعروف وزارت د ښځو پر سينګارتونونو بندیز اعلان کړ.
د طالبانو د روغتيا وزارت موسسو او پوهنیزو ادارو ته امر کړی دی چې ښځينه زده کوونکي دې نورې زده کړو ته نه ورپریږدي.
