د نورستان والي حافظ عبدالقیوم دویچه ويله ته وویل چې د چهارشنبې په ناوخته ماښام د نورستان په کامدېش ولسوالې کې د میردیش په نوم کلي لسګونه کورونه له انسانانو او حیواناتو سره سېلاب وړي چې د لومړنیو معلوماتو له مخې لسګونه خلک پکې مړه شوي دي. هغه وايي چې د ۳۰۰ کسانو د ورکي اټکل کيږي او تر اوسه پوري ۶۰ جسدونه موندل شوي دي.
دی وايي، یاده سیمه د طالبانو په ولکه کې ده، نو ځکه د حکومتي مرستو رسولو او ژغورنې ډلګۍ هلته نشي تلای، خو په وینا یې که لاره خلاصه شي نو ولایتي اداره حاضره ده چې پر مرستو رسولو سربېره د ژغورنې ډلګۍ هم ولېږي.
د نورستان ولایتي شورا وايي، تېره شپه د دغه ولایت په کامدېش ولسوالۍ کې زورورو سیلابونو بسته یو کلی له انسانانو او حیواناتو سره وړی دی.
د ولایتي شورا مشر سعدالله پاینده زوی وايي چې د کامدېش د میردیش په نوم دا کلی د خوړ پر غاړو اباد و، نو ځکه خو سیلابونو وړی دی.
دی وايي: »تر اوسه دقیقه نه ده معلومه چې څومره کسان به سیلابونو وړي وي، خو د شاخواو کلیو خلکو په خوړونو کې تر اوسه تر ۴۰ جسدونه موندلي او په نورو پسې په ولسي کچ هڅې روانې دي.«
د ولایتي شورا یو بل غړی ظاهر نورستاني دويچه ويله ته وویل چې د میردیش کلي خلک د شپې پر دولسو بجو سیلابونو اخستي چې د ځاني تلفاتو تر څنګ ګڼ مالي زیانونه هم اوښتي.
هغه وويل: »زورورو سیلابونو د استوګنې کورونه، جومات او یاد کلي ته جوړ پل هم ویجاړ کړی.«
کامدېش د ورستان غرنۍ ولسوالي ده.
څو کاله مخکې د نورستان کامدېش څنګلوري ولسوالې برګیمټال افصې کلی هم واورو لاندې کړ چې ډېر خلک پکې مړه شول.
زموږ له آرشیف څخه:
د نورستان د بډای طبیعت انځورونه
د افغانستان په ختیځ کې پروت نورستان ولایت بډای طبیعت لري. ډیري برخې یې ځنګلونو پوښلې دي او کرهنیزي ځمکې پکې کمي دي. په وروستیو کې دغه ولایت د افغانستان د ملي پارکونو په نوملړ کې ورزیات شو. انځورونه یې دلته لیدی شئ.
انځور: DW/O. Deedarد نورستان مرکز پارون، په دوبي کې همېشه تازه او ښېرازه وي، چې طبیعي پاکه هوا لري.
دا د واما ولسوالۍ اړوند سیمه ده، دا سیند د کونړ پر خوا بهېږي، اوبه یې پاکې او همېشه بهېږي.
دا د نورستان ولایت مرکز پارون بازار یوه څنډه ده.
په دې انځور کې د نورستان ولایت مقام ودانۍ او برېښنا بند ښکاري.
نورستان ۹۲۶۷ کیلومتره مربع مساحت او شاوخوا څلور سوه زره نفوس لري؛ خو د وروستیو سرشمېرنو له مخې د نفوس دا شمېر زیات ښودل شوی.
ډېر کله د نورستان ـ کونړ د خرابي لاري له امله خلک نورستان ته د تګ زړه نه کوي؛ خو اوس حکومت پر یاد سړک کار شروع کړی.
دغه ولایت د ځنګلونو او پاکې هوا په لرلو سره د سیاحت له پاره مناسب چاپېریال لري؛ خو ناامنۍ او د لارو خرابوالی دغه ولایت ته د خلکو د ورتګ پر وړاندې ستونزې جوړوي.
نورستان شاوخوا ۳سوه زره هکټاره ځمکه په ځنګلونو پوښل شوې؛ خو په تېرو کلونو کې یې یوه اندازه وهل شوي او ډېر یې ساتل شوي دي.
د پارون اړوند څیم درې سړې او ښایسته سیمې ته هر وخت سیلانیان ورمات وي، دا ځوانان له کونړه ورغلي.
په نورستان کې هره سیمه او ولسوالي جلا ژبه، موسیقي او دودونه لرِي او د موسیقۍ تر څنګ ځانګړې نورستاني نڅا د خلکو پام ځان ته وراړوي.
د چاپېریال ساتنې ملي ادارې د چاپيریال ساتنې نړیوالې ورځې په مناسب نورستان د ملي پارک او ژویو ساتنې سیمې په توګه اعلان کړی دی.
په نورستان کې د نښترو ځنګل یوه څنډه، په دغه ولایت کې پر شاوخوا ۳سوه زره هکټاره ځمکه ځنګلونه شته؛ خو ځینې یې په ناقانونه ډول وهل شوي دي.
دا په مرکز پارون کې د بریښنا بند دی.
د نورستان ډېري برخې په ځنګلونو پوښلې دي، کرنيزې ځمکې پکې کمې دي، په ځنګلونو کې يې د جلغوزو، چهارمغزو، ارچې او پر نورو سربیره د نښترو ځنګلونه شته.
