د هندوستان د عامې روغتیا وزارت د دوشنبې په ورځ وویل چې په تیرو ۲۴ ساعتونو کې د کرونا ۲۴ زره تازه مثبتې پیښې ثبت شوي دي او په دې توګه په دې هیواد کې د کرونا د مثبتو پیښو مجموعي شمیر ۶۹۷ زره او ۳۵۸ پیښو ته لوړی شوی دی. په دې توګه هندوستان په کرونا د ککړو کسانو له اړخه تر روسیې مخکې شوی دی او په نړۍ کې کرونا ځپلی دریم هیواد دی.
د امریکا متحده ایالات او برازیل هم د کوید ۱۹ یا کرونا ویروس تر ټولو ډیري مثبتې پیښې ثبت کړي دي. کارپوهانو وړاندوینه کړې ده چې ښايي په روانه میلادي میاشت کې په هندوستان کې د کرونا ویروس د مثبتو پیښو شمیر یو میلیون ته ورسیږي.
د جنوبي آسیا په دغه ډیر نفوس لرونکي هیواد کې تر اوسه پورې د کرونا له کبله ۱۹ زره او ۹۶۳ کسانو خپل ژوند له لاسه ورکړی دی. د مرګونو له اړخه هندوستان د نورو ډیرو ځپل شویو هیوادونو په پرتله کم ځپل شوی دی.
کرونا ویروس تر ډیره د هندوستان په سترو ښارونو کې ډیر خپور شوی دی. نوي ډهلي او ممبي ښارونو هر یو د کرونا ۱۰۰ زره مثبتې پیښې لري او تر اوسه پورې په پلازمېنه نوي ډهلي کې د کرونا ۳۰۰۰ مرګونه او په ممبی کې بیا ۵۰۰۰ پیښې ثبت شوي دي.
انځور: Reuters/D. Siddiqui نوي ډهلي بیا له کرونا وبا سره د مبارزې له پاره په دې وروستیو کې یو ستر روغتون هم فعال کړ چې د ۱۰ زرو بسترونو ظرفیت لري. د هندوستان نورو ښارونو لا ترمخه د کرونا اړوند شدید محدودیتونه وضع کړي دي.
په ټوله نړې کې تر اوسه پورې د کرونا د مثبتو پیښو شمیر ۱۱،۴ میلیونو ته رسیدلی دی او له دې ناروغۍ تر اوسه پورې تر ۵۰۰ زره ډیرو کسانو خپل ژوند له لاسه ورکړی دی. کارپوهان وايي چې په نړۍ کې ښايي په کرونا ویروس د ککړو کسانو او همدا راز د مرګونو پیښې تر رسمي شمیرو ډیري لوړې وي.
انځورونه: نوي ډهلي د اورګاډي۵۰۰ واګونونه په ګرځنده روغتونونو بدل کړي:
نوي ډهلي د اورګاډي۵۰۰ واګونونه په ګرځنده روغتونونو بدل کړي
په هندوستان کې په کرونا د اخته کسانو شمیر په ډيريدو سره، د چارواکو ترمنځ هم د یادې وبا په هکله اندیښنې ډیرې شوي دي. اوس په نوي ډهلي کې د کرونا د ناروغانو له پاره ۵۰۰ واګونونه په ګرځنده روغتون بدل شوي دي.
انځور: Reuters/D. Siddiquiد آلمان خبري آژانس په حواله، ټاکل شوې چې د هندوستان په پلازمینه نوي ډهلي کې د اورګاډي ۵۰۰ واګونونه د کرونا ناروغانو د درملنې له پاره په ګرځنده روغتون بدل شي.
په نوي ډهلي کې د ځايي حکومتي چارواکو په خبره، ټاکل شوې په نیږدې راتلونکې کې د کرونا ناروغانو آزموینې هم درې برابره لوړې شي.
نوی ډهلي اوس یو له هغو سیمو څخه شمیرل کیږي چې پکې کرونا ویروس ډیر خپور شوی دی او ځايي حکومتي چارواکي یې اندیښمن کړي دي.
یوازې په تیرو دوو ورځو کې په نوي ډهلې کې د کوید ۱۹ یا کرونا ویروس تر۲۰۰۰ ډیرې مثبتې پیښې ثبت شوي دي او دغه لړۍ همداسې په چټکۍ سره پرمخ روانه ده.
په هندوستان کې احمد آباد او ممبيي هم د هغو ښارونو په کتار کې دي چې د کرونا وبا له کبله ډیر ځپل شوي دي او پکې کرونا ویروس د خپریدو په حال کې دی.
تر اوسه پورې يوازي په نوي ډهلي کې د کرونا ویروس له ۳۹ زره څخه ډیرې مثبتې پیښې ثبت شوي دي.
د دغه ستر او مهم ښار چارواکي د اندیښنې په څرګندولو سره وايي چې د جولای میاشتې تر نیمايي پورې ښايي په کرونا د اخته کسانو شمیر تر نیم میلیون واوړي.
د هندي چارواکو د معلوماتو له مخې یوازې په نوي ډهلي کې تر اوسه پورې د کرونا وبا له کبله ۱۲۷۱ کسانو خپل ژوند له لاسه ورکړی دی.
د کرونا وبا له کړکیچ سره د مبارزې له پاره اوس هندي چارواکو د «لایف لاین» په نامه د اورګاډیو یو داسې سیستم فعال کړی چې پر مټ یې لیرې پرتو سیمو روغتیايي خدمات رسوي.
د هندي چارواکو په خبره، دوی د اورګاډو۵۰۰ واګونونه په ګرځنده روغتونونو بدل کړي او غواړي په دې توګه د کرونا ناروغانو له پاره صحي خدمات وړاندې کړي.
