په داسې حال کې چې د غزې په جګړه کې د وقفې غځول ښايي د حماس په ګټه تمام شي، خو د اسرائيل لومړي وزير ويلي دي چې د نورو يرغمل شويو د آزادۍ په موخه د وقفې غځولو ته چمتو دی.

بنیامین نتانیاهو د امریکا له ولسمشر جو بایدن سره له خبرو وروسته دې ته اشاره وکړه چې له حماس سره د شوې هوکړې له مخې باید هره ورځ لږ تر لږه لس یرغمل شوي کسان د حماس له منګولو ازاد شي، خو نوموړي وویل چې له دې مودې وروسته به د دغې ترهګرې ډلې پر ضد جګړه ادامه ولري.

نتانیاهو وویل چې د دې وقفې له پای ته رسیدو وروسته به اسرائيل  جګړیز اهداف «په خپل ټول ځواک ترلاسه کړي».

بایدن مخکې په یوه مطبوعاتي کنفرانس کې ویلي ول چې د دغې وقفې دوام ته هیله لري. له دې سره به ډیر یرغمل شوي کسان آزاد شي او د غزې خلکو ته به ډېري بشري مرستې ورسیږي.

ماسک د اسرائیل له ولسمشر او د تښتول شویو له خپلوانو سره ګوري

د ایکس ټولنیزې رسنۍ مشر ايلن ماسک به د دوشنبې په ورځ د نوامبر پر ۲۷ اسرائیل ته د خپل سفر پر مهال د دغه هیواد له ولسمشر سره وګوري.

هغه به د بنیامین نتانیاهو او اسحاق هرتزوګ سره پر لیدنې سربیره د هغو کسانو له خپلوانو سره هم وویني چې حماس يرغمل کړي دي.

د اسرا ئيل د ولسمشر دفتر اعلان کړی دی چې هرتزوګ به له ماسک سره د لیدنې پرمهال «په انټرنیټ کې د انتي سميتيزم پر ضد مبارزې» په اړه هم  ټینګار وکړي.

سر بیره پر دې به د یرغمل شویو کسانو خپلوان د اکتوبر مياشتي پر ۷ د حماس د هغه ترهګر برید په اړه چې وحشت يې جوړ کړي او د يرغمل شويو کسانو د درد او رنځ او نامعلوم سرنوشت په اړه خبري وکړي.

د ايلن ماسک په مشرۍ د ایکس  شبکه د اسرائیل او حماس جګړې له پیل راهیسې تر دې نیوکې لاندې ده چې له یهودي ضد او نورو ستونزو جوړونکو موضوعاتو سره مبارزه نه کوي.

پر دغې ټولنیزي شبکې د غزې د جګړې په اړه د ناسمو معلوماتو او کرکې ډک پیغامونو د خپرولو له امله هم نیوکي شوې دي.

د بشري حقونو د څار سازمان: په الاهلي روغتون کې چاودنه د ناپامو ډزو له امله شوې

د بشري حقونو د څار سازمان وايي چې د روان کال د اکتوبر مياشتي پر ۱۷مه د غزې په تړانګه کې په الاهلي روغتون کې چاودنه چې ګڼ شمېر کسان پکې مړه او ژوبل شول، غالباً د یوه ناکام توغندي له امله رامنځته شوې وه.

د دغه سازمان په وینا، دا توغول ظاهراً د هغو توغونو څخه وې چې د وسله والو فلسطیني ملیشو له خوا کیږي. نو له همدې امله، لا زیاتو څیړنو ته اړتیا ده ترڅو معلومه شي چې د توغندي د توغولو تر شا د چا لاس و او آیا د جګړې له قوانینو څخه سرغړونه شوې که نه.

د حماس ترهګرې ډلې له پیله په دغه روغتون کې د ډزو پړه پر اسرائیل اچولې، خو اسرائیل د ځینو عکسونو او ویډیوګانو په خپرولو سره ویلي دي چې دا ډزې  د اسلامي جهاد وسله والو کړې دي.

د غزې د روغتیا وزارت چې د حماس په لاس کې دی، په دې چاودنه کې د سلگونو وژل شویو او ټپیانو خبر ورکړی دی.

د بشري حقونو د څار سازمان وايي چې تر دې دمه د دغه شمېر تائید نه شي کولی.

حماس د نوامبر مياشتي پر ۲۶ د یرغمل شویو دریمه ډله آزاده کړه، چې د اکتوبر د اوومې په برید کې یې له اسرائيل څخه تښتولي ول. اسرائيل تر دې دمه د یرغمل شویو د آزادۍ په بدل کې لسګونه فلسطینیان له بنده آزاد کړي دي.

قطر د سیمې له هيوادونو وغوښتل چې د غزې کړکېچ د هواري هڅې وکړي

قطر د سیمې له هيوادونو څخه غوښتي دي چې د غزې د شخړې د هواري له پاره هڅې وکړي. د دغه هیواد لومړي وزیر محمد بن عبدالرحمن آل ثاني، له آلمانۍ ورځپاڼي «فرانکفورتر آلګماینه» سره په مرکه کې ویلي دي: «اوس هغه وخت رارسیدلی دی چې د سیمه ایزو لوبغاړو په توګه خپله وظیفه سرته ورسوو او اسرائیل هم خپله دنده ترسره او سوله ممکنه کړي.»

هغه د حماس او اسرائیل ترمنځ د غزې په جګړه کې څلور ورځنی وقفې ته په اشارې سره چې له امله يې یرغمل شوي کسان آزاديږي او د غزې خلکو ته بشري مرستې رسیږي وویل، چې لږ تر لږه له دې هوکړې سره یو مثبت حرکت رامنځته شو او هیله ده دوام ورکول شي.

د قطر لومړی وزیر وایي ګومان نه کوي چې اسرائيل به د غزې په جګړه کې حماس له منځه یوسي، ځکه د هغه په وینا، دا ډله «د ټولنې یوه برخه ده، که تاسې ورسره همغږي یاست یا نه.»

قطر اوس مهال د حماس او اسرائیل ترمنځ  اصلي منځګړی دی.