په دغه نړیوال کنفرانس کې د آلمان د ولسمشر فرانک والتر شتاین مایر په ګډون د مختلفو ادیانو شاوخوا ۱۰۰۰ تنه ګډونوال برخه لري. د آلمان ولسمشر شتاین مایر په خپله وینا کې وویل چې نن ورځ له دین او مذهب څخه د شخړو د رامنځ ته کیدو په برخه کې کارول کیږي.‌

د دغه نړیوال کنفرانس هدف د مذهبونو ترمنځ همغږي ښوول شوې څو په ټوله نړۍ کې دیني او مذهبي‌ څیرې د شخړو د لمنځه تلو په برخه کې فعالیت وکړي. دا لومړی ځل دی چې آلمان د دغه راز یوه نړیوال کنفرانس کوربتوب کوي.‌

د آلمان په لنډاو ښار کې د دغه نړیوال کنفرانس ګډونوالو په خپلو ویناوو کې د بیلابیلو مذهبونو او ادیانو ترمنځ د اختلافاتو د لمنځه وړلو په برخه کې د هڅو ژمنې وکړې.‌ «ادیان د سولې له پاره» دغه کنفرانس له نن څخه کابو ۵۰ کاله وړاندې په خپلو هڅو پیل وکړ څو د دین او مذهب له کبله رامنځته شوو شخړو ته د پای ټکی کیږدي.‌

د مسلمانانو، عيسويانو، يهودانو، بودايانو، سيکانو او د نورو کسانو په ګډون د نړۍ د نورو اديانو استازي او دینې عالمان ګډون لري.‌ دوی غواړي چې په دې درې ورځني کنفرانس کې پر داسې لارې چارو خبرې وکړي چې پرمټ یې د مختلفو ادیانو د پیروانو ترمنځ د شخړو مخنیوی وشي او دوی لا سره نیږدې شي.‌

په دې کنفرانس کې که څه هم ګډونوالو بیلابیل مذهبونه،‌ بیلابیلې جامې او ظاهراً له یوه او بله جلا ښکاري،‌ خو انسانیت،‌ د یوه او بل منلو،‌ مسکا او د راتلونکې له پاره د ګډو هڅو ژمنو دوی سره یوځای کړي‌ دي.‌ په کنفرانس کې لیدل کیږي چې هندوان له مسلمانانو،‌ مسلمانانو له یهودانو،‌عیسویان له بودیانو او نورو مذهبونو له استازو سره خبرې کوي،‌ خاندي او په ګډه خواړه خوري.‌

په مجموعي ډول په دې کنفرانس کې تر۱۲۰ د ډیرو هیوادونو شاوخوا ۱۰۰۰ تنو ګډون کړی دی.‌ د دوی په ډله کې حکومتي استازي،‌ مدني فعالان او د ښځو د حقونو فعالان هم شامل دي.‌ لینډاو ښار د دې له پاره د کنفرانس د کوربه په توگه ټاکل شوی چې دا د اتریش،‌ سویس او آلمان ترمنځ پروت دی او له سیاسي نړۍ ډیر واټن لري.‌

د کنفرانس په ترڅ کې یوې بلې داسې مهمې موضوع ته هم ځای ورکړل شوی چې له کبله یې نن ټوله نړۍ په اندیښنه کې ده.‌ اقلیمي بدلون او له کبله یې رامنځ ته کیدونکې طبیعې پیښې او غربت هم د دغه کنفرانس د بحثونو په اجندا کې شامل وو. دغه کنفرانس به د رواني اگست مياشتي پر ۲۳مه نېټه به تر درو ورځو دايرېدنې وروسته پای ته ورسيږي.

بخښنه د پخلاینې لار پرانیزي او پخلاینه د سولې سبب ګرځي.

له شخړو څخه د خلاصون لار د خلکو ترمنځ دوستي ده. انسانان باید د یوه او بل دښمن ونه ګرځي. خدای غرونه د ټولو له پاره جوړ کړي. خدای د انسانانو له پاره هم ښه فکر کړی او موږ هم باید د یوه او بل په هکله ښه فکر وکړو.

سوله د نړۍ مرکزي سرچینه ده، تاسې سوله نه شئ اخیستلی. سوله او خوندیتوب زموږ په دننه کې نغښتي دي. که چیرته موږ ټول د سولې له پاره ژمن اوسو، نو سوله به ورو ورو په ټوله نړۍ کې خپره شي.

زه د ټولې نړۍ له مذهبي څیرو څخه غواړم چې له نفرت خپرولو څخه ډډه وکړي، ځکه چې نفرت د واورې یوه توپ ته ورته دی چې په غورځولو سره ستریږي او ان دا چې پای به یې جګړه وي. د دې پرځای، خلک باید د سولې له پاره تبلیغ وکړي او د بیلابیلو مذهبونه پیروان دې د یو بل د منلو په اصولو کې ژوند وکړي.

سوله نه یوازې ممکنه ده، بلکې دا یوه اړتیا ده. سوله د دې سیارې د ارتقأ له پاره یو بل ګام دی. ځمکه به یو هیواد وي او موږ ټول انسانان به یې ښاریان يوو. دا په موږ پورې اړه لري چې د سولې د ټینګښت له پاره څه کوو. ګډ عمل او د روحاني رویې خپرول، له موږ سره په دې ستونزمنه لار کې مرسته کولی شي.

که سوله نه وي، پرمختګ به نه وي، او چې پرمختګ نه وي نو بیا به انسانیت نه وي.

د سولې معنی مینه ده. د اختلافاتو منل او یو بل ته درناوی، او بیا ټول اختلافات څنډې ته کول او د ګډ هدف له پاره کار باید وشي.

موږ د یو و بل پوهیدو ته اړتیا لرو. د سولې په فضا کې ګډ ژوند، زموږ په ټولنو کې د پرمختګ سبب ګرځي.

سوله باید یوازې د یوه اضافي شي په توګه ونه ګڼل شي، بلکې سوله د ټولو انسانانو یو حقیقي ضرورت او اړتیا ده. دغه اړتیا اوس هم شته او په راتلونکې به هم موجوده وي.

د خلکو ترمنځ مرسته کول او خبرې اترې کول د سولې د لاسته راوړلو له پاره یواځینې لار ده.

الله په قرآن کریم کې موږ ته د سولې حکم کړی دی.

زموږ نړۍ د تنوع له کبله ښکلې ده. موږ یوازې د دې نړۍ د تنوع په ښوولو سره د دې نړۍ د ښکلا ننداره وړاندې کولی شو. په همدې توګه موږ په دې دنیا کې سوله هم راوستلی شو.

هر انسان سوله غواړي، داسې سوله چې د دوی په ژوندانه کې د خوندیتوب معنی ولري. په دې توګه موږ کولی شو یوه سوله ایزه نړۍ رامنځته کړو.

سوله باید له بل هر ځایه وړاندې زموږ په خپلو ځانونه کې وپلټل شي. د خپل ځان پیژندل له نورو سره د سولې په رامنځته کولو کې ډیره مرسته کوي. موږ دې کار ته د مینې د موندلو نوم ورکولی شو.