افغان او بهرنیو ځواکونو د طالبانو پر یوه زندان باندې برید وکړ چې په پایله کې یې د دې ډلې له بند څخه لږ تر لږه ۳۰ کسان آزاد شوي دي.

افغان چارواکو ویلي دي چې دغه کسان د هلمند ولایت له نوزاد ولسوالۍ څخه آزاد شوي دي چې په کې تر ۲۱ کلونو کم عمر لرونکي څلور ماشومان او دوه پولیس شامل دي.

د آزاد شویو کسانو له ډلې څخه شل تنه یې طالبانو له دولت سره د مرستې په تور او یا هم له دې کبله چې د هغوی د کورنیو غړو په حکومت کې کار کوه، نیولي وو.

د افغان پوځ د ۲۱۵مې قول اردو د ویاند مرستیال عبدالقادر بهادرزاده، ویلي چې اوس هم په دې اړه څیړنې روانې دي چې طالبانو ولې نور شپږ تنه په خپل زندان کې ساتلي ول.

دا په داسې حال کې ده چې طالبانو په یوه بیانیه کې ادعا کړې ده چې آزاد شوي کسان مجرمین دي چې د غلا، برمته نیونو، شخصي جنجالونو او نورو جرمونو په تور یې په زندان کې وخت تیروه.

د طالبانو ویاند قاري یوسف احمدي، په بیانیه کې زیاته کړې ده: «په دې زندان کې د دښمن پورې مربوط څوک موجود نه وو او په کافي اندازه ساتونکي تدابیر یې هم نه ول نیول شوي.»