ناټو له پاکستان سره د اړيکو د بيا ښه کولو هڅي کوي
۱۳۹۰ دی ۱۳, سهشنبه
پاکستان پر ناټو خپله پوله د تير کال په نومبرمياشت کي وتړله. له دي سره په افغانستان کي پر بهرنيو ځواکونو يوه مهمه اکمالاتي لار وتړله شوه.
پاکستان تر هغه وروسته دغه کار وکړ، چي د ناټو ځواکونو په يوه بريد کي ۲۴پاکستاني سرتيري ووژل شول.
ناټو وايي چي سرتيري زموږ او پاکستان د گډي تيروتني په نتيجه کي وژل شوي دي، خو پاکستان بيا له دغي خبري څخه انکار کوي او وايي چي له ناټو څخه ئې د بريد د نه کولو غوښتنه کړې وه.
دا خبره لا تر اوسه پوري روښانه نه ده، چي پاکستان به څه وخت د ناټو د اکمالاتي کاروانونو پرمخ خپل سرحد پرانيزي.
د ناټو يوه وياند، کارستين يکوپسن، په کابل کي ويلي دي چي ناټو د خپلو گټو، د افغانستان او پاکستان د ګټو له پاره غواړي چي له پاکستان سره اړيکي بيرته ښې کړي:
«موږ پوهيږو چي د سرحد هاخوا ته ځيني شيان بند پاته دي. له دې کار سره د هغو خلکو کاروبار، معاش او تجارت ته تاوان رسيږي چي په افغانستان او پاکستان کي د ترانسپورت په برخه کي کارو بار کوي.»
وياند د افغانانو هغو انديښنو ته هم اشاره کړې ده، چي که د ناټو پرمخ د پاکستان پوله تړلې پاته شي، نو ناټو به خپلي اړتيا وړ مواد د افغانستان له بازارونو څخه تر لاسه کړي چي دا به په هغه هيواد کي نرخونه لا پسي لوړ کړي:
«افغانان بايد په دې برخه کي هيڅ انديښنه ونه لري، ځکه چي ناټو ستر ګدامونه لري.»
د پاکستان له کراچۍ بندر څخه يوه چارواکي ويلي دي، چي د ناټو يو شمېر اکمالاتي لارۍ د نومبر د مياشتي راهيسي هلته ولاړي دي. دغه چارواکي چي د نوم نه اخيستلو په شرط ئې خبري کولې ويلي دي:
«اوس د ناټو ۳۶۷۶ موټر او ۱۷۳۲ کانټينران افغانستان ته د تيريدو له پاره په پاکستان کي بند پاته دي.»
د افغانستان او پاکستان پر پوله وروستۍ پيښي د پاکستان او غرب تر منځ د اړيکو حساسيت ښکاره کړ. پاکستان اوس هم وايي، چي د پيښي ټوله ملامتيا بايد ناټو پرغاړه واخلي.
خو ناټو بيا وايي چي د بريد تر مخه ئې د عملياتو د همږغۍ په يوه مرکز کي د پاکستاني چارواکو هوکړه ترلاسه کړې وه.
آژانسونه/ مسعود جهش
کتونکي: نجيب الله زيارمل