د آلمان د بايرن ايالت د کورنيو چارو وزارت په پام کې لري هغه مهاجر د محکمې په لګښتونو کې دخيل کړي، کوم چې دوسيې يې د استيناف محکمې له خوا څيړل کيږي.
د بايرن د کورنيو چارو وزير يوآخيم هرمن وايي، هغه مهاجر چې د مهاجرت ادارې پريکړه نه مني او له سره د نوې محکمې له پاره عريضه وړاندې کوي، بايد د محکمې په لګښتونو کې برخه واخلي.
هرمن د «آلمان د تحريريه ډلې» ورځپاڼو سره په مرکه کې وويل: «يوه لاره کيدای شي همدا وي، تر څو ووينو چې آيا امکان به ولري چې شکايت کونکي د محکمو په لګښتونو کې سهيم کړو، په هغه صورت کې چې د هغوي قانوني اقدام په څرګند ډول بې بنسټه او د نه منلو وړ وي.»
تر دې وړاندې د بايرن مسيحي سوسيال ډلې د ګوند مشر الکساندر دوبرينت ويلي وو چې په آلمان کې ګواکې د «اخراج ضد يو صنعت» فعال دی. اوس يوآخيم هرمن د خپلو خبرو پر مهال خپل توافق له همدې نظريې سره مطرح کړ. هرمن په دې اړه وويل: «په آلمان کې ځينې موسسې شتون لري چې غواړي د هرې ممکنې لارې د اخراجونو مانع وګرځي. دا يوه عادي خبره نه ده او موږ يې بايد پر وړاندې اقدام وکړو.»
د بايرن مسيحي سوسيال ګوند د صدراعظمې انګلا مرکل د مسيحي دموکرات ګوند اتحادي غړی دی. د آلمان تير حکومت د همدې دواړو ګوندونو څخه جوړ وو، خو په اوسني نوي ائتلافي حکومت کې ورسره د آلمان سوسيال دموکرات ګوند هم ورګډ شوی دي.
د بايرن مسيحي سوسيال ګوند د مهاجرو پر وړاندې د سخت قانون غوښتونکی دي. دغه ګوند په مخکيني حکومت کې هم د مهاجرو په تړاو د ځينو محدوديتونو غوښتنې لرلې، چې د مرکل له خو رد شوي وې.
د مهاجرت پر موضوع يو انځوريز البوم له آرشيف څخه:
د مهاجرو په برخه کي د آلمان فدرالي ادارې په حواله، دغه هيواد ته د راغلو مهاجرو د پناه غوښتنلیکونو منل کیدل او یا ردیدل د نورو فکتورونو ترڅنګ په دې پورې هم اړه لري، چې دغه شخص د آلمان په کوم ایالت کې پناه غوشتې ده.
انځور: picture-alliance/dpa/D. Karmannتیر کال په ټول آلمان کې د پناه تر ټولو لږ غوښتنلیکونه د آلمان په برانډنبرګ آیالت کې منل شوي دي. یا په بل عبارت دغه آیالت تر ټولو لږو مهاجرو ته قبولي ورکړې ده.
په بایرن ایالت کې سوسیال مسیحي اتحاد ګوند په واک کې دی. د دغه ګوند مشر هورست زیهوفر، په نوي حکومت کې د کورنیو چارو وزارت دنده ترلاسه کړې. زیهوفر د ټول هیواد په کچه د رد شویو مهاجرو د اخراجولو ژمنه کړې. تیر کال د هغه په ایالت کې د پناه د منل کیدو فیصدي ۳۱،۸ وه.
بادن ورتمبرګ هم د آلمان په هغو ایالتونو کې شمیرل کیږي چې د پناغوښتونکو د منل کیدو سلنه یې ټيټه ده. تیرکال په دغه ایالت کې د پناغوښتونکو د منل کیدو فیصدي ۳۷،۷ وه.
تیر کال د آلمان په تورنګن ایالت کې د پناغوښتونکو د ۴۴،۱ سلنه غوښتنلیکونه منل شوي دي، په داسې حال کې چې نورو ته د رد ځواب ورکړل شوی دی.
د آلمان پلازمېنه برلين پخپله یو ایالت هم دی. په دغه ایالت کې تیرکال د ۴۴،۳ سلنه مهاجرو د پناه غوښتنلیکونو مثبت ځواب ترلاسه کړی دی.
په دې ایالت کې په ۲۰۱۷م کال کې ۴۴،۶ سلنه د پناغوښتنې غوښتنلیکونو مثبت ځوابونه ترلاسه کړي دي.
نورد-راین-وستفالن د نفوس له پلوه د آلمان تر ټولو ګڼ میشته ایالت دی. دغه ایالت ته هم د نورو په پرتله ډیر مهاجر راغلي دي. په دې ایالت کې د مهاجرو د قبولۍ کچه تر ۴۵ سلنه یو څه لوړه ده.
تیر کال په هامبورګ ایالت کې ۴۸ سلنه د پناهندګۍ غوښتنلیکونو مثبت ځوابونه ترلاسه کړي دي.
تیرکال (۲۰۱۷) په نیدر زاکسن ایالت کې د ۵۲،۴ سلنه پناغوښتونکو د پناه غوښتنلیکونو مثبت ځوابونه ترلاسه کړي دي.
په ۲۰۱۷م کال کې د آلمان په شلیسویګ هولشټاین ایالت کې هم د نیدر زاکسن په شان د پناه منل کیدو سلنه ۵۲،۴ وه.
د آلمان په هیسن ایالت کې هم د یو شمیر نورو په شان د پناغوښتونکو د منل کیدو کچه لوړه وه. تیرکال دغه ایالت ۵۳،۲ سلنه د پناه غوښتنلیکونو ته مثبت ځواب ورکړی وو.
د آلمان په شمال کې د بریمن ایالت هم تیرکال د پناغوښتونکو د پناغوښتني نږدې ۶۰ سلنه غوښتنلیکونو ته مثبت ځوابونه ورکړي دي.
زارلنډ تر ټولو ډیر مهاجر منلي دي
زار لنډ د آلمان په سویل لویديځ کې د فرانسې سرحد ته نږدې دی. تیرکال په دې ایالت کې د پناغوښتونکو د پناغوښتنې د منل کیدو فیصدي تر ټولو لوړه یعنې ۷۳ سلنه وه.
