موسی د ملي اردو عسکر وو او ترلسو کلونو زيات یې په غزني کي خدمت کاوه. بلاخره د سړک د غاړي پر یوه ماین باندي وربرابر او ووژل سو. د هغه خپلوان وايي، چي موسی پخوا هم څو واري زخمي سوی وو او زخمونه یې اوس هم لا تازه وه.
دا د افغانستان د ترخه جنګ د واقعاتو یوه برخه ده. دغه ډول له غمه ډکي واقعې لږ نه دي او اکثرأ په تکرار سره پيښيږي.
داسي میندي سته، چي د خپلو اولادونو جلاوالی نه سي تحملولای او له هغوی سره یو ځای ښخیږي او هم داسي میندي او ښځي ډیري دي، چي د عمر تر اخره پوري په غم اخته وي او د خپلو زامنو او مړونو د فراق څخه سوځي.
د موسی ورور، جان آغا، چي له درده ډک ستونی موږي، نه پوهیږي، چي د مور او که ورور پر مرګ وژاړي او یا هم د ورور د یتیمانو جواب ووايي. هغه د خپلي مور د مرګ په باب وايي.«کله چي زنګ راغی او مور مي واوریدل، چي موسی وژل سوی دی، سکته یې وکړه او مړه سوه.»
جان آغا وايي، کله چي موسی اخر وار بیرته غزني ته تلی، لا یې د پښو زخمونه تازه وه. هغه اضافه کوي،«ورور مي ۱۴ کاله په غزني کي وظیفه درلوده، د یوې ټولی ضابط ؤ، څلور واره ټپي سوی ؤ، په پښه کي یې سیخ تیر سوی ؤ، مالي مشکلات یې درلول. پلار مي سپین ږیری وو او د اولادو په خاطر بیرته وظیفې ته ولاړی.»
له موسی څخه یو زوی او ۳ لوڼي پاته سوې، چي تر ټولو کشره یې د ۹ میاشتي وه. د پروان محلي چارواکي وايي، چي د موسی تر وژل کیدو یوه ورځ دمخه یې د اکا زوی په لوګر کي ووژل سو، چي هغه هم د ملي اردو عسکر وو.
زموږ له آرشیف څخه:
په ۲۰۱۹ م کال کې له ترهګرۍ څخه لس تر ټولو ډیر اغیزمن شوی هیوادونه
د «ګوبل تیروریزم انډیکس» یا د ترهګرۍ نړیوال شاخص د ۲۰۱۹م کال د رپوټ په اساس، افغانستان په ټوله نړۍ کې د ډیرو ترهګریزو بریدونو او تلفاتو له کبله، له ترهګرۍ څخه د اغیزمنو شویو هیوادونو د نوملړ په سر کې ځای نیولی دی.
