نړيوال بانک په افغانستان کي پر بې وزلو کورنيو باندي د کوويد ۱۹ ناروغي د اغيزو د کمښت او غذايي مصوونيت د ساتلو په هدف د بلاعوضو مالي مرستو د دوو بستو د ورکولو اعلان وکړ.

د دغو مرستو ارزښت ۳۸۰ ميليونه ډالرو ته رسيږي چي د ملي دسترخوان او اتباعو د ميثاق د پروګرامونو له پاره په پام کي نيول سوي.

د ملي دسترخوان پروګرام چي د غذايي مرستو له پاره د افغانستان د حکومت له خوا وړاندي سوي، په دغه ډول برنامو کي د فساد د موجوديت له امله د دغه هيواد د پارلمان له خوا رد سوي دي.

د اتباعو ميثاق داسي يو پروګرام دي چي پکښي زراعتي عاجلي مرستي  او په کلو کي غذايي مصوونيت شامل دي.

دغه مالي مرستي به له کوويد ۱۹ څخه اغيزمن سوو کورنيو او د زراعتي محصولاتو څخه د ساتني په هدف پر بزګرانو باندي په مصرف ورسيږي. د نړيوال بانک له دغو مرستو څخه به په ټول افغانستان کي ۲،۹ ميليونه کورنۍ برخمني سي.

د نړيوال بانک د اعلاميې پر اساس ددغو مرستو ۲۸۰ ميليونه ډالر له کرونا څخه اغيزمن سوو کورنيو له پاره په پام کي نيول سوي او ۱۰۰ ميليونه ډالر به  د نورو عاجلو زراعتي او غذايي موادو د پروژو د تمويل له پاره په مصرف ورسيږي.

د مالي مرستو په دغو بستو کي ۱۵۵ ميليونه ډالر د نړيوال پرمختګ د ادارې برخه او ۱۲۵ ميليونه ډالر بيا د افغانستان د بيارغوني د صندوق برخه ده.

د افغانستان له پاره د نړيوال بانک د دفتر رئيس وايي: «د کرونا ويرس د پراخيدو له امله د ميليونو افغانو کورنيو د ژوندانه شرايط سخت زيانمن سوي دي. دغه مالي مرستي به له افغان حکومت سره د ډيريو کورنيو د عاجلو اړتياوو په له منځه وړلو او له بزګرانو سره د غذايي موادو د کرلو او توليد په برخه کي مرسته وکړي.»

د نوموړي بانک په اعلاميې کي راغلي چي دغه مرستي اقتصادي امکانات لا پسي زياتوي او په ډيريو کلو کي به د خلکو له پاره د کار زمينه برابره کړي.

د نړيوال بانک په اعلاميه کي دې ته اشاره سوې ده چي د کرونا ويروس له امله رامنځته سوو محدوديتونو په کليوالو سيمو کي د زراعت سکتور مختل کړی او افغان بزګران پر دې نه دي توانيدلي چي خپل زراعتي محصولات پر خپل وخت راټول کړي.

په داسي حال کي چي په ښارونو کي د مخ پر کميدو عرضي له امله د غذايي موادو بيې مخ پر لوړيدو دي، له همدې کبله نوموړې موضوع جدي پاملرني ته اړتيا لري.

په پام کي ده چي د نړيوال بانک په ملاتړ پروژې به د کليو جوړولو او پراختيا وزارت، د محلي ارګانونو د مستقلې ادارې او کابل ښاروالۍ له خوا عملي سي.

نړيوال بانک وايي چي ددغي پروژې له لاري به د افغانستان په کلو او بانډو کي پر مختيايي شوراګاني د غذايي او صحي مرستو دغه بستي رانيسي او هغه به پر بې وزلو کورنيو وويشي.