په هامبورګ کې یوه غله د یوه بانک مخې ته له یوې ښځې ۵۰ زره یورو غلا کړي. ځايي چارواکو رسنیو ته ویلي دي چې غله د ښځې دستکول چې دغه پیسې په کې موجودې وې تښتولی دی.
د آلمان خبري آژانس د هامبورګ د پولیسو د یوې ویاندې په حواله لیکلي دي: «دا نادره خبره ده چې د دستکول د غلا کولو په پیښه کې دې دومره ډیرې پیسې ورکې شي.»
ښځې له بانک څخه خپلې ټولې سپما شوې پيسې ځکه ایستلی وو چې ویره یې لرله چې د کرونا له کبله د رامنځ ته شوي اقتصادي کړکیچ په پایله کې به بانک ډیوالي شي او بیا به د هغې پیسې ور نه کړای شي.
دغې ۵۲ کلنې ښځې د اپریل میاشتې د ۱۶مې نیټې پر ماښام له بانک خپل ټول پس انداز راوایست او په خپل دستکول کې یې کیښود. کله چې هغه له بانک څخه تر وتلو وروسته د خپل موټر پر لور روانه وه، نو پر بایسکل سپور یوه کس یې ترې دستکول وتښتوه.
لا تر اوسه پورې روښانه نه ده چې دغه پیښه یوازې یو تصادف دی او که دغه ښځه د یوې پلان شوې غلا هدف ګرځیدلی ده.
زموږ له آرشیف څخه:
پنځه هغه شیان چې میلمانه یې په اروپا کې له هوټلونو پټوي
داسې فکر کیږي چې د ښکلو او لوکسو هوټلونو میلمانه ډیر با نزاکته کسان وي، خو داسې کسان هم شته چې د هوټل د خونو له شیانو څخه خپل بکسونه ډکوي او خپلو کورونو ته یې وړي.
انځور: picture-alliance/Arcaid/J. Balstonله لوکس او ښکلو هوټلونو څخه د هنري اثرونو او انځورونو ورکیدل یوه لویه ستونزه ده. د یوې څیړنې له مخې ۳۴ سلنه پنځه ستورو هوټلونو ویلي چې د دوی د هوټلونو له خونو څخه ځینې نقاشۍ په چټکۍ سره د ورکیدو په حال کې دي. په څیړنه کې ویل شوي چې په ارزانه هوټلونو کې د ورکیدو کچه ټیټه ده.
د مسافرو یو بکس به څومره لوی وي چې یو څوک وکولای شي کمپلې پکې پټې کړي؟ په دې څیړنه کې د ۱۰۰۰ برخه اخیستونکو هوټلونو له جملې څخه ۵۰ سلنه یې ویلي وو چې د دوی له هوټلونو څخه کمپلې ورکې شوي دي. ۱۳ سلنو یې ویلي چې د دوی بالښتونه ورک شوي. د ارزانه هوټلونو په پرتله په لوکس هوټلونو کې د غلا پیښې پنځه برابره لوړي دي.
د هوټلونو تقریباً ټولې خونې په تلویزیونونو باندې مجهزې دي خو دا چې میلمانه یې پټ نه کړي. د هوټلونو له پاره د تلویزیونونو ورکیدل یوه لویه ستونزه ده. په دې ټول پوښتنه کې پنځه سلنه هوټلونو ویلي چې د دوی تلویزیونونه ورک شوي. دا چې تلویزیونونه د هوټل په دیوالونو نصب شوي، خو بیا هم غله ځانګړې وسایل لري او تلویزیونونه پټوي.
آیا داسې فکر مو کولو چې له هوټلونو څخه د تلویزیون او کمپلو پټول به ستونزمن وي. داسې خلک شته چې ان توشکې پټوې. په دې ټولپوښتنه کې ځینو هوټلونو ویلي چې د شپې پر مهال د دوی ځینې توشکې په لفټ کې د میلمنونو موټرونو ته انتقال شوي. په دې سروې کې پنځه سلنه هوټلونو د توشکو له وکیدو شکایت کړی.
تر ټولو خرابه غلا د ايټالیا په یوه هوټل کې شوې. د دې لوکس ایټالیايي هوټل له صالون څخه یوه پیانو په نا څاپه توګه ورکه شوې. درې نا پیژندو کسانو دغه پیانو له هوټل څخه بیرون کړې او د سړک په لور یې انتقال کړې ده او بیا وروسته دغه پیانو هیڅ نه ده لیدل شوې. خو ښه خبر دا دی چې له دې هوټل څخه یوازې همدا پیانو غلا شوې.
